އިންސާނުން ޖަމާއަތެއްގެ ތެރޭގައި އުޅޭނަމަ، ހިޔާލުތަފާތުވުންތަކާއި ހިތްހަމަނުޖެހޭ ކިތަންމެ ކަމެއް ހިނގާނެއެވެ. އެކަކު އަނެކާ ހިޔާލު ތަފާތުވެ، ދެބަސްވެވޭ ހާލަތްތައް އަންނާނެއެވެ. އެއްވެސް ޒާތެއްގެ ކުރިމަތިލުމެއް ނުހިނގާ ނަމަވެސް، އެހެންބަޔަކު ނުވަތަ އަނެކާ ކުށެއްކުރާތީ ނުވަތަ ގޯހެއް ހަދާތީ ފެނިދާނެއެވެ. އިންސާނާއަށް މިފަދަ ކަންކަން ދައްކަވަނީ އެ އިންސާނާ އެކަންކަމުން ދަރުސްލިބި އިބުރަތް ހާސިލް ކުރުމަށެވެ. އަދި އިސްލާހުވެ ހެޔޮމަގުގައި ހިނގުމަށާއި ތަފާތު ގޮތްގޮތަށް އިމްތިހާނު ކުރެއްވުމަށްޓަކައެވެ.

ދުނިޔޭގައި މިފަދައިން ކަންކަން ވަމުންދާއިރު، އަނެކާގެ ގޯސްކަމުގެ ވާހަކަ ނުވަތަ އަނެކާއަށް ހެދިފައި ހުންނަ ކުށް ނުވަތަ ގޯސްތަކުގެ ވާހަކަ އެހެންމީހުންގެ ގާތުގައި ދެކެވުމަކީ ވަރަށް އާންމު ކަމެކެވެ. ނަމަވެސް މިއީ އެންމެ ރަނގަޅު ގޮތްތޯ ބަލާލުން ވަރަށްވެސް މުހިންމެވެ. އެހެނީ އަނެކާ އެ ކުރި ކުށެއް ނުވަތަ ހެދި ގޯހެއް ހެދުމުގައި އަނެކާގެ ގަސްދެއް އޮތްކަން ނުވަތަ ނޫންކަން ނޭނގޭނެތީއެވެ. އަދި މިފަދައިން އަނެކާގެ މިފަދަ ވިޔާނުދާ ވާހަކަ އެހެން މީހުންނާ ހިއްސާކުރުމަކީ އޭގެ ސަބަބުން ފިތުނަ އާއި ނަފްރަތުގެ ހުޅު މުޖުތަމައުތަކުގައި ފަޅައިގެން ދާ އެއް ސަބަބެވެ. އެހެންކަމުން އަނެކާގެ ވިޔާނުދާ ވާހަކަ ތަކަކީ ހާއްސަ ހާލަތެއް މެދުވެރިވެގެން ނޫނީ ދައްކައިގެން ވާނޭ ވާހަކަ ތަކެއް ނޫނެވެ.

ދަންނާށެވެ! މީހެއްގެ މިފަދަ ވިޔާނުދާ ވާހަކައެއް އެހެން މީހަކާ ނުވަތަ ބަޔަކާ، ތިމާ ހިއްސާކުރާނަމަ، އެމީހެއްގެ ފުށުން ތިބާގެ މިފަދަ ވާހަކައެއްވެސް އެހެންބަޔަކަށް އެނގިދާނެކަމީ ވުން ވަރަށް ގާތް ކަމެކެވެ. ހަގީގަތަކީ އެހެންމީހެއްގެ މިފަދަ ވާހަކައެއް ދައްކަން ހަގީގަތުގައި ޖެހިލުން ވާން ޖެހޭނެއެވެ. ލަދުގަންނަން ވާނެއެވެ. ވީ ވަރަކުން އަނެކާގެ ސިއްރު ހިފަހައްޓައިދޭން ވާނެއެވެ. ބޭޒާރުކޮށް ފަލީހަތް ކޮށްގެން ނުވާނެއެވެ.

އަނެކާއަަށް ނޭނގުމުގެ ތެރޭގައި ބުނެވޭ ގޯސް ބަސްބަހާއި ކުރެވޭ ނުރަނގަޅު ކަންކަން މިފަދައިން ބޭޒާރުކޮށް ފަލީހަތް ކުރުމަކީ ކުދިކުދި މުޖުތަމައުތަކުގައި ފިތުނައާއި ނަފްރަތު އުފެދޭނޭ ކަމެކެވެ. މިފަދަ ޖާހިލުކަމެއް އެ މުޖުތަމައެއްގައި ފެތުރި އާންމުވެއްޖެނަމަ އެ މުޖުތަމައަކުން އަމަން އަމާންކަން ގެއްލޭނެއެވެ. ސިއްރު ހިފެހެއްޓުމެއް ނެތި ގިނަ ބަޔަކު ފަލީހަތްވެގެން ހިނގައިދާނެއެވެ.

ކަންއޮތީ މިހެން ކަމުގައި ވުމުން، އަނެކާގެ ވާހަކަ، ހާއްސަކޮށް އަނެކާއަަށް ހެދޭ ގޯސްތަކުގެ ވާހަކަ، އެހެން މީހުންކައިރީގައި ނުދައްކާށެވެ. އެފަދަ ކަންކަން ސިއްރުކޮށްދޭށެވެ. އިސްލާހުވާން އެދޭނަމަ، އެމީހަކާ ސީދާކޮށް އެ ވާހަކަ ހިއްސާކުރާށެވެ. އެހެންމީހުންގެ ކަންކަން ބޭޒާރުކޮށް ފަލީހަތް ކުރުމަށް ލަދުގަންނަން ވާނެއެވެ. ޖެހިލުން ވާން ވާނެއެވެ. ފަސްޖެހެވެން ވާނެއެވެ.