އެސްޓީއޯ ކޮންސްޓްރަކްޝަން ސޮލިއުޝަނުން ކުރިއަށް އޮތް ރަމަޟާން މަހާ ދިމާކޮށް "ނިޕޯން ޕެއިންޓް ރަމަޟާން ބާޒާރު 2022" ފަށައިފިއެވެ.
އަމީނީ މަގުގައި ހުންނަ އެސްޓީއޯ ކޮންސްޓްރަކްޝަން ވެއަރހައުސްގެ ޕެއިންޓް ޝޯ ރޫމްގައި ބޭއްވި ހަފްލާއެއްގައި މި ޕްރޮމޯޝަން އިފްތިތާހުކޮށް ދެއްވީ އެސްޓީއޯގެ ސީއީއޯ އަދި އެމްޑީ ހުސައިން އަމްރު އެވެ.
މިއަދުން ފެށިގެން އަންނަ އޭޕްރީލް މަހުގެ ނިޔަލަށް އެސްޓީއޯ ނިޕޯން ޝޯ ރޫމާއި އެސްޓީއޯ ހުޅުމާލޭ ފިހާރައިގައި ކުރިއަށްދާ ޕްރޮމޯޝަންގެ މުއްދަތުގައި އެ ފިހާރަތަކުން ކުލަ އާއި ދަވާދު ގަންނަ ފަރާތްތަކަށް 20 ޕަސެންޓާއި ހަމައަށް ޑިސްކައުންޓް ލިބިގެންދާނެ އެވެ.
މި ޕްރޮމޯޝަންގެ ދަށުން ކުރާ ކޮންމެ 1،000 ރުފިޔާގެ ވިޔަފާރިއަކަށް ޑިޖިޓަލް ކޫޕަނެއް ލިބޭއިރު، ގުރުއަތުން ހޮވޭ ފަރާތްތަކަށް އަގުހުރި އެތައް އިނާމެއް ކަނޑައެޅިފައިވެއެވެ.
އެގޮތުން، މިފަހަރުގެ ޕްރޮމޯޝަން ނިމުމުން ހޮވޭ އެންމެ ނަސީބުވެރި ފަރާތަކަށް ޝީޝާގެ ސްކޫޕީ ކުލަބް 12 ލިބިގެންދާނެ އެވެ.
އެސްޓީއޯ އިން އެތައް އަހަރެއް ކުރިން މާކެޓް ކުރަމުން އަންނަ ނިޕޯން ޕެއިންޓް އަކީ ރާއްޖޭގެ ގިނަ ބައެއްގެ އިތުބާރު ލިބި، މަގްބޫލްކަން ހޯދާފައިވާ ބްރޭންޑެކެވެ.