ހުޅުމާލޭ ފޭސް 2 ގައި އިމާރާތްކޮށްފައިވާ ހިޔާ ފްލެޓްތަކުގެ ދަރަނި އަދާކުރުމަށް އެހީވުމަށް ހާއްސަ ޓްރޭޑިންގ ޕެކޭޖެއް ތަޢާރަފްކުރަން ނިންމައިފި ކަމަށް ކިންގްސް ފޮރެކްސް ޓްރޭޑިންގ އިން ބުނެފިއެވެ.

މި ޕެކޭޖްތަކާ ގުޅޭ އިތުރު ތަފްޞީލް ކުރިއަށް އޮތް ހަފްތާގައި ހާމަކުރާނެ ކަމަށް ވެސް ކިންގްސް ފޮރެކްސް އިން ކުރި ޓުވީޓެއްގައި ވަނީ ހާމަކޮށްފައެވެ.

ކިންގްސް ފޮރެކްސް އަކީ ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީ އިސްކޮށް ހުންނަވައިގެން އުފައްދާފައިވާ "ކިންގްސް ކެޕިޓަލް ހޯލްޑިންގ" ކުންފުނިން އޮންލައިން ޓްރޭޑިންގ އަށް ހާއްސަކޮށް އުފައްދާފައިވާ ޕްލެޓްފޯމެކެވެ. އެ ކުންފުނިން ބުނާ ގޮތުގައި އެ ކުންފުނީގެ ފަންޑުގައި 2،000 އެއްހާ މީހުން ވަނީ އިންވެސްޓްކޮށްފައެވެ.

ކިންގްސް ފޮރެކްސްގައި އިންވެސްޓް ކޮށްފައިވާ ބައެއް މީހުންގެ ތެރޭގައި ދައުލަތުގެ ވަރަށް އިސް ބޭފުޅުން ވެސް ހިމެނެ އެވެ. އޭގެތެރޭގައި ރައްޔިތުންގެ މަޖިލީހުގެ ބައެއް މެމްބަރުންނާއި ސިޔާސީ އިސް ބޭފުޅުންނާއި ވިޔަފާރިވެރިން ވެސް ހިމެނެއެވެ.

މިހާތަނަށްއައިއިރު ކުލި ދެއްކުން ހަތް މަސް ދުވަހަށް ފަސްކޮށްދީފައިވާ ހިޔާ ފްލެޓްތަކުގެ ކުލި އަންނަ މަހުން ފެށިގެން ދައްކަން ޖެހޭނެ ކަމަށް އެޗްޑީސީން މިދިޔަ ހަފްތާގައި ބުނެފައިވާއިރު، ހިޔާ މަޝްރޫޢުގެ ދަށުން އިމާރާތްކުރި 6،720 ފްލެޓުގައި މިހާރު ގާތްގަނޑަކަށް 3،000 އެއްހާ އާއިލާ ދިރިއުޅެމުން ދެއެވެ. މި ފްލެޓުތަކުގެ ކުލީގެ ގޮތުގައި 25 އަހަރަށް ބަހާލައިގެން މަހަކު -/7،500ރ. އަދި ސާވިސް ފީގެ ގޮތުގައި -/1،000ރ. ދައްކަން ޖެހެއެވެ.