ދުނިޔޭގެ ތާރީޚުގައި ބޮޑެތި އެތައް ބަލިތަކަކާއި މި ދުނިޔެ ވަނީ ކުރިމަތިލާފައެވެ. އެ ބަލިތަކަކުން އަރައިގަތުމަށް އެތައް ބަޔަކު އެތައް މަސައްކަތްތަކެއް ވަނީ ކޮށްފައެވެ. އެފަދަ ބިރުވެރި އެއް ބައްޔަކީ ލެޕްރޮސީ ނުވަތަ ޖުޒާމް ބައްޔެވެ. މިއީ އިންސާނާގެ ސިފަ އައިބު ކުރުވާ އިންސާނާގެ އުޅުން ބަދަލު ކުރުވަނިވި ނުރައްކާތެރި ބައްޔެކެވެ. ޖުޒާމް ބަލި ޖެހެނީ "މައިކޯބެކްޓީރިއަން ލެޕްރޭ" ނަމަކަށް ކިޔާ ޖަރާސީމަކުންނެވެ. ޖުޒާމް ބައްޔަކީ ހަތަރެސްފައިގެ އިނގިލިތަކާއި އަތާއި ފައިގައިވާ ނާރުތަކަށް އަސަރު ކުރުވާ، ހަންގަނޑާއި މޫނުމަތީގެ ސިފައަށް އަސަރުކުރުވާ އަދި ނޭވާލައި ނިޒާމުގެ މަތީބަޔަށް ގެއްލުން ދެނިވި ބައްޔެކެވެ. މި ބަލީގެ ސަބަބުން ހަންގަނޑު ފާރުވުމުވާއި ނާރުތައް މަރުވުމާއި މަސްތަކުގެ ބާރު ދެރަވުން ފަދަ ކަންކަން ދިމާވެދާނެއެވެ. މިއީ ފަރުވާނުކުރެވިއްޖެނަމަ މުޅި އުމުރުދުވަހަށް ނުކުޅެދޭ މީހެއްގެ ގޮތުގައި އިންސާނާ ހުންނަން ޖެހިދާ ފަދަ ނުރައްކާތެރި އަދި ބިރުވެރި ބައްޔެކެވެ.
ދުނިޔޭގެ ތާރީޚުގައިވެސް އެންމެ ގިނަ ދުވަސްވީ މިފަދަ ބިރުވެރި އެއް ބައްޔަކީވެސް ޖުޒާމް ބައްޔެވެ. އީސާގެފާނުން ދުނިޔެއަށް ވަޑައިގަތުމުގެ 600 އަހަރު ކުރިންވެސް ޖުޒާމްބަލި ދުނިޔެއިން ފެނިފައިވާކަމަށް ތާރީޚު ޢިލްމުވެރިން ފާހަގަ ކުރައްވައެވެ.
ޖުޒާމް ބަލީގެ އަލާމާތްތަކުގެ ތެރޭގައި މަސްތަކުގެ ބާރު ދެރަވެ، ހަރަކާތް މަދުވުން ހިމެނެއެވެ. ނާރުތަކުގެ ބާރު ދެރަވެ، ހަތަރެސްފައިގެ އިހުސާސް ކުޑަވެ ހިއްސު ކެނޑިގެން ހިނގައިދާނެއެވެ. ގައިގެ ހަންގަނޑުގެ އެކި ހިސާބުތަކުގައި ދަދު ޒާތު ނިޝާންތަކެއް ފެންނަން ހުރެދާނެއެވެ. ދިވެހި ރާއްޖެއިން ނައްތާލެވިފައިވާ ބައްޔެއްކަމުގައި ޖުޒާމްބަލި ކަނޑައެޅިފައި ވީނަމަވެސް، މަދު މަދުން މި ބަލި ޖެހިފައިވާ މީހުން ރާއްޖެއިން ފެނެއެވެ. އެހެންކަމުން މިފަދަ އަލާމާތްތަކަށް ކޮންމެ މީހަކުވެސް ފަރުވާތެރިވެ ސަމާލުކަން ދޭން ވާނެއެވެ. އިސްވެ ބުނެވުނުފަދައިން ހަތަރެސްފައިގެ އިހުސާސް ކުޑަވުމުގެ ސަބަބުން، ލިބޭ އަނިޔާތަކުގައި ތަދުގެ އިހުސާސް ނުކުރެވޭނެއެވެ. ނަތީޖާއަކަށް ވަނީ ހަތަރެސްފައިގައި ފާރުގަނޑު ހެދުމާއި އަނިޔާވާކަން ނޭނގި ބޮޑެތި ގެއްލުންތައް ލިބުމެވެ. މަސްތަކުގެ ބާރު ދެރަވުމުގެ ސަބަބުން މޫނުމަތީގެ ސިފަ އައިބުވާ ގޮތް ވެއެވެ. ނާރުތަކުގެ ހިއްސު ކެނޑި ހަރުވެ ދުޅަވާ ގޮތްވުމުން އަތާއި މޫނުގައި "ގޮށް" ލާފައި ހުރެދާނެއެވެ. މޫނު މަތީގެ ސިފަ ބަދަލުވުމުގައި ބުމަ ފޭބުމާއި ނޭފަތު ކަށިގަނޑު "ކައްސާލައިގެން" ދިއުން ފަދަ ކަންކަން ދިމައިވެއެވެ.
ޖުޒާމް ބަލީގެ އެކި އެކި ގިންތިތައް ހުންނަ އިރު، މި ބަލީގެ އެންމެ ނުރައްކާތެރި ގިންތީގެ މީހުން ދުނިޔެއިން ފެންނަ މިންވަރު ވަރަށްވެސް މަދެވެ. މިއީ ހަގީގަތުގައި މާތް ﷲ ގެ އިރާދަފުޅާއި އެކު، ވެކްސިނުގެ ސަބަބުން ދުނިޔެ ހޯދާފައިވާ ކުރިއެރުމެކެވެ. ކުއްޖާ އެންމެ ކުޑައިރު ޖަހާ ވެކްސިން ތަކުގައި ހުންނަ ބީ.ސީ.ޖީ ވެކްސިނަކީ މި ބަލިން ރައްކާތެރިކޮށްދޭ ވެކްސިނެކެވެ.
ދުނިޔެ ފަންނިއްޔާތުގައި ހޯދާފައިވާ ކުރިއެރުމާއި އެކު ޖުޒާމް ބައްޔަކީ މިއަދު ފަރުވާ ކުރެވޭ ބައްޔެކެވެ. އަދި ފެތުރުންވެސް ކޮންޓްރޯލް ކުރެވިފައިވާ ބައްޔެކެވެ. ގައިން ގަޔަށް ފަސޭހަކަމާއި ހަލުއި ކަމާއި އެކު ފެތުރޭ މި ބަލި މިއަދު ކޮންޓްރޯލް ކުރެވިފައި ވަނީ ސިއްހީ ދާއިރާއިން ފަންނިއްޔާތު ކުރިއަރާ އިންސާނުން ތަހުޒީބުވަމުން އައި ގޮތުންނެވެ. މިއަދު ޖުޒާމް ބަލި ޖެހިފައިވާ މީހުންނަށް ދޭ ބޭހެއްގެ ސަބަބުން އެހެން މީހުންގެ ގަޔަށް އެ ބަލި ފޯރުމުގެ އިންސައްތަ، 99.9 އިންސައްތަ އަށް ދަށްކޮށްދެއެވެ. މިއީ މި ބަލި ޖެހޭ މީހަކު، މުޖުތަމައުން ބާކީކޮށް "ވަލުތެރެއަށް" ލާ އެކަހެރިކޮށް ނިކަމެތި ހާލުން ދުރުކޮށްދޭ އުފެއްދުމެކެވެ. އެހެންކަމުން މިއަދު މި ބައްޔާއި މެދު މާބޮޑަށް ބިރުގަނެ، ކަންބޮޑުވެ އަދި މި ބައްޔާ ބެހޭ މައުލޫމާތު ހާމަ ކުރަން ފަސްޖެހުމަކީ އެއްވެސް ހާލެއްގައި ރަނގަޅު ގޮތެއް ނޫނެވެ.
މި ބަލިން ރައްކާތެރި ވުމަށް ވެކްސިން ޖެހުމަކީ މުހިންމު ކަމެކެވެ. ރާއްޖެއިން ނެތި ގޮސްފައިވާ މި ބަލި އަނެއްކާ ރާއްޖެއިން ފެނުމުގެ ފުރުސަތު ނުދެއްވާށެވެ. މިއީ ބިރުވެރިކަމުގެ އިންޒާރެއް ދިނުމުގެ ލިޔުމެއް ނޫނެވެ. އެތައް ބަޔަކު މި ރާއްޖެއިން ނެތިކޮށްލި ނުރައްކާތެރި ބައްޔެއްގެ ހަނދާން އައު ކޮށްލުމެކެވެ. މިއީ ކިހިނެއްވާ، އަދި ކޮން ބައްޔެއްކަން ބުނެދިނުމަށް ލިޔުނު ލިޔުމެކެވެ.