ތަފާތު ހަގީގީ ހާދިސާތަކަކީ އެ ހާދިސާތަކުވެ ގޮތުން އިންސާނުންނަށް އެތައް އިބުރަތް ތަކެއް ލިބިދޭ ހާދިސާތަކެވެ. މިއީވެސް އެފަދަ ހަގީގީ ހާދިސާއެކެވެ. މީސް މީޑިޔާގެ އެކި އެކި މަންސަތަކުގައި ތަފާތު އެކި ޝުއޫރުތައް އެކި ގޮތްގޮތަށް ފާހަގަ ކުރަމުން ދިޔަ ޒުވާނެއްގެ ވާހަކައެވެ.
އުމުރުން ދުވަސްވެފައި ތިބި މައިންބަފައިންނަކީ މީސްމީޑިޔާ ބޭނުން ކުރާ ބައެއް ނޫނެވެ. އެހެންކަމުން މި ޒުވާނާއަށް މީސްމީޑިޔާ ބޭނުން ކުރުމުގައި އެއްވެސް ވަރެއްގެ ބެލެހެއްޓުން ތެރިކަމެއް ނެތޭ ހީވާ ކަހަލައެވެ. އާއިލާގައި މި ޒުވާނާއަށްވުރެ ދޮށީ ހަމަ އެކަކުވެސް ނެތުމުން، އެންމެ ފުރަތަމަ ފޯނަކާއި މީސްމީޑިޔާގެ ތަޅުދަނޑި މި އާއިލާއިން ލިބުނު މީހަކީ މި ޒުވާނާއެވެ. މީސްމީޑިޔާގެ ފޭސްބުކްގައި އައިޑީ އެއް ހަދާ ނުވަތަ އެކައުންޓެއް ހުޅުވާ ފޭސްބުކްގައި ތަފާތު އެއްޗެހި ލިޔެ ތަފާތު ޝުއޫރުތައް ދިޔައީ ފާޅު ކުރަމުންނެވެ. އެ ޒުވާނާގެ އާއިލާ މީހަކު، އެ ޒުވާނާގެ ރައްޓެހިންގެ ލިސްޓަކު ނެތެވެ. ނަމަވެސް ތިބީ ހުސް އެ ޒުވާނާގެ އެކުވެރިންނެވެ.
ދުވަސްތައް ފާއިތުވަމުން ގޮސް، އެ ޒުވާނާ މިހާރަކަށް އައިސް މީސްމީޑިޔާގައި އާންމުކުރާ ޕޯސްޓް ތައް މީގެ ކުރިއާއި ތަފާތެވެ. ގިނައިން ޕޯސްޓް ކޮށްފައި ހުންނަނީ ފާހިޝްކަންކަމަށް މަގުފަހިކުރުވާ ޕޯސްޓްތަކާއި އެފަދަ ކަންކަން އެކުލެވޭ މަންޒަރު ދައްކުވައިދޭ ވީޑިއޯތަކާއި ފޮޓޯތަކެވެ. މި ޕޯސްޓްތަކަށް އެތައް ބައެއް ރިއެކްޓްކޮށް ކޮމެންޓްކޮށް ހަދާ އުޅެއެވެ. މިކަން ވެގެން ދިޔައީ އެ ޒުވާނާއަށް ހިތްހަމަޖޭ، މަޖާ ކަމަކަށެވެ. ފަހަރުގައިވެސް އެއިން ކަމަކުން ތިމާއަށް އެއްވެސް ގެއްލުމެއް ލިބިދާނޭ ހިތަކަށް ނާރައެވެ.
އުޅުމެއްގެ ގޮތުން މިއީވެސް ހަޔާތެއް ކަމުގައި އެ ޒުވާނާ ދެކުނެވެ. ދުވަސްތަކެއް ފަހުން ފާޑު ފާޑު ނަންނަމުން އެ ޒުވާނާ މަޝްހޫރުވިއެވެ. މީސްމީޑިޔާ ބޭނުންކުރާ ގިނަ މީހުންނަށް އެ ޒުވާނާ އެނގެއެވެ. މިއަދު އެ ޒުވާނާއަކީ "ސެލެބްރެޓީ" އެކެވެ.
އެނގޭހެއްޔެވެ؟ އެ ޒުވާނާގެ އުމުރުން މިއަދު 35 އަހަރެވެ. އާދޭހެވެ! ކައިވެންޏެއް ކުރަން އަދިވެސް ހަގީގަތުގައި ލަހެއް ނުވެއެވެ. ނަމަވެސް ހިތާމައަކީ އެ ޒުވާނާ އުމުރުގެ ކުރީކޮޅުން ފަށައިގެން ބައިވެރި އަކު ހޯދަން ކުރި މަސައްކަތް ނާކާމިޔާބު ވުމެވެ. ސަބަބަކީ ކޮބާ ހެއްޔެވެ؟ އެއްވެސް އަންހެއްކުއްޖަކު ގަޔާ ނުވަނީ އެވެ. ނަމަވެސް އެ ޒުވާނާގެ ޕޯސްޓްތަކަށް ރިއެކްޓް ކޮށް ކޮމެންޓްކުރާ އަންހެންކުދިން މަދެއް ނޫނެވެ. އެހެނަސް އެ ޒުވާނާ އާއެކު ހަޔާތެއް ފަށާނޭ އަންހެނަކު އެ ޒުވާނާއަށް ނުވަނީއެވެ. އެއްވެސް އަންހެނަކު ސަބަބެއް ނުބުނެއެވެ. އުޅެން ބޭނުން ނުވަނީ ކަމަށާއި ޝައުގުވެރިކަން ނުހުންނަނީ ކަމަށް ކޮންމެ މީހަކުވެސް ބުނެއެވެ.
މިހެން އުޅުމުގެ ތެރޭގައި މި ޒުވާނާ ސިއްސުވާލީ އެއް އަންހެނަކު ދިން ޖަވާބަކުންނެވެ. މީސްމީޑިޔާގައި ގޮތެއް ފޮތެއް ނެތިގެން އުޅޭ މީހަކަށް އަހަރެންގެ ދަރިންގެ ބައްޕައޭ ކިޔާކަށް ބޭނުމެއް ނޫންކަމަށް ބުނެ ދިން ޖަވާބެވެ. އަދި ހުރިހާ އަންހެނުންވެސް އެ ޒުވާނާދެކެ ފޫހިވަނީ، އެންމެނަށް ފެންނާނެހެން ފާހިޝްއެއްޗެއްސާ މުޑުދާރު ޕޯސްޓްތައް ހިއްސާކުރާތީ ކަމުގައި އެ އަންހެނާ ބުންޏެވެ. އެ ޒުވާނާގެ ހިތް މުޅިން ހުއްޓުނު ކަހަލައެވެ. މީގެ ކުރިން އެ ޒުވާނާ ދެކެމުން އައީ މީސްމީޑިޔާގައި މި ކުރެވެނީ ނިކަން މޮޅު ކަމެއް ކަމަށެވެ. އަދި ގިނަ އަންހެނުން ރިއެކްޓްކޮށް ކޮމެންޓުކުރާތީ އެ ޒުވާނާއަށް ހީވެފައި އޮތީ އެއީ ވަރަށް ކާމިޔާބު ކަމެއް ކަމަށެވެ. ނަމަވެސް އުމުރުން 35 އަހަރުގައި، ކުރެވެމުން އެ ދިޔަ ކަންކަމަކީ ހަގީގަތުގައި ވަރަށްވެސް ހަޑި، މުޑުދާރު ކަމެއްކަން އިހުސާސް ކުރެވުނެވެ.
އާދޭހެވެ! މިއީ އަދުގެ ޒުވާނުން ވިސްނަން ޖެހޭ މުހިއްމުކަމެކެވެ. މީސްމީޑިޔާގައި ކޮންމެ ކޮންމެ އެއްޗެއް ހިއްސާ ނުކުރާށެވެ. އަދި ފާހިޝް ކަންކަމާއި މުޑުދާރު ކަންކަމަށް ތަރުހީބު ދެވުމަކީ އެއްވެސް ހާލެއްގައި މޮޅު ކަމެއް ނޫނެވެ. ގިނަ ބަޔަކު ރިއެކްޓް ކޮށް ކޮމެންޓު ކުރުމަކީ އަދި މަގުބޫލުވުމެއް މަޝްހޫރު ވުމެއްވެސް ނޫން ކަމެވެ. މަޑުމައިތިރި އިހުސާންތެރި ޒުވާނާއަކީ އެންމެ މަޝްހޫރު ޒުވާނާއެވެ. ވިސްނާށެވެ!
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން