މައިންނާއި ދަރިންގެ ދެމެދުގައި ވަނީ ޤުދުރަތީ ގުޅުމެކެވެ. އެގުޅުމުގެ ބާރަކީ ޤުދުރަތުން އުފެދި ފައްކާވެފައިވާ ގުޅުމެކެވެ. ނަމަވެސް ހިތާމައަކީ މި ގުޅުމުގެ ތެރެއިން، ބައެއް މައިންބަފައިންނަށް، އެމީހުންގެ ދަރިންނަށް ނިސްބަތްކޮށް، ބުނަންނުވާ ޒާތުގެ ބަސްބަސް ބުނެވޭކަމެވެ. އެކުދިންނާއި ދޭތެރޭ ނުނިޔަތް ލެވޭ ކަމެވެ. މިސާލަކަށް "މިސޮރު އިސްލާހެއް ނުވާނޭ!" ނުވަތަ "މިކޮޔަކަށް ނޭނގޭނޭ!" ނުވަތަ "މިއީ ތަނަކު ހުރި މޮޔައެކޭ!" ފަދަ ބަސްބަސް ދަރިންނާ ދިމާލަށް ބުނެވެއެވެ. އެ ދަރިން ކަމެއް ކުރާނަމަ ނުވަތަ ކުރުމަށް އުޅޭނަމަ، މައިންބަފައިން ނުނިޔަތުން ޝައްކުގެ ހީ އެކުދިންގެ މައްޗަށް ކުރެވެއެވެ. މިސާލަކަށް "އެސޮރު ވެއްޓިދާނޭ" ނުވަތަ "އެކޮޔަކަށް ނުވާނޭ!" ނުވަތަ "ކުށެއް ކޮށްފާނޭ!" ފަދަ ހީކުރުންތައް މައިންބަފައިންނަށް ހީކުރެވެއެވެ.

އާދޭހެވެ! މިއީ ހަގީގަތުގައި ވަރަށްވެސް ގޯސް ކަމެކެވެ. ނޭނގިހުރެ މައިންބަފައިން، އެމީހުންގެ ދަރިންނަށް ދެވޭ އަނިޔާއެކެވެ. ގަބޫލުކުރާށެވެ! ދަރިން މި ދުނިޔެމަތީގާ އެންމެ ބޮޑު އިތުބާރެއް ކުރާނޭ ފަރާތަކީ އެ ދަރިންގެ މައިންބަފައިންނެވެ. އިހުމާލުވުމެއް ނެތި ބަލާ ބޮޑުކުރީތީއެވެ. އެފަދަ އިތުބާރަކާއި ލޮތްބެއްގެ ވެރި ދުލުން ދަރިންގެ އަގުވެއްޓޭ ނުވަތަ ދަރިންގެ "ކުރި މަރުވާ" ފަދަ ބަސްތައް ބުނުމަކީ އެއްވެސް ހާލެއްގައި ބަލައިގަނެވޭނޭ ކަމެއް ނޫނެވެ. އެފަދަ ކުށްހީ ނުވަތަ ނުނިޔަތުން ވިސްނުމަކީ އަމުދުން ރަނގަޅު ކަމެއް ނޫނެވެ.

މައިންބަފައިން މިފަދަ ބަސްތަކާ ހީތައް ކުރަނީ ކޮންމެހެން އެކުދިންނަށް ދެރައެއް އަދި ގެއްލުމެއްވެސް ވާން އެދިގެންނެއް ނޫނެވެ. ހިތުގައި ރުޅިވެރިކަމެއް ނަފްރަތެއް އޮއެގެންނެއްވެސް ނޫނެވެ. ކޮންމެ ނިޔަތެއްގައި ބުނި ނަމަވެސް، އެ ބުނެބޭ ބުނުމެއް ނުވަތަ ހީކުރެވޭ މިފަދަ ކަންކަމަކީ އޭގެ ސަބަބުން ދަރިންނަށް ގެއްލުން ކޮށްފާނޭ ކަމެކެވެ. ކުއްޖާއާއި ޤުދުރަތީ ގުޅުމެއް އުފެދިފައިވާ ކުއްޖާއާއި އެންމެ ގާތް މީހާ، ނުވަތަ މައިންބަފައިން ކުއްޖާއާއި ދިމާލަށް މިފަދަ ބަސްތައް ބުނުމާ ހީކުރެވުމުން އެކުއްޖާއަށް ހަގީގަތުގައި އެކަން ނިސްބަތް ވެދާނެއެވެ. 

ވިސްނާށެވެ! އިސްލާހެއް ނުވާނޭ ބުނެވި، އިސްލާވެއްޖެނަމަ ދެން ކުރާނީ ކީއްތޯއެވެ؟ ކަމެއް ނޫވާނޭ ބުނެވި، އެކަމެއް ނުވީއްޔާ ދެން ކުރާނީ ކީއްތޯއެވެ؟ ނުނިޔަތަކުން ކަސިޔާރު ހިޔާލަކުން ހިތަށް ވަހުމު ވަދެ އެ ވަހުމުން ވިސްނާ، އެކަމެއް އެހެން މެދުވެރިވުމުން ދެން ކުރާނީ ކީއްތޯއެވެ؟ ކުށެއް ކޮށްފާނޭ ހީކުރެވުމުން، ކުށެއް ކޮށްފިނަމަ ދެން ކުރާނީ ކީއްތޯއެވެ؟ ތަނަކުން ވެއްޓިދާނޭ ހީކުރެވި، އެތަނަކުން ވެއްޓިއްޖެ ނަމަ ދެން ކުރާނީ ކީއްތޯއެވެ؟ ފަހަރުގައި މައިންބަފައިންގެ ބަދުބަސް އެ ދަރިފުޅަކަށް އަމަޒުވީ ކަމުގައިވެސް ވެދާނެ ނޫންތޯއެވެ! މިއީ ވިސްނަން ޖެހޭ މުހިންމު ކަމެކެވެ.

މައިންބަފައިން ހީކުރަންވާނީ އަބަދުވެސް ދަރިންގެ ކުރިއެރުމަށެވެ. ނުނިޔަތުގައި ޝައްކު ކުރުމަކީ ކޮށްގެން ވާނޭ ކަމެއްނޫނެވެ. ކަސިޔާރުބަސްތައް އެކުދިންނަށް އަމާޒުކޮށްގެން ނުވާނެއެވެ. އެކުދިން ދެރަކޮށް ބަދުބަސް އެކުދިންނަށް ބުނެގެން ނުވާނެއެވެ. އެއީ މިއީ އެއަށްވުރެ މާތް އަދި ބާރުގަދަ ޤުދުރަތީ ގުޅުމެވެ. މައިވަންތަކަމަކީ އެހެން ހުރިހާ ގުޅުމަކަށްވުރެ އޭގެ ބާރުގަދަ، އޭގެ ލޯބި ބޮޑު، އޭގެ އަސަރު ފުން ގުޅުމެކެވެ.