ރައްޓެހިންނާއި ރަހުމަތްތެރިންނަކީ އަހަރެމެންގެ ހަޔާތުގައި ވަރަަށްވެސް މުހިންމު ބައެކެވެ. ކަންކަން ހާސިލް ކުރުމާއި ކަންކަމުގައި ހިތްވަރު ލިބިގަތުމަށް ރައްޓެހި ރަހުމަތްތެރިން އަދާކުރަނީ ނުހަނު ބޭނުންތެރި މަސައްކަތެކެވެ. ތަނަކު، ކަމަކު، ބޮޑުކަމެއް ލައިގަނެފިނަމަ، ރައްޓެހި ރަހުމަތްތެރިންނަކީ އަޅާލާ އެހީތެރިވެދޭވެސް ބައެކެވެ. އެހެންކަމުން ރައްޓެހި ރަހުމަތްތެރިންނާއި އެކު އުފެދިފައިވަނީ ވަރަށް އާދަޔާހިލާފު ގުޅުމެކެވެ. މިގުޅުމުގައި އަހަރެމެން، ރައްޓެހި ރަހުމަތްތެރިންނަށް އެހީތެރިވެ، އެމީހުންނާއި އެއްކޮށް ސަމާސާކޮށް މަޖާކޮށް ހަދައެވެ.

ވަޒީފާތަކުގައި އުޅޭ ގިނަ ޒުވާނުން، އެމީހުންގެ ރައްޓެހި ރަހުމަތްތެރިންގެ މަހު މުސާރަ ޖަމާވުމުން، ކެއުންތަކާ ކޮފީތައް އިންތިޒާމުކޮށް ހިންގައެވެ. އެވެނި މިވެނި ދުވަހަކީ އެވެނި މިވެނި މީހަކު ކޮފީދީ، ނުވަތަ ކާންދޭން ޖެހޭ ދުވަހެވެ. ރައްޓެހި ރަހުމަތްތެރިންގެ ގުރޫޕުތައް، ހޮޓާ ރެސްޓޯރަންޓުފަދަ ތަންތަނަށް ގުރޫޕު ހަދައިގެން ކާން ދެއެވެ. މިފަދައިން، މަހު މުސާރަ ޖަމާވުމުން ކެއުންތަކާއި ކޮފީތަކަަށް ދިއުމަކީ ކޮންކަހަލަ ކަމެއް ހެއްޔެވެ؟

މިއީ ހަގީގަތުގައި ދެކޮޅަށް އިންސާފު ކުރެވޭނޭ މަޢުޞޫއެކެވެ. މިފަދައިން ކޮފީތަކާއި ކެއުންތަކަށް ދާ މީހުން ދެކޭނީ މިއީ ކުރުން ރަނގަޅު ކަމެއްގެ ގޮތުގައެވެ. ނަވެސް މިކަންކަން ނުކުރާ، މިކަންކަމާއި ދެކޮޅު މީހުން ދެކޭނީ މިއީ ކުރުން އެންމެ ރަނގަޅު ކަމެއް ނޫން ކަމުގައެވެ. ރަނގަޅުކަމަށް ގަބޫލުކުރާ މީހުން ގަބޫލުކުރާ ކަމަކީ މިއީ އެކުވެރިކަމާއި ރަހުމަތްތެރިކަން ބަދަހި ކުރުމަށް ލިބޭ ވަރަށްބޮޑު ފުރުސަތެއް ކަމުގައެވެ. އެހެނީ "ކަންތައް ބޮޑު" މި ދުނިޔޭގައި އެކަކު އަނެކަކާ ބައްދަލުވެ އެކުވެރިކަން އާލާކުރުމަށް ލިބެނީ ވަރަށްމަދު ފުރުސަތެއް ކަމުގައި ވުމެވެ. އެހެންކަމުން، ޖުމުލަކޮށް މަހަކު އެއްފަހަރު ނަމަވެސް ހުރިހާ އެކުވެރިން އެއްތާކުން ބައްދަލުވެލާ ވާހަކަ ދައްކާލާ، އެކުވެރިކަން ބަދަހިކޮށްލުމަކީ އެ ގުޅުންތައް ދެމިގެން ދިއުމަށް ވަރަށްވެސް ބޭނުންތެރިކަމެކެވެ. އެކަކު އަނެކަކުގެ ވާހަކަތައް ހިއްސާކޮށް ކަންކަމާއި މަޝްވަރާކޮށް ހެދުމަށް އެއީ ރަނުގެ ފުރުސަތެކެވެ. ކުރަން ހުރި ކަންކަމާއި ކުރަމުންދާ ކަންކަމުގައި ހިޔާލު ހޯދާ އެކަންކަން ހަރުދަނާކުރުމުގެ ވާހަކަ ދެއްކުމަކީ ރައްޓެހި ރަހުމަތްތެރިންނާއި އެކު ކުރެވޭ މުހިންމު ކަމެކެވެ. ހިޔާލު ބަދަލުކޮށް ތަނަވަސް މަޢިޞޫތަކަށް ވާހަކަ ދެއްކުމަކީ ރައްޓެހިންނާއި އެކު ކުރެވޭ ޝައުގުވެރި އަދި ބޮލާއި ހިތައް ހުއިކަން ގެނެސްދޭނޭ ކަމެކެވެ. މިއީ މިފަދަ ކޮފީތަކާއި ކެއުންތަކުގެ މުހިންމު މަގުޞަދުތަކެއްކަމަށް މިކަމަށް ތަރުހީބުދޭ ފަރާތްތަކުން ފާހަގަ ކުރެެއެވެ.

ކަން އޮތީ މިހެންނަމަވެސް މިކަމާއި ވިސްނުން ކަސިޔާރު މީހުން ފާހަގަ ކުރަނީ މިއީ ބޭކާރު ހަރަދުތަކެއް ހިނގާ ބޭކާރު ކަމެއް ގޮތުގައެވެ. ވަގުތާ ފައިސާ އިސްރާފު ކުރެވޭ "ފާފަ" އެއް ގޮތުގައެވެ. "ފާފަ" އެއް ކަމުގައި ބުނާ މީހުން ދެކޭ ގޮތުގައި ރައްޓެހި ރަހުމަތްތެރިން އެކުވެ، ގިނަފަހަރަށް ދެއްކޭނީ ބޭކާރު ވާހަކައެވެ. "ކެވޭނީ މީހެއްގެ މަހެވެ." ދެއްކޭނީ އަބަދުވެސް ކޮންމެވެސް ބައެއްގެ ނުވަތަ މީހެއްގެ ގޯސް ވާހަކައެވެ. ކިޔޭނީ ނުބައި އެއްޗެއްސާއި ހުތުރު ބަސްބަހެވެ. އެހެން މީހުންނަށް ފޮށުމާއި ހަނގާކުރުމާއި ގަނާކުރުމެވެ. އަގުބޮޑު ތަންތަނުން އަގުބޮޑެތި ކެއުންތައް ކައި ހަދަައެވެ. ބޮއެ އުޅެނީ މޮޅު، އެންމެ އަގުބޮޑު ކޮފީއެވެ. މިއީ ކުރެވޭ އިސްރާފެއްކެވެ. ފައިސާއިން ކުރެވޭ ބޭކާރު ހަރަދެކެވެ. މިއަށްވުރެ އެ ފައިސާއިން ކުރެވޭނޭ އެހެން މުހިންމު އެތައް ބޭނުމެއް ހުންނާނެއެވެ.

"މުސާރަ ލިބުނީއެވެ! ކެއުން އޮތީ ކޮން ދުވަހަކުން ހެއްޔެވެ؟" މިއީ ވަރަށް އާންމު މެސެޖެކެވެ. އާދޭހެވެ! މިކަމުގައި ހިޔާލު ވަރަށްވެސް ތަފާތެވެ. ތަފާތުވާނެއެވެ. ކަމުގައި ހެޔޮގޮތާއި ފައިދާހުރި ގޮތް ނިންމާނީ އެމީހަކު އަމިއްލަ އަށެވެ.