އިންޓަރނެޓަކީ މިޒަމާނުގެ ދިރިއުޅުމުގައި ވަރަށް މުހިންމު އެއްޗެއް ކަމަށާ ނަމަވެސް އޭގެ ބޭނުން ނަހަމަ ގޮތުގައި ހިފާ މީހުން އުޅޭކަން ފާހަގަ ކުރަމުން، އިންޓަރނެޓްގެ ބޭނުން ހެޔޮ ގޮތުގައި ހިފުމަށް ގޮވާލައިފިއެވެ.

މިއަދު ގެ ހުކުރު ޚުޠުބާގައި މިކަމަށް އަލިއަޅުވާލަމުން ފާހަގަ ކުރި ގޮތުގައި ކުޑަކުދިންގެ ތަރުބިއްޔަތަކީ އެއާއި މެދު ބެލެނިވެރިންނާއި ސުވާލު ކުރެވޭނެ ކަމެކެވެ. އެހެންކަމުން ދަރިންނަށް އިންޓަރނެޓް ހެޔޮގޮތުގައި ބޭނުން ކުރަން ދަސްކޮށްދީ އެކަމުގައި އޮންނަ އެންމެ ރައްކާތެރި އަދި ހެޔޮގޮތް ކިޔާދިނުމަކީ ބެލެނިވެރިންގެ ޒިންމާއެއް ކަމާއި، ނުދަންނަ މީހުންނާ މަގުމަތިން ވާހަކަ ނުދައްކަން އަންގާ އުސޫލުން އިންޓަރނެޓް މެދުވެރިކޮށްވެސް އެފަދަ ކަންކަން ނުކުރުމަށް ދަރިންނަށް ނަސޭހަތްތެރިވާން ވާނެ ކަމަށް ޚުޠުބާގައި ފާހަގަ ކުރިއެވެ.

ފާޙިޝްކަންކަމަށް ކުދިން ހައްލަން މަސައްކަތް ކުރާ މީހުން އުޅޭ ފަދައިން އިސްލާމް ދީނާއި މެދު ޝައްކު އުފައްދާ، ކުޑަކުދިންގެ ހިތްތަކުގައި އިސްލާމް ދީނާއި މެދު ނަފްރަތު އުފައްދާ ބަޔަކު އުޅޭކަމުން އެކަމަށް ބެލެނިވެރިން ފާރަވެރި ވުމަށް ވެސް މިއަދުގެ ޚުޠުބާގައި ގޮވާލިއެވެ. އަދި އެންމެ ރައްކާތެރި ގޮތުގައި އިންޓަރނެޓްގެ ބޭނުން ކުރާނެ ގޮތްތައް ސުކޫލުގެ މުދައްރިސުންގެ ފަރާތުންވެސް ދަރުވަރުންނަށް ކިޔާދިނުމަށް ވަނީ ވަނީ ގޮވާލާފައެވެ.