އެސްޓީއޯ ޕީޕަލްސް ޗޮއިސް އިން ދިވެހިރާއްޖެ އެތެރެކޮށް ވިއްކާ ބުރޭންޑްތަކުގެ މުދާ ރާއްޖޭގެ އަތޮޅުތަކުގެ ރަށްރަށުގައި ވިއްކުމުގެ މަސައްކަތް ކޮށްދޭނެ އޭޖެންޓުން ޢައްޔަންކޮށް، އެފަރާތަކަށް ރަސްމީކޮށް އޭޖެންޓްކަމުގެ ލިޔުން ހަވާލު ކޮށްފިއެވެ.

އެސްޓީއޯ އިން މަޢުލޫމާތު ދިން ގޮތުގައި ޕީޕަލްސް ޗޮއިސް އޭޖެންޓް ތަޢާރަފުކުރުމުގެ މައިގަނޑު މަޤްޞަދަކީ އެސްޓީއޯ އިން އެތެރެކޮށް ވިއްކާ ބުރޭންޑްތަކުގެ މުދާ، ރާއްޖޭގެ ހުރިހާ ސަރަހައްދަކަށް ފަސޭހައިން ލިބޭނެ މަގު ފަހިކޮށްދިނުމެވެ. އަދި އަތޮޅުތަކުގައި ތިބި ކުދި އަދި މެދު ފަންތީގެ ވިޔަފާރިތައް ކުރިއެރުވުމެވެ. އޭޖެންޓުން ޢައްޔަންކުރުމަށް މިއަދު ބޭއްވި އިވެންޓްގައި 136 ފަރާތަކަށް ޕީޕަލްސް ޗޮއިސް އޭޖެންޓް ކަމުގެ ލިޔުން ހަވާލުކޮށްފައި ވެއެވެ.

އެސްޓީއޯ އިން ބުނި ގޮތުގައި ޕީޕަލްސް ޗޮއިސްގެ އޭޖެންޓަކަށް ވުމަށް ހުޅުވާލި ފުރުޞަތަށް ވަރަށް ބޮޑު ތަރުޙީބެއް ލިބިފައިވެއެވެ. އަދި މިހާރު ވެސް ރާއްޖޭގެ އެކި އަތޮޅުތަކުގެ ރަށްރަށުގައި އެސްޓީއޯ ސްޓޭޕަލް އޭޖެންޓް އަދި އެސްޓީއޯ ކޮންސްޓްރަކްޝަން އޭޖެންޓުން ތިބިއިރު މި ފަރާތްތަކަށް ވެސް އެސްޓީއޯ ޕީޕަލްޗޮއިސް މުދާ ވިއްކުމުގެ އެޖެންޓަކަށް ވެވިދާނެ ކަމަށް އެސްޓީއޯ އިން ބުންޏެވެ.