މި އަހަރުގެ ރޯދަ މަހާ ދިމާކޮށް އުރީދޫން ފެށި ކެމްޕޭން ހާއްސަކުރީ ކަނޑޫދޫ މިރުހަށް ކަމަށް އެ ކުންފުނިން ބުނެފިއެވެ.
މެންހެޓަން ބިޒްނަސް ހޮޓެލްގައި ބޭއްވި ރަސްމިއްޔާތެއްގައި އުރީދޫގެ މި އަހަރުގެ ރޯދަ ކެމްޕޭން ފައްޓަވައިދެއްވީ ލޯކަލް ގަވަމެންޓް އޮތޯރިޓީ (އެލްޖީއޭ)ގެ ސީއީއޯ ފާތުމަތު އަފްޝަން ލަތީފެވެ. މި ރަސްމިއްޔާތުގައި އުރީދޫގެ ސީއީއޯ ޚާލިދު އަލް ހަމާދީ އާއި ކަނޑޫދޫ ކައުންސިލްގެ ރައީސް އަހުމަދު ރީހާން ބައިވެރިވެވަޑައިގަތެވެ.
އުރީދޫގެ ޗީފް ކޮމާޝަލް އޮފިސަރު ހުސައިން ނިޔާޒު ވިދާޅުވީ، އާއްމުކޮށް ރޯދަމަސް ރަމްޒުކޮށްދޭން ކަރާ ބޭނުންކުރި ނަމަވެސް ކަނޑޫދޫގެ މިރުހަކީ ވެސް ފަހަކަށްއައިސް ކޮންމެ ރޯދަމަހަކު މީހުންގެ މެދުގައި މަގުބޫލްކަން އިތުރުވެފައިވާ ބާވަތެއް ކަމަށެވެ.
އުރީދޫގެ މިފަހަރުގެ ރޯދަ ކެމްޕޭންގެ ދަށުން ކަނޑޫދޫ މިރުސް ވަނީ ބްރޭންޑަކަށް ހަދާފައެވެ. އެހެންކަމުން، ކަނޑޫދޫ މިރުހާއި އެ މިރުހުގެ އުފެއްދުންތައް ތައްޔާރުކޮށް ވިއްކޭނީ އެ ރަށު ކައުންސިލްގެ ހުއްދަ އާއެކު އެވެ.
ކަނޑޫދޫ މިރުސް ބްރޭންޑަކަށް ހެދުމުގެ އިތުރުން އެ މިރުހަށް ހާއްސަ ވެބްސައިޓެއް ވެސް އުރީދޫން ވަނީ ހަދާފައެވެ. އެގޮތުން، އެ ވެބްސައިޓް ބޭނުންކުރާނީ ކަނޑޫދޫ އާއި އެ ރަށުގެ ތާރީޚުގެ އިތުރުން އެ ރަށުގެ މިރުހުގެ މައުލޫމާތު ހިއްސާކުރުމަށާއި މިރުސް ވިއްކާ، މާކެޓް ކުރުމަށެވެ.
އެލްޖީއޭގެ ސީއީއޯ އަފްޝަން ވިދާޅުވީ، އުރީދޫގެ ފަރާތުން މި ފެށި ކެމްޕޭންގެ ސަބަބުން ރަށްތަކުން އުފައްދާ ތަކެތީގެ މަންފާ އެ ރަށެއްގެ މީހުންނަށް ލިބޭނެ ކަމަށާއި މިއީ އެކަމަށް އެޅިގެންދިޔަ ރަނގަޅު ފިޔަވަޅެއް ކަމަށެވެ. އަދި މިކަމަކީ އެހެން ކުންފުނިތަކުން ވެސް އުރީދޫގެ ކިބައިން މިސާލު ނަގަންވީ ކަމެއް ކަމަށް ވެސް އަފްޝަން ވިދާޅުވިއެވެ.
މި ކެމްޕޭންގެ ދަށުން އުރީދޫން ވަނީ ރޯދަ ހަދިޔާއެއްގެ ގޮތުގައި އެންޒީއާ ގުޅިގެން ކަނޑޫދޫ މިރުހުގެ ހޮޓްސޯސް ޕެކެއް ވެސް ތައާރަފު ކޮށްފައެވެ. އެގޮތުން، މި ޕެކްގައި ކުޅިކޮށް ކާ މީހުންނަށް ހާއްސަ ތިން ރަހައެއް ހިމެނޭއިރު، ކަނޑުދޫ މިރުސް ވެބްސައިޓުންނާއި އުރީދޫގެ މޫލީން މިހާރު އެ ހޮޓްސޯސް އޯޑަރު ކުރެވޭނެ އެވެ.
އުރީދޫގެ މި ކެމްޕޭނާ ގުޅޭގޮތުން ކަނޑޫދޫ ކައުންސިލްގެ ރައީސް އަހުމަދު ރީހާން ވިދާޅުވީ، އެ ރަށުގެ މިރުސް މާކެޓްކުރުމަށް ކުރާ މަސައްކަތުގެ ސަބަބުން ރަށުގެ އިގްތިސާދަށް ވަރަށް ބޮޑު ފައިދާއެއް ވާނެ ކަމަށާއި އަދި އުރީދޫން މި ފެށި މަސައްކަތްތަކާއެކު ކަނޑޫދޫ މިރުސް މުޅި ދުނިޔެ އަށް މާކެޓްކުރުމަށް މަސައްކަތްކުރައްވާނެ ކަމަށެވެ.