"ދެމެހެއްޓެނިވި މާދަމައަކަށް، މިންތީގެ ހަމަހަމަކަން މިއަދު" މިއީ މިހިނގާ 2022 ވަނަ އަހަރުގެ އަންހުންގެ ދުވަހުގެ ޝިއާރެވެ. އަންހެނުންގެ ދުވަހެއް ބައިނަލްއަގުވާމީ ފެންވަރެއްގައި ފާހަގަ ކުރެވެމުން ދަނީ މުޖުތަމައުގައި އަންހެނުންހެ ބާރުވެރިކަން އިތުރުކޮށް މިންތީގެ ތަފާތުކުރުންތައް ނައްތާލާ، އަންހެނުންނަށް ހިތްވަރު ދިނުމެވެ. ހޭލައިގަނެފައިވާ މިއަދުގެ މުޖުތަމައުގައި އަންހެނުންގެ ހައްގުތަކުގެ ވާހަކައާއި މިންތީގެ ހަމަހަމަކަމުގެ ވާހަކައަކީ ވަރަށް ގަދައަށް ދެކެވޭ ވާހަކައެކެވެ.

އާދޭހެވެ! ގައުމެއް ކުރިއަރާ ދިއުމުގައި އެ ގައުމެއްގެ އަންހެނުން އަދާކުރާ ދައުރަކީ ވަރަށްވެސް މުހިންމު ދައުރެކެވެ. ގައުމަށް އިހުލާސްތެރި ޖީލެއް ބިނާ ކުރުމުގައި އަންހެނުން އަދާކުރަނީ އޭގެ އަގު އަދާ ނުކުރެވޭ ފަދަ ބޮޑު ހިދުމަތެކެވެ. ގައުމުގެ އެކި ސިނާއަތްތަކުގައި އެކި ދަރަޖަ ދަރަޖައިން އަންހެނުން ކުރަނުން ދަނީ ގައުމީ ޖިހާދެކެވެ. އިޖްތިމާއީ، ސިއްހީ، އިގްތިޞާދީ އަދި ސިޔާސީ ދާއިރާގައި އަންހެނުން ކުރަމުން އެދަނީ އޭގެ އަޖުރު ބޮޑު މަސައްކަތްތަކެވެ. މިހުރިހާ ކަމަކީ އެ މީހުންގެ އިއްޒަތާއި ޝަރަފު މަތިވެރިވެގެންދާ ސަބަބުތެކެވެ. މި ސަބަބަކާއި ހުރެ އަންހެނުންގެ ޝަރަފުގައި އަންހެނުންގެ ދުވަހެއް ފާހަގަ ކުރެވެއެވެ. ބައިނަލްއަގުވާމީ ދުވަހެއްގެ ގޮތުގައި 8 މާރިޗް ފާހަގަ ކުރަމުން މި ދަނީ ބައިނަލްއަގުވާމީ އަންހެނުންގެ ދުވަހެވެ.

އިންސާނުންގެ ތެރޭގައި ތަފާތު އެކި ވިސްނުންތަކާއި ހިޔާލުތަކުގެ މީހުން އުޅެއެވެ. އަންހެނުންގެ ދުވަހުގެ މިއަހަރުގެ ޝިއާރަކީ "ދެމެހެއްޓެނިވި މާދަމާއަކަށް، މިންތީގެ ހަމަހަމަކަން މިއަދު" މިއެވެ. ނަމަވެސް މި ޝިއާރާ ކަސިޔާރު ވިސްނުމެއްގެ ބަޔަކުވެސް އުޅެއެވެ. މި މީހުން ބުނާގޮތުގައި މިންތީގެ ހަމަހަމަ ކަމަކީ ދުވަހަކުވެސް ގާއިމް ކުރެވޭނޭ ކަމެއް ނޫނެވެ. އަންހެނުންގެ ދުވަހެއް ފާހަގަ ކުރާއިރު މިފަދަ ވިސްނުމަކަށް ނަޒަރު ހިންގާލުމަކީވެސް އަމުދަކުން ގޯސް ކަމެއް ކަމުގައި އަޅުގަނޑު ނުދެކެމެވެ. އެމީހުން ގަބޫލު ކުރާގޮތުގައި ހަމަހަމަ ކަން ގާއިމް ކުރުމަކީ ދުވަހަކުވެސް ވާނޭ ކަމެއް ނޫނެވެ. ނަމަވެސް އިންސާފަކީ ގާއިމު ކުރެވިދާނޭ ކަމެކެވެ. އަދި ކުރަންވެސް ވާނޭ ކަމެކެވެ. މިބައިމީހުން މިކަމަށް އިޝާރާތްކޮށް ބައެއް މިސާލުތައް މީސް މީޑިޔާގައި ހިއްސާކޮށްފައި ހުރެއެވެ. އެގޮތުން އެފަދަ ބައެއް މިސާލުތައް ފާހަގަ ކޮށްލާނަމެވެ. އަންހެނާ ވިހެއުމާއި ގުޅިގެން އަނަހެނުންނަށް ލިބޭ 6 މަސްދުވަހުގެ މެޓާނިޓީ ލީވްގެ ވާހަކައެވެ. ކުއްޖާގެ ބައްޕައަށް ލިބޭ 1 މަސް ދުވަހުގެ ޕެޓާނިޓީ ލީވްގެ ވާހަކައެވެ. ކުއްޖާއަކީ އެ ކުއްޖާގެ މަންމަގެ އަދި ބައްޕަގެވެސް ކުއްޖެކެވެ. ހަމަހަމަ ކަމުގެ ވާހަކަ ދައްކާއިރު ޗުއްޓީ ދިނުމުގައި އެ ތަފާތު ކުރުން ގެންގުޅެނީ ކީއްވެތޯ ސުވާލު އުފައްދައެވެ. އެ ސުވާލުވެ ޖަވާބުގައި ޢިލްމީ ބޭބޭފުޅުން ދެއްވާ ޖަވާބުގެ ހުލާސާ އަކީ އެކަމުގައި އަންހެންމީހާ ތަފާތުވާނެތީއެވެ. އާދޭހެވެ! ތަފާތެވެ. އެހެންކަމުން ހަމަހަމަ ކުރާނީ ކިހިނަކުން ހެއްޔެވެ. ނަމަވެސް އެ ޗުއްޓީ އެ އޮތީ ކިހާ އިންސާފުންތޯއެވެ. އެހެންކަމުން ހަމަހަމަ ކުރުމުގެ ބަދަލުގައި ދައްކަންވީ އިސްސާފު ގާއިމުވާން ޖެހޭނޭ ވާހަކައެވެ. 

ބައިނަލްއަގުވާމީ އަންެހެނުންގެ ދުވަހަކީ ވަރަށް ކުލަގަދަކޮށް މުޅި ދުނިޔޭގާމެ ފާހަގަ ކުރާ ދުވަހެކެވެ. ނަމަވެސް އެ ދުވަހާއި އެއްވަރަށް ފިރިހެނުންގެ ދުވަހެއް ފާހަގަ ނުކުރާކަން އެބައިމީހުން ފާހަގަ ކުރެއެވެ. މި ތަފާތު މިގޮތަށް ގެންގުޅެނީ ކީއްވެތީ ސުވާލު އުފައްދައެވެ. އެ ސުވާލުގެ ޖަވާބުގައި ޢިލްމީ ބޭބޭފުޅުން ވިދާޅުވަނީ އެއީ އަންހެނުންގެ ދަރަޖަ މުޖުތަމައުތަކުގައި ދަށަށްގޮސްފައިވާތީ އަންހެނުންނާ ފިރިހެނުން ހަމަހަމަ ކުރުމަށެވެ. ރައްދުގައި މިބައިމީހުން ބުނަނީ ހަމަހަމަ ކުރަން، ތަފާތުކުރުން ގެންގުޅުން އެއީ ހަމަހަމަ ކަމުގެ މީޒާނުގައި ހަމައެއްތޯއެވެ. އޭގެ ބަދަލުގައި އިންސާފުގެ ވާހަކަ އިސްކުރާށެވެ. އާދޭހެވެ! މިއީ ހިޔާލުތަކެކެވެ. ތަފާތު ހިޔާލުތަކެވެ. މިކަމުގައި އަދިވެސް އެކި ގޮތްގޮތަށް ހިޔާލުތަފާތުވާނޭ މީހުން ތިބޭނެއެވެ.

އަންހެނުންގެ ދުވަހެެއް ފާހަގަކޮށް، އެދުވަހު، އަންހެންކަނބަލުންގެ އަގުވަޒަން ކުރުމަކީ ކުރުން ރަނގަޅު ކަމެކެވެ. އެމީހުން އެ ކުރާ ބުރަ މަސައްކަތްތަކުގެ އަގު ވަޒަންކުރުމަށް މިއީ މުނާސަބު ދުވަހެކެވެ. ދުވަސް ފާހަގަ ކުރުމުގައި އެއްވެސް ބައެއްގެ ޝަކުވާއެއް ނެތެވެ. ނަމަވެސް ހިޔާލު ތަފާތުވަނީ އަދުގެ ޝިއާރާއި ބެހޭގޮތުންނެވެ. ލިޔާލުތަފާތުވާ މީހުން ބުނާގޮތުގައި ޝިއާރުގައި އޮތް ހަމަހަަމަ މި ބަސް ބޭނުން ކުރުން އެކަށީގެން ނުވާ ކަމަށެވެ. ނަމަވެސް އެންމެ މުނާސަބު ބަހަކީ "އިންސާފު" މި ބަހެވެ. އިނގިރޭސި ބަހުންނަމަ "ޖަސްޓިސް" އެވެ.

އާދޭހެވެ! މި އުފާވެރި ދުވަހުގައި މި ދުވަސް ހާއްސަވެފައިވާ ހުރިހާ އަންހެންކަނބަލުންނަށް މި ދުވަހުގެ ހެޔޮއެދެމާއި ތަހުނިޔާ އަރިސްކުރަމެވެ. އަދި އެ ކަނބަލުން، އެކި ދަރަޖަ ދަރަޖައިން ގައުމަށްޓަކައި އެ ކޮށްދެއްވާ އަގުހުރި މަސައްކަތްތަކުގެ އަގު ވަޒަންކުރަމެވެ. މަސައްކަތުގެ މާހައުލާއި އިޖްތިމާއީ އުޅުމުގައި އަންހެނަކަށް ވީތީ އެ ކުރެވޭ މަލާމާތާއި ކުރެވޭ ފުރައްސާރައަކީ އެ ކަނބަލުންނަށް ވެވޭ ބޮޑު އަނިޔާއެކެވެ. އެއީވެސް އިންސާނުންނެވެ. ވިންދު ހުރި ހިތެއްގެ ވެރި ބައެކެވެ. އަދި ކިއެއް ފިރިހެނުންނަށްވުރެ އެ ހިތް "މަޑު" ވެގެންވެސް ވެއެވެ. އެހެންކަމުން އަންހެނުންނާއި މެދު އޯގާތެރިވާން ޖެހޭނެއެވެ. އެމީހުންގެ ހައްގުތައް، ރަނުން ރަނަށް އަދާކޮށްދޭން ވާނެއެވެ. އެމީހުންނަށް ލޯތްބާއި ހަމްދަރުދީ ދޭން ވާނެއެވެ. އެމީހުންގެ އަގު ވަޒަންކޮށް އެމީހުން ބަލައިގަންނަން ވާނެއެވެ. އަންހެނަކު ނުވާނަމަ އިންސާނީ ދަރިފަސްކޮޅު ދެމިގެން ދިއުމެއްވެސް ނުވާނެއެވެ. ކެރޭ ޤާބިލް ޖީލެއް ބިނާވެސް ނުވާނެއެވެ. އެހެންކަމުން ހުރިހާ އަންހެންކަނބަލުންނަށް ފަށްފަށުން މަރްޙަބާއާއި ޝުކުރު ދަންނަވަމެވެ. ބައިނަލްއަގުވާމީ އަންހެނުންގެ ދުވަހުގެ ތަހުނިޔާ އަރިސްކުރަމެވެ.