ހދ. ކުޅުދުއްފުށީ ސިޓީގައި ގާއިމްކުރަން ނިންމާފައިވާ ފުށާއި ހަނޑޫ ބަންދުކުރާ ފެކްޓްރީގެ އަމަލީ މަސައްކަތްތައް މިއަހަރު ތެރޭގައި ފަށާނެ ކަމަށް އެސްޓީއޯ އިން ބުނެފިއެވެ.
މި ފެކްޓްރީ އެޅުމަށް ބޭނުންވާ ބިން ބެލުމަށް އެސްޓީއޯގެ އިސްވެރިންނާއި އެމްޕީއެލްގެ ވެރިން އިއްޔެގެ ވަގުތެއްގައި ކުޅުދުށްފުށީ ކައުންސިލާ ވަނީ ބައްދަލުކޮށްފައެވެ.
އެގޮތުން، ފުށް ފެކްޓްރީ އެޅުމަށް އެއްބަސްވެފައިވަނީ ކުޅުދުއްފުށީގައި އެމްޕީއެލް އިން ހިންގާ ޕޯޓް ހިމެނޭ ސަރަހައްދުން އެ ކުންފުންޏަށް ދޫކޮށްފައިވާ ބިމުން ސަރަހައްދެއްގައެވެ. އެ ސަރަހައްދުގައި ކުޅުދުށްފުށީ އެސްޓީއޯ ފިހާރަ ވެސް ހުރެ އެވެ.
ކައުންސިލާއެކު ބޭއްވި މި ބައްދަލުވުމުގައި އެސްޓީއޯގެ އެމްޑީ ހުސައިން އަމްރު އާއި އެމްޕީއެލްގެ އެމްޑީ ޝާހިދު އަލީގެ އިތުރުން ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފާއި ދެކުނު ދާއިރާގެ މެމްބަރު ޖަމްޝީދު މުހައްމަދު ވަނީ ބައިވެރިވެފައެވެ.
އަމްރު ވިދާޅުވީ، ކުޅުދުއްފުށީ ސިޓީގައި މި ފުށް ފެކްޓްރީ ބިނާކުރެވުމުން އެ ސަރަހައްދުގައި ވަޒީފާގެ ގިނަ ފުރުޞަތުތަކެއް އުފެދިގެންދިއުމުގެ އިތުރުން ރާއްޖެ އަށް ދިމާވެފައިވާ ކާބޯތަކެތީގެ ރައްކާތެރިކަމުގެ މައްސަލަ ހައްލުވެގެންދާނެ ކަމަށާއި އަދި މިހާރަށް ވުރެ ސްޓޭޕްލް ފުޑްގެ އަގުހެޔޮވެގެންދާނެ ކަމަށެވެ.
މި ފުށް ފެކްޓްރީގެ ސަބަބުން އިގްތިސާދީ އަދި ސިއްހީގޮތުން ނުހަނު ގިނަ ފައިދާތަކެއް ދިވެހިރާއްޖޭގެ ހުރިހާ ރައްޔިތުންނަށް ކުރާނެ ކަމަށް ވެސް އަމްރު ފާހަގަކުރެއްވިއެވެ.