އަންހެނުންގެ ބަސް އެހުމާއި އެމީހުންގެ ބަސް ގަބޫލުކުރުމަކީ ކަންކަމުގައި ގޮތް ނިންމުގައި ކުރަންޖެހޭނޭ ކަމެކެވެ. އެއީވެސް އިންސާނުންގެ ތެރޭގައި ވިސްނުމާއި ބުއްދި، ފިރިހެނުންނެކޭ އެއްފަދައިން ދެއްވާފައިވާ ބައެކެވެ. ނަމަވެސް އަންހެނެއްގެ ބަސް އަހައިފިނަމަ އެއްލާރި ދާން އޮތް ތަނަކަށް ދެލާރި ދާނޭ ބުނާ ބަހަކީ ޒަމާނުއްސުރެ ދިވެހިންގެ ތެރޭގައި ދައްކާ އުޅޭ ވާހަކައެކެވެ. މިހެން މި ބުނެވެނީ ނުވަތަ މި ވާހަަކަ ޒަމާނުއްސުރެ މިގޮތަށް ދެކެވެނީ ކީއްވެތޯ ބަލައިލާނަމެވެ.

އަންހެނެއްގެ ބަސް އަހައިފިނަމަ އެއްލާރި ދާން އޮތް ތާކަށް ދެލާރި ދާނޭ ބުނެވެނީ ދުނިޔޭގެ ވަރަށް ކުރީ ޒަމާނެއްގައި އުޅުނު ރަސްކަލެއްގެ ހަޔާތުން، ތާރީޚުގައި ލިޔެވި ދެކެވެމުންދާ ވާހަކައަކާއި ގުޅިގެންނެވެ. އެއީ ޝަހަރެއްގެ ރަސްގެފާނެކެވެ. ގިނަ ބަޔަކު ދަންނަ މަޝްހޫރު ރަސްގެފާނެކެވެ. އެ ރަސްގެފާނުން އެއް ދުވަހަކު ދުވާލުގެ ވަގުތުގައި ގޭގެ މަތީބުރިން، ބޭރަށް ނުކުމެ ހުންނެވިއެވެ. ރަސްގެފާނުންގެ އަނބިކަނބުލޭގެއާއި އެކުގައެވެ. އެހެން ނުކުމެ ތިބި ތިބުމުގައި މަގުމަތިން މަސްތަކެއް ހިފައިގެންދާ މީހަކުފެނުނެވެ. ދެން ރަސްގެފާނާއި އޭނާގެ އަނބިކަނބަލުން ނިންމީ އެތަނުން މަހެއް ގަނެ، ރޭގަނޑު ކައްކައިގެން ކާށެވެ. ދެން އެމީހަކަށް ގޮވާ ގެނެސް މަހެއް ގަނެ، އެމީހާގެ ނިކަމެތިކަމާއި ފަގީރުކަން ފެނި 1000 ދީނާރު ދިނެވެ. ދެން އެނބުރި ގެއާ ދިމާލަށް ހިނގައިގަތްތަނުން ކައިރީގައި ހުރި އަނބިކަނބުލޭގެ މާ ނުގޮތަށް ރަސްގެފާނުން ކުރެން، އެމީހާއަށް ތިހާ ގިނައިން ދިނީމާ ބޮޑާވާނޭ ބުންޏެވެ. ދެން ރަސްގެފާނުން ކިހިނެއްތޯ ހަދާނީ އެހުމުން، އެމީހާ އަތުން އެއްބައި އަތުލަން ހިނގާށޭ ބުންޏެވެ. އަތުލާނީ ވަކި ކިހިނަކުންތޯ ރަސްގެފާނުން އެހުމުން، އަތުލެވޭނޭ ގޮތެއް އެބަ އޮތޭ އަނބިކަނބަލުން ބުނެފިއެވެ. ދެން އެއީ ކޮން ގޮތެއްތޯ އެހުމުން، އަނބިކަނބަލުން ބުނީ އޭނާ ދިނީ ކޮން ޖިންސެއްގެ މަހެއްތޯ އަހާނީއެވެ. ދެން އޭނާ ދޭ ޖަވާބަކުން، އަހަރެމެން ބޭނުންވަނީ އޭގެ އިދިކޮޅު ޖިންސުކަމަށް ބުނެ، އެއްބައި އަތުލާނީއެވެ. އެ ހިޔާލަށް ރަސްގެފާނު ތާއީދުކޮށް އަނެއްކާ އެއްކަލަ ކަލޭގެއަށް ގޮވާ ގެނެސްފިއެވެ. ދެން އެއީ ކޮން ޖިންސެއްގެ މަހެއްތޯ އެހުމުން ޖަވާބުގައި އެމީހަކު ބުނީ އެއީ ހުންސާ މަހެއް ކަމަށެވެ. ހުންސާ އަކީ ވަކި ޖިންސެއް ނުވާ ދެ ޖިންސު މަސްހުނިވުމުން ކިޔާ ނަމެކެވެ. ދެން ރަސްގެފާނާ އޭނާގެ އަނބިކަނބަލުން ހައިރާންވެފާ ހުއްޓެވެ. އޭނާގެ ޖަވާބު ފުރިހަމަކަމުން ރަސްގެފާނު އޭނާއަށް ސާބަސް ދެއްވިއެވެ.

އެ ޒަމާނުގައި ރަސްކަމުގެ ނިޒާމު އޮންނަ ގޮތުން، ރަސްގެފާނުން ސާބަސްދެއްވައިފި މީހަކަށް 1000 ދީނާރު ދޭން ވާނެއެވެ. އެހެންކަމުން އެކަމަށްޓަކައި އޭނާއަށް 1000 ދީނާރު ދިނެވެ. އެއާއި އެކު އޭނާގެ އަތުގައި މިހާރު 2000 ދީނާރު ވާނެއެވެ. ދެން އޭނާ ހިނގައިގަތް ތަނުން އެއް ދީނާރު ވެއްޓުނެވެ. ދެން އޭނާ މަޑުކޮށް އެ ދީނާރު ނެގިއެވެ. އެވަގުތު ރަސްގެފާނުންގެ އަނބިކަނބަލުން އޭނާ އަތުގައި 2000 ދީނާރު އޮއްވާ އެންމެ ދީނާރެއް ވެއްޓުމުން އެ ދީނާރު އެ ނެގީ ހަމަ އޭނާގެ ދަހިކަމުން ކަމާއި އެހާ އޭނާ ދަހީ ކީއްވެތޯ އަހަންވާނޭ ކަމަށް ބުންޏެވެ. ދެން ރަސްގެފާނުންވެސް އެކަމާ ޖަދަލުނުކޮށް އަނބިކަނބުލޭގެ ބުނިގޮތަށް އަނެއްކާ އެކަލޭގެ އަށް ގޮވާ ގެނެސް އެހެން ސުވާލު ކުރިއެވެ. ދެން އެކަލޭގެ ޖަވާބުގައި ބުނެފައިވަނީ އެ ދީނާރުގައި ރަސްގެ ފާނުންގެ ނަންފުޅު ލިޔެފައި އޮތުމުން، ބިންމަތީގައި އެ އޮވެ އޭތި ކިލާވެ، މީހުން ފައިން އަރާ ހަދާފާނެއެވެ. އެއީ މަނިކުފާނުގެ އަބުރަށްވެސް ލިބޭ ހުތުރެއްކަމުން އެ ދީނާރަށް އެހާލު ނުޖައްސަން ނެގީކަމަށް ބުންޏެވެ. އެ ޖަވާބު އަޑު އިވި، މިފަހަރުވެސް ރަސްގެފާނުން ހައިރާންވިއެވެ. އެހެނީ ރަސްގެފާނުން އުންމީދުކުރާ އެއްވެސް ޖަވާބެއް ނުލިބި، މުޅިން ތަފާތު މޮޅު ޖަވާބުތަކެއް ލިބޭތީއެވެ. އެކަމާވެސް ރަސްގެފާނުން އޭނައަށް ސާބަސް ދެއްވިއެވެ. ބުނެވޭ ގޮތުގައި ސާބަސް ދެވެނީ އިހްތިޔާރުން ބޭރުގައެވެ.

އަނެއްކާވެސް ސާބަސް ދެވުނިތީ 1000 ދީނާރު ދޭން ޖެހިއްޖެއެވެ. މިހާރު މުޅި ޖުމުލަ 3000 ދީނާރު އެމީހަކަށް ދޭން ޖެހިއްޖެއެވެ. ދެން ކައިރީގައި ހުރި ވަޒީރު ރަސްގެފާނު ކުރެން ބުންޏެވެ. ތިޔަހެން ތިޔަ ވަނީ އަނބިކަނބުލޭގެ ބަސް އަހާތީއެވެ. ދެން ރަސްގެފާނުން ވިސްނަން ހުރެފާ ބުނާ ކަމަށްވަނީ، "އަންހެނެއްގެ ބަސް އަހައިފި ނަމަ، އެއްލާރި ދާން އޮތް ތާކަށް ދެލާރި ދާނޭ" މިހެންނެވެ. މިއީ މި ބުނުން އުފެދިގެން އައި ގޮތްކަމަށް ގިނަ މީހުން ބުނެ އުޅޭ ގޮތެވެ. ނުވަތަ ހަދިސާއެވެ. ނުވަތަ ވާހަކައެވެ.

ޒަމާނުއްސުރެ މިބަސް މިހެން ބޭނުން ކުރަމުން އައި ނަމަވެސް މިއީ މުޅިން ސައްހަ ބަހެއް ނޫނެވެ. އަންހެނުންނަކީވެސް ބަސް ވިކޭ ބައެކެވެ. ގޮތް ނިންމުމުގައި ހެޔޮ ނަސޭހަތާއި ރަނގަޅު އިރުޝާދު ދޭ ބައެކެވެ. މި ލިޔުން މިގޮތަށް ލިޔުމުގެ ބޭނުމަކީ އަންހެނުންގެ އަގު ދަށްކޮށް އަންހެނުންގެ ބަސް ގަބޫލު ނުކުރުމަށް ބާރު އަޅާކަށް ނޫނެވެ. ނަމަވެސް ޒަމާނުއްސުރެ، މިފަދައިން ކިޔަމުން ދާތީ، މިހެން ކިޔުނު ސަބަބާއި އެކަމުގެ އަސްލުގެ މައްޗަށް ބަލައިލުމުގެ ބޭނުމުގައެވެ. ހަގީގަތުގައި އަންހެނެއްގެ ބަސް އަހައިގެން އެއް ލާރި ލޯދެން އޮތް ތާކުން ދެ ލާރި ހޯދިވެސް ދާނެއެވެ.