ހަނދުވަރުގެ އަލިކަން ލިބި ބިމަށް، ފަތުރުއްވަވާ އެ އަމާން ކަމާ

   ހަނދު ގޮސް އޮބާ އިރު ދަންވަރަށް، ބިރުވެރިކަމެއް އިހުސާސް ވެޔޭ

 

ނަލަ ރީތި ޖައްވެއްގާ ވިދާ، ބަބުޅާ އުޑުގެ ނަލަ ތަރިތަކުން

   ގަލަމާއި މިދުލަށް ނުކުޅެދޭ، ފަރި ޗާލު މަންޒަރަކަށް ވެޔޭ

 

ހުދު ގޮނޑުދޮަށަށް ދިން ހަނދުވަރާ، ބީހޭ ހިމޭން މަޑު ރާޅުތައް

   ގުދުލާ ހެދިފަ ހުރި ރުއްގަހާ، ގަސްގަހުގެ ހިޔަލެއް ވެސް ވެޔޭ

 

އެތަނުން ދުރުން އަދި މާ ދުރުން، ފެނުނޭ ނަޔާ ފަރި ހިނގުމަކުން

    އެތަނުން މަށަށް ބައްދަލުވެދިޔަ، ކަމާނެގެ ފަރި ހިނިތުން ވެޔޭ

 

އަދި އެއްދުވަސް އަދި ތިން ދުވަސް، ފަހުގައި ދިޔަސް ބައްދަލުވެދޭ

   ކަނދި ކައްކަމުން ފޮނި މީރުކޮށް، ބައްދަލު ނިކަން ކަމަނާ ވެޔޭ

 

އޮއްސުނު ފޮއެގެ ރޭ ހަނދުވަރުން، ގެއްލިއްޖެ ކަމަނާ ފަރި ހިނގުން

   ކޮއްފާ އެތާ ދިގު އިންތިޒާރު، ބައްދަލު ވުމެއް ނެތް ދިހަ ރެޔޭ

 

އެނގުނޭ މަށަށް ކީއްކަން މިވީ، އިންސީ ތެރޭ ނުވި މީހެކޭ

   އެނގުމުން މަގޭ ތުރުތުރު ލިޔޭ، ކުރުސީގެ ބަރަކާތުން ކިޔޭ

 

ހުންވެސް އައޭ އެނދުމަތި ވިޔޭ، ގަތް ބިރު ހިތުން ނުފިލާ ކަމުން

   ހުން މަޑުކުރަން ފަންޑިތަ ހަދާ، އުޅުމުން ރަނގަޅު ވީ މާފަހުން