ދަރިންނަކީ މާތް ﷲ އިންސާނުންނަށް ދެއްވާ ވަރަށްވެސް އަގުބޮޑު ނިޢުމަތެކެވެ. އެއީ އެ އިލާހުގެ އަމާނާތެކެވެ. އެކަން ކޮންމެ އިންސާނަކުވެސް ދަންނާނެއެވެ. ދަނެ ގަބޫލުވެސް ކުރާނެއެވެ. އެއްވެސް އިންސާނަކަށް ނުއުފުލޭވަރުގެ ބުރައެއްވެސް އެއްވެސް އިންސާނަކަށް ނުޖައްސަވާނެއެވެ. ކަން އޮތީ މިހެންނެވެ. ނަމަވެސް ފަގީރުކަން ބޮޑުވެ އަތްމަތި ދަތިވެ ހަދާނޭ ގޮތް ހުސްވާ ހިސާބުން، ދަރިންނަށް އިހުމާލުވެވޭތަން އެބަ އާދެއެވެ. ނަމަވެސް އެއީ ގޯހެކެވެ. މިއީ އެފަދަ އަންހެނެއްގެ ވާހަކައެވެ. އިންޑިޔާގެ އަވަށަކަށް ނިސްބަތްވާ އުމުރުން 46 އަހަރުގެ އަންހެނެއްގެ ވާހަކައެވެ.

އޭނާގެ އުމުރުން 46 އަހަރު ވީ އިރު 6 ދަރިން ދުނިޔޭގައި ހުއްޓެވެ. ފިރިމީހާއަކީ މަސްތުވާ ތަކެތީގެ އަވައިގައި ޖެހި ހަލާކުވެފައިވާ މީހެކެވެ. އާމްދަނީ ހޯދަން ބައިސްކަލު ފަދަ ތަކެތި މަރާމާތުކޮށްދީ އުޅެއެވެ. އެ އަންހެނާގެ އެންމެ ހަގު ދަރިފުޅުގެ އުމުރުން އަދި ވީ އެއް އަހަރެވެ. ފަގީރުކަމުގައި ދުވަސްތައް ހޭދަކުރުމާއެކު އެ ކުއްޖާގެ ހާޖަތްތައް ފުއްދާ ދެން ތިބި ދަރީންގެ ހާޖަތްތައް ފުއްދާ ދެމަފިރިންގެ ހާޖަތްތައް ފުއްދާނޭ ތަނަވަސްކަމެއް އަމުދަކުން ނެތެވެ. އުޅޭ ގޭގައި ކަރަންޓެއް ނުހުރެއެވެ. ބޯނޭ ސާފު ފެން އެހާމެ މަދެވެ. ކާނޭ އެއްޗެއް މާ ގިނައަކުން ނުހުރެއެވެ. ލާނޭ އަންނައުނެއް، ދެތިން ހެދުން ނޫނީ ނެތެވެ.

ފަގީރު ކަމުގައި އުޅެމުން ދަނިކޮށް، 6 ވަނަ ކުއްޖާ ލިބުން ވެގެން ދިޔައީ އެ ފަގީރުކަމުގައި އެ ދެމަފިރިންނަށް ނުތަވަނަސްކަން އިތުރު ކުރުވި ކަމަކަށެވެ. ނަމަވެސް ދަރިއެއް ކަމުން ބަލާ ލޯބިން އޯގާތެރިކަމާއި އެކު ގެންގުޅުނީއެވެ. އެ ދަރިފުޅަށް އަހަރެއް ވެގެން ދިޔައިރު، ފަގީރުކަން ދިޔައީ ކުރިއަށްވުރެ ބޮޑުވަމުންނެވެ. އެކަމުގައި ދެމަފިރިންގެ ނުތަނަވަސްކަން އިންތިހާއަށް ދިޔައީ އިތުރުވަމުންނެވެ. އެކަމުގައި ދެމަފިރިން ވާހަކަތަކެއް ދައްކާ މަޝްވަރާތަކެއް ކުރިއެވެ.

އެތައް ދުވަހެއްގެ ކަންބޮޑުވުމާއި މަޝްވަރާގެ ތެރެއިން އެ ދެމަފިރިން ނިންމީ ވަރަށްވެސް ނުބައި ނިންމުމެކެވެ. އެމީހުންގެ އެންމެ ހަގު ދަރިފުޅު އެއްލާލާށެވެ. އެގޮތުން އެއް ދުވަހެއްގެ މެންދުރު ވަގުތު، ގޯންޏެއްގެ ތެރެއަށް އެ ކުއްޖާ ލުމަށްފަހު، ކޯރެއްގެ ކައިރީގައި ހުރި ކުނިތަކެއްގެ ތެރެއަށް އެއްލާލިއެވެ. އެތަނުން އެނބުރި، އެމީހުން އުޅޭ ގެއާއި ދިމާލަށް މިސްރާބު ޖެހި ހިރު، ކަޅު ދުންތަކެއް އަރާތީ އެ ދެމަފިރިންނަށް ފެނުނެވެ. ނަމަވެސް މާ ބޮޑު ކަމަކަށް ނުހަދާ މަޑުމަޑުން ސިއްރު ސިއްރުން ހިނގަމުން ދަނިކޮށް، އެ އަވަށުގެ ބަޔަކު ހަޅޭ ލަވަމުން ދާތީ ފެނުނެވެ. އެ ދެމަފިރިންވެސް ބާރުލައި ދުވެފައި އެ ދިމާއަށް ދިޔައެވެ. އެ ދެމަފިރިން އުޅެމުން އައި ގެގަނޑުގަައި އަލިފާން ރޯވެ އަނދަނީއެވެ.

އެހިސާބުން އަލިފާން ގަނޑު ނިވުމަށްވުރެ ބޮޑަށް އެމީހުންގެ އަނެއް 5 ދަރިން ހޯދުމައިގެން ދެމަފިރިން ތެޅިގަތެވެ. ކަން ދިމައި ކުރި ގޮތުން 3 ދަރިން ހުރީ ސަލާމަތުންނެވެ. އަނެއް ދެދަރިން ވީ ތަނެއް ނޭނގުނެވެ. ދެމަފިރިންނަށް ބާރަށް ރޮވުނެވެ. އަލިފާންގަނޑު ނިވާ ހޫނުކަން މަޑުވުމުން، އެންމެ ފުރަތަމަވެސް އެތެރެއަށް ދުއްވައިގަތީ އެ ކުދިންގެ މަންމައެވެ. ފެނުނީ އަދާ ފިހިފައިވާ ދެ ދަރިންގެ މަސްގަނޑެވެ. ކާކުކަން އެނގެނީ ކިރިޔާއެވެ. ހުރި ހިތާމައެއްގެ ބޮޑުކަމާއެވެ.

އެ ސަރަހައްދުގައި ރޮއުމާއި ކެކުޅުމުގައި އެ ދެމަފިރިންނާ ދެން ތިބި ކުދިން ތިއްބާ، ކުއްލިއަކަށް އެތަނަށް ގެނެވުނީ އެ ދެމަފިރިން އެއްލާލި ކުއްޖާގެ ފުރާނަ ނެތް މަސްގަނޑެވެ. އެ ކުއްޖާއަށް އޮތީ ވަލު ޖަނަވާރެއްގެ އަނިޔާ އަމާޒުވެފައެވެ. ހިތާމައިގެ ކޮޅެއްވެސް ނެތެވެ. ދުނިޔޭގެ ޒީނަތެއްކަމުގައި ވި މުދަލާއި ދަރީންވެސް ގެއްލުނީއެވެ. ފަގީރުކަން ބޮޑުވެ ކެތް ނުވެދާނޭ ހިތާ 6 ދަރިން ކުރެ އެއް ދަރި އެއްލާލީއެވެ. އޭގެ ބަދަލުގައި އަތުގައި ހުރި ހުރިހާ މުދަލަކާއި ފައިސާކޮޅާއި އިތުރު ދެ ދަރިން ވަކިވެގެން ދިޔައީއެވެ. 

މިއީ ވިސްނުމެއް ކިރިޔާވެސް އިސްކޮަށްފި މީހަކަށް އެތައް ފިލާވަޅެއް ލިބޭނޭ ހާދިސާއެކެވެ. ފަގީރުވެދާނެތީ ދަރިން ދޫކޮށްލުން ނުވަތަ މެރުމުގެ ނުބައިކަން ހާމަވެއެވެ. އަދި އާއިލާ ރޭވުމުވާއި ހަޔާތުގެ ބައިވެރިއަކަށް ރަނގަޅު ބައިވެރިއަކު އިހްތިޔާރު ކުރުން ކިތަންމެހާވެސް ބޭނުންތެރިއެވެ.