އަބަދުވެސް އިންސާނާ އަގުވަޒަން ކުރާނޭ ބަޔަކު އުޅޭއެވެ. ހަމަ އެ އިންސާނާގެ އަގެއް ނެތްކަން ސާބިތުކޮށްދޭ މީހުންވެސް އުޅޭނެއެވެ. އެއީ ދުނިޔޭގެ އާދައެކެވެ. މިއީ އެފަދަ އިބުރަތެއް ލިއްބައިދޭ ހާދިސާއެކެވެ. މާނަ ފުން ފިލާވަޅެއް ދަސްކޮށްދިން ހާދިސާއެކެވެ. މިއީ މީސްމީޑިޔާގައި މީހަކު ހިއްސާކޮށްފައިވާ ހަގީގީ ހާދިސާއެކެވެ.

މުސްކުޅި ބައްޕައަކު، ބަލިވެ، ބަލި އެނދުގައި އޮތް ދުވަހެކެވެ. އޭނާގެ ދަރިން ތެރެއިން އެ ވަގުތު އޭނާގެ ކައިރީގައި ހުރީ އޭނާގެ ފިރިހެން ދަރިއެކެވެ. އެއީ އަބަދުވެސް އެ ބައްޕަގެ ކަންކަމުގައި އެންމެ އެހީތެރިވެދޭ، އެންމެ އޯގާތެެރި އެއް ދަރިފުޅެވެ. އެ ބައްޕަގެ އަތުގައި އަޅާފައި އޮތް އަތުކުރި ގަޑިއެއް އޮތެވެ. ބަލާ ބެލުމަށްވެސް އެއީ ވަރަށް ދުވަސްވެފައިވާ މުސްކުޅި ގަޑިއެެއްކަން އިނގެއެވެ.

ބަލި އެނދުގައި އޮވެ، އެ ބައްޕަ އޭނާގެ އަތުގައި އަޅާފައި އޮތް އަތުކުރި ގަޑި ބޭލިއެވެ. އަދި އެ ގަޑި އޭނާގެ ދަރިފުޅަށް ދިނެވެ. އެއަށްފަހު އެ ގަޑީގެ ހަގީގަތް އެ ބައްޕަ ކިޔައިދިނެވެ. އެއީ އެ ބައްޕަގެ ކާފަ، އެ ދަރިފުޅުގެ މުނި ކާފަ ގެންގުޅު ގަޑިއެކެވެ. މުނި ކާފަ މަރުވުމުގެ ކުރިން ކާފައަށް ދިނެވެ. އަދި ކާފަ މަރުވުމުގެ ކުރިން ބައްޕައަށް ދިނެވެ. އެހެންކަމުން އެ ގަޑީގެ އުމުރަކީ ގާތްގަނޑަކަށް 2 ގަރުނު ކަމުގައި އެ ބައްޕަ ބުންޏެވެ. އަދި މިއަދު ތިފަދަ، ތި ބާވަތުގެ އެއްވެސް އަތުކުރި ގަޑިއެއް މިހާރު ނުހުންނާނޭ ކަމަށްވެސް ބުންޏެވެ. މިއީ މި ގަޑީގެ ހަގީގަތެވެ.

ދެން އެ ބައްޕަ އެދުނީ އެ ދަރިފުޅުގެ ކިބައިން ކަމަކުއެވެ. އެއީ އެ ގަޑި ހިފައިގެން ތަފާތު ތިން ފިހާރައަކަށް ގޮސް، އެ ގަޑި ގަންނާނޭ އަގެއް އެމީހުން ކުރެ އެހުމަށެވެ. ފުރަތަމަ ދާން ބުނީ އާދައިގެ ކަންމަތީ ފިހާރައަކަށެވެ. ދެން އެދުނީ ބޮޑު ވިޔަފާރި ސެންޓަރަކަށް ދިއުމަށެވެ. އެންމެ ފަހުން ދާން އެދުނީ އަސާރީ އެއްޗެހި ވިއްކަން ހުންނަ ދާރުލް އަަސާރެއް ފަދަ ފިހާރައަކަށް ދިއުމަށެވެ. ދެން އެ ދަރިފުޅު، އެ ފިހާރަތަކަށް ދިޔައެވެ. އެންމެ ފުރަތަމަ ފިހާރައިން ބުނީ 50 ޑޮލަރެވެ. ދެން ދިޔަ ފިހާރައިން ބުނީ 150 ޑޮލަރެވެ. ދެން ދިޔަ އާސާރީ ތަކެތި ވިއްކާ ފިހާރައިން ބުނީ 5000 ޑޮލަރެވެ.

އެއީ ހަމަ އެއް ގަޑިއެކެވެ. އެގަޑިއަށް އެކި ތަންތަނުން ކީ ތަފާތު ތިން އަގެވެ. ކޮންމެ ތަނަކުންވެސް އެ ގަޑީގެ އަގު ވަޒަންކުރި މިންވަރެވެ. އެ ގަޑީގެ ހަގީގަތް އެނގޭ، އޭގެ އަގުވަޒަންކުރަން ދަންނަ ފިހާރައިން އޭގެ އަގުވަޒަން ކުރީ، އެހެން ފިހާރަތަކަަށް ވުރެ އެތައް އެތައް ގުނައެއް ބޮޑުކޮށެވެ. މި އަގުތަކުގެ ހަބަރު ހިފައިގެން ދަރިފުޅު ބައްޕަގެ ގާތަށް ގޮސް އެވާހަކަތައް އެގޮތަށް ކިޔައިދިނެވެ. އެއާއެކު އެ ބައްޕަ، އެ ދަރިފުޅަށް ދިނީ ވަރަށް އަގުހުރި ނަސޭހަތެކެވެ.

ބަޔަކު މީހުން ތިމާގެ އަގު ވަޒަން ނުކުރުމަކީ ތިމާގެ އުނިކަމެއް ނޫނެވެ. އަދި އެއީ ތިމާގެ ދެރަ ނިކަމެތިކަމަކުން ވާ ގޮތެއްވެސް ނޫނެވެ. އެމީހުންނާއި ތިބާ ނުގުޅެނީއެވެ. އެމީހުންނަށް ތިބާގެ އަގުވަޒަން ކުރަން ނޭނގެނީއެވެ. ތިބާގެ ހަގީގަތާއި ތިބާގެ ހުނަރާއި ޤާބިލުކަން ނޭނގެނީއެވެ. އެފަދަ ހާލެއްގައި ދެރަވެ މާޔޫސްވުމެއް ނެތެވެ. ތިބާގެ އަގު ވަޒަންކުރާނޭ ބަޔަކު އުޅޭނެއެވެ. ތިބާ ވާން ޖެހޭނީ އެމީހުންނާއި އެކުގައެވެ. އެއީ ކޮންބައެއްތޯ ހޯދާށެވެ. ބާއްޖަވެރިކަން އޮތީ ތިބާގެ އަގުވަޒަންކުރާ މީހުންނާއި އެކީގައި އުޅިގެންނެވެ.

މިއީ މިއަދު އަހަރެމެންވެސް ވިސްނަން ޖެހޭ ޢިބްރަތްތެރި ވާހަކައެވެ. ހާދިސާއެވެ. އެކަމަކުން އިބްރަތް ލިބިގަންނަންޖެހޭ "މޮޅު" ހާދިސާއެކެވެ.