ލާއިންސާނީ އަނިޔާތަކާއި އަމަލުތަކަކީ އެއްވެސް އިންސާނަކަށް ހައްްްގު ކަމެއް ނޫނެވެ. އެހެނީ އެއީ އިންސާނިއްޔަތުގެ އިދިކޮޅު ސިފައެވެ. އެއްވެސް އިންސާނަކަށް އިންސާނިއްޔަވަންތަކަމުގެ އިދިކޮޅު އަމަލެއް ކުރިމަތިވެގެންނުވާނެއެވެ. މިއީ ކާއިނާތާ ދުނިޔޭގެ އުސޫލެވެ. ކަން ހިނގަންވާ ގޮތުގެ ހަމަ އާއި އަސްލެވެ. އިންސާނިއްޔަވަންތަ ކަމުގައި އިންސާނުން ތަފާތުވަނީ ކޮން ސަބަބުތަކަކާ ހުރެހެއްޔެވެ؟ އިންސާނާގެ ހަމުގެ ކުލައިން ހެއްޔެވެ؟ އިންސާނާ ނިސްބަތްވާ ގައުމަކުން ހެއްޔެވެ؟ އެބަޔަކު ނިސްބަތްވާ ދީނަކުން ހެއްޔެވެ؟ އާދޭހެވެ! އިންސާނީ ހައްގުތަކާ އިންސާނީ ކަރާމާތުގައި ހަމަ ކޮންމެ އިންސާނަކީ ހަމަހަމަ ބައެކެވެ.

ދުނިޔޭގައި މިހާރު އެންމެ ގަދައަށް ދެކެވޭ އެއް ވާހަކަ އަކީ "ރަޝިޔާ-ޔޫކްރެއިން" ގެ ހަނގުރާމައިގެ ވާހަކައެވެ. ދުނިޔޭގެ ބޮޑު، އެއް ބާރު ކަމަަށްވާ ރޫސީވިލާތުން، އަސްކަރީ ބާރުތަކާއި އެކު ޔޫކްރެއިންގެ ބިމަށް ވަދެ، އެ ގައުމުގައި ލޭއޮހޮރުވަމުންދާ ވާހަކައެވެ. ޒަމާނީ ބަރު ހަތިޔާރުން ޔޫކްރެއިން ތަޅާ ސުންނާފަތި ކުރާ ވާހަކައެވެ. ބޮޑެތި އުސް އިމާރާތްތަކާއި ގެދޮރުތައް ބިމާ ހަމަ ކުރާ ވާހަކައެވެ. މީސް މީޑިޔާގައި ދައުރުވަނީ މުޅިންވެސް އެފަދަ މަންޒަރުތައް ދައްކުވައިދޭ ވީޑިއޯތަކާ ފޮޓޯ ތަކެވެ. ކޮންމެ ދުވަހަކު އެތައް މީޑިއާއަކުން ތަފާތު އެކި އެކި ތަފާސް ހިސާބުތައް ނެރެ އާންމު ކުރެއެވެ. މަރުވާ މީހުންނާއި އޭގެ ތެރެއިން ކުޑަކުދިންނާ އަންހެނުންގެ އަދަދުތަކެވެ. ދުނިޔޭގެ ބޮޑެތި މީޑިއާތަކުން، މުޅި ދުނިޔެއަށް މި މަންޒަރުތައް ވަރަށް ސާފުކޮށް އެބަ ދައްކައެވެ.

ދުނިޔޭގެ ބޮޑެތި ޖަމުއިއްޔާ ޖަމާއަތްތަކުން ރަޝިޔާގެ މި ލާއިންސާނީ އަނިޔާތައް ކުށްވެރި ކުރެއެވެ. ބޮޑެތި ގަރާރުތަކާ ހަރުކަށި ފިޔަވަޅުތައް ރަޝިޔާއާއި ދެކޮޅަށް ތަންފީޒު ކުރެއެވެ. ވިޔަފާރީގެ ބާޒާރުން ރަޝިޔާ އެކަހެރި ކުރަމުން ދެއެވެ. ކުޅިވަރުގެ ހަރަކާތްތަކުން ބާކީ ކޮށްލަމުންދެއެވެ. މަސައްކަތުގެ މާހައުލުގައި ފިއްތުންތައް ކުރިމަތި ކުރުވަމުންނެވެ. ފައިސާގެ މުޢާމަލާތްތަކުގައި ދަތިކުރުވަމުންނެވެ. ރަޝިޔާއަށް މުޅި ދުނިޔޭގެ ނަފްރަތާއި ނުރުހުން އަމާޒުވަމުން މި ދަނީ އެ ގައުމުން، ޔޫކްރޭނަށް ދެމުންދާ ލާއިންސާނީ ހަލަމާތަކާއި ކުރަމުންދާ ލާއިންސާނީ އަނިޔާތަކުގެ ސަބަބުންނެވެ. ލާއިންސާނީ އަމަލުތައް ހިންގާ ކޮންމެ މީހަކީ ނުވަތަ ބަޔަކީ އިންސާނުންގެ ސަފުން ބާކީ ވާނޭ މީހެކެވެ. މުޅި އިންސާނިއްޔަތު މިކަމަށް ހެކިވެއެވެ. 

ރަޝިޔާ-ޔޫކްރޭނުގެ ހަނގުރާމައަކީ ދުނިޔޭގައި ކުރެވޭ މިފަދަ ހަމަ އެކަނި ހަނގުރާމައެއް ނޫނެވެ. ލާއިންސާނިއްޔަތާއި އަނިޔާވެރިކަން އިސްކުރި ފުރަތަމަ ގައުމެއް އަދި އަސްކަރިއްޔާއެއްވެސް ނޫނެވެ. ދުނިޔޭގެ ތާރީޚުގައި މިފަދަ އެތައް އަނިޔާވެރި ވެރިންނަކާއި ހަނގުރާމައެއް ވަނީ ފެނިފައެވެ. ފަހުގެ ތާރީޚުތަކުގައިވެސް ދުނިޔޭގެ ބޮޑެތި ބާރުތަކުން ގައުމުތަކަށް އަރާ މިފަދަ ލާއިންސާނީ އަނިޔާތަކާ ހަމަލާތައް ވަނީ ދީފައެވެ. އަދި ކިއެއް ދަނީ ދެމުންވެސް މެއެވެ. ރަޝިޔާ-ޔޫކްރޭންގެ ހަނގުރާމައަށް ދުނިޔޭގެ ސަމާލުކަން ލިބުނު މިންވަރަށް، ނުވަތަ އެ މިންވަރާ ގާތައްވެސް މިފަދަ އެހެން ހަނގުރާމަތަކުގައި ދުނިޔޭގެ ސަމާލުކަމެއް ނުލިބެއެވެ. ސީރިޔާ އާއި ޔަމަނާއި، އިރާގާއި އަފްޣާނިސްތާނާ އަދި ފަލަސްތީނު ފަދަ ގައުމުތަކުގެ ބިންތަކުގައި ހިނގަނީ ހަމަ މިފަދަ ލާއިންސާނީ އަމަލުތަކެކެވެ. ސުންނާފަތި ކޮށް ފަޅުކޮށްފައިވަނީ އިންސާނުން އުޅެމުން އަަައި އަވަށްތަަކާއި އިމާރާތްތަކެވެ. މަރާލެވިފައިވަނީ ހަމަ އިންސާނުންނެވެ. ގޮއްވާލައިފައި ވަނީ އާންމު ހޮސްޕިޓަލު ތަކެވެ. އޮހެމުން ދަނީ ބަރު ހަތިޔާރުގެ ހަމަލާތަކެވެ. މަރުވަނީ އާންމުންނާއި އެ ގައުމުތަކުގެ ދިފައީ ބާރުތަކުގެ މީހުންނެވެ. އަންހެނުންނާއި ކުޑަކުދިންނެވެ. އާބާދުވެފައިވާ އެތައް ސަރަހައްދުތަކެއް ކަނު އަނރީގައެވެ. ޔަތީމު ކުތިން އެހާ ގިނައެވެ. ހުވަފަތް އަނބިން އަމުދުން ގިނައެވެ. ނަމަވެސް ހިތާމައަކީ އެ ހަނގުރާމަތަކާއި އެ ލާއިންސާނީ އަނިޔާތަކަށް ދުނިޔެ އެނބުރި ބަލައިނުލާ ކަމެވެ. ކޮން ސަބަބަކާއި ހުރެ ހެއްޔެވެ؟

އިންސާނުންގެ ވިސްނުމާއި ހިޔާލު އަޅުދާސްތުކުރުމުގައި މީޑިއާއަކީ ވަރަށް ބޮޑު ދައުރެއް އަދާކުރާ އެއްޗެކެވެ. އޭގެ އެއް ހެއްކަކީ ރަޝިޔާގެ ރައީސް ޕޫޓިން އަކީ މިއަދު އެންމެން ދަންނަ "ބިރުވެރި" މޫނެކެވެ. ނަމަވެސް ފަލަސްތީނުގެ ބިން ނުހައްގުން ފޭރިގަތް އިސްރާއީލުގެ ވެރިންގެ ނަމެއްވެސް އަދި މޫނެެއްވެސް ދަންނަ ބަޔަކު މަދުވާނެއެވެ. ކީއްވެ ހެއްޔެވެ؟ އެއީ މީޑިޔާގެ ދައުރެވެ. އެމީސް މީހުންގެ މޫނާއި ނަންތައް ތަކުރާރުކޮށް މީޑިޔާތަކުން ނުދެއްކީތީއެވެ. ކީއްވެ ހެއްޔެވެ؟ އަނިޔާލިބެމުންދަނީ ދެރަ ބަޔަކަށް ވާތީހެއްޔެވެ؟ އިސްލާމުންނަށް ވީތީހެއްޔެވެ؟ ހުޅަނގުގެ ގައުމަކަށް ނުވީތީ ހެއްޔެވެ؟ ބޮލުގެ އިސްތަށީގެ ކުލަ ރަތް ނުވީމަހެއްޔެވެ؟ 

އެެވެސް ހަނގުރާމައެވެ. މިވެސް ހަނގުރާމައެވެ. އޭރުވެސް މަރުވީ އިންސާނުންނެވެ. މިހާރުވެސް މަރުވަނީ އިންސާނުންނެވެ. ތަފާތުވީ އެމީހުންގެ ނަސްލާ ގައުމެވެ. ދީނާ ކުލައެވެ. މިއީ އިންސާނިއްޔަތުގައި ތަފާތު ވާން ޖެހޭނޭ ކަންކަން ހެއްޔެވެ. މިއަދު މީޑިޔާތުކުގައި ރަޝިޔާ-ޔޫކްރޭން ހަނގުރާމައިގެ ވާހަކަ، ފުޅާ ދާއިރެއްގައި ދައްކާއިރު، ކުރިން ފާހަގަ ކުރެވުނު ގައުމުތަކުގެ ހަނގުރާމަތަކާއި އެ ގައުމުތަކުގައި ހިންގާ އުދުވާނީ ހަމާލާތަކުގެ ވާހަކަވެސް މިހާ ބޮޑުކޮށް މީޑިޔާތަކުން ދައްކަން ވާނެއެވެ. މިއަދު ދުނިޔޭގެ އެންމެން މި ހަނގުރާމަ އާއި މެދު ކަންބޮޑުވަނީ މީޑިޔާތަކުން މި މަންޒަރު ދައްކުވާ ގޮތުންނެވެ.

ގައުމާއި ވަޠަނުގެ ދިފާޢުގައި ޔޫކްނޭކް ރައްޔިތުން ކުރަނީ "ޖިހާދެވެ". ނަމަވެސް ކުރިން ފާހަގަ ކުރެވުނު ގައުމުތަކުގެ ރައްޔިރުން، އެމީހުންގެ ގައުމާއި ވަޠަނުގެ ދިފާޢުގައި ތެދުވުމުން އެމީހުން ވެގެން ދިޔައީ "ޓެރަރިސްޓުން"ނަށެވެ. މިއީ މީޑިޔާތަކުގެ ސީދާ ދައުރު މިކަމުގައި އޮތް ކަމެކެވެ. މިއީ މީޑިޔާގެ ބާރެވެ. އިންސާނުންގެ ގަބޫލު ކުރުމާއި ހިޔާލުކުރުން އަޅުވެތި ކުރާ މައި އެއް ވަސީލަތަކީ މީޑިޔާއެވެ. ދޮގެއްތޯއެވެ!؟