އުރީދޫ މޯލްޑިވްސް އާއި މެޓަ ކުންފުނި ގުޅިގެން، ދުނިޔޭގެ އެންމެ ކުރިއަރާފައިވާ ސޯޝަލް މީޑިއާ ޕްލެޓްފޯމް ފޭސްބުކް މެދުވެރިކޮށް ރީޗާޖްކޮށް، އެޑް-އޮންސް ގަނެވޭނެ ޚިދުމަތެއް ތަޢާރަފުކޮށްފިއެވެ.

އުރީދޫ މޯލްޑިވްސްގެ ޗީފް ކޮމާޝަލް އޮފިސަރ ހުސައިން ނިޔާޒް ވިދާޅުވި ގޮތުގައި މެޓައާ ގުޅިގެން މި ޚިދުމަތް ތަޢާރަފުކުރުމުގެ ބޭނުމަކީ އެކުންފުނީގެ ރަސްމީ ޑިޖިޓަލް ޗެނަލްތަކުގެ އިތުރުން، އާންމު ބޭނުންތަކުގެ ޕްލެޓްފޯމްތައް މެދުވެރިކޮށް، ކަސްޓަމަރުންނަށް ފަސޭހަކަމާއެކު ޚިދުމަތް ހޯދޭނެ މަގު ފަހިކޮށްދިނުމެވެ. އަދި ފޭސްބުކަކީ ރާއްޖޭގެ އެންމެ ގިނަ މީހުން ބޭނުންކުރާ ސޯޝަލް މީޑިއާ ޕްލެޓްފޯމް ކަން ފާހަގަކުރައްވަމުން ނިޔާޒް އިތުރަށް ވިދާޅުވީ، މެޓަ ކުންފުންޏާ ގުޅިގެން މި އުފެދުނު ޕާޓްނަރޝިޕް އިތުރަށް ވަރުގަދަކޮށް، އީޖާދީ ހައްލުތަކާ އެކު އުރީދޫގެ ޚިދުމަތްތައް އިތުރަށް ފުޅާކޮށް، ކަސްޓަމަރުންގެ ޑިޖިޓަލް ތަޖުރިބާ އިތުރަށް ފުރިހަމަކުރެވިގެން ދާނެ ކަމުގައެވެ.

މީގެ އިތުރުން އުރީދޫ މޯލްޑިވްސް އިން ވަނީ ކަސްޓަމަރުންނަށް ހިލޭ ފޭސްބުކް ބޭނުންކުރެވޭ ވަރޝަންއެއް ވެސް ފަހިކޮށްދީފައެވެ. "ފޭސްބްކް ޓެކްސްޓް އޮންލީ" ވަރޝަންގެ އުރީދޫގެ ކަސްޓަމަރުންނަށް ޑޭޓާއާ ނުލައި ފޭސްބުކް އަދި ފޭސްބުކް މެސެންޖާގެ ބޭސިކް ވާރޝަން ހިލޭ ބޭނުންކުރެވޭނެއެވެ. އަދި މިއަދު ތަޢާރަފުކުރެވުނު އެޑް-އޮން ރިޗާޖް ޚިދުމަތާ އެކު ފޭސްބުކް ޕްލެޓްފޯމްގެ ތެރެއިން ރިޗާޖްކޮށް، "ޓެކްސްޓް އޮންލީ" ވަރޝަން އިން ފޭސްބުކް ގެ ފުރިހަމަ ވަރޝަންއަށް ބަދަލުކޮށް ވީޑިއޯ އާއި ފޮޓޯ ބަލައިލެވޭނެއެވެ.