އެކި ގޮތްގޮތުން އިންސާނާގެ ހަށިގަނޑުގައި ދިފާއީ ހަރަކާތްތައް މި ވަނީ މާތް ﷲ ފަރުމާ ކުރައްވަވާ އިންތިޒާމު ކުރައްވާފައެވެ. މިގޮތުން އިންސާނާގެ ހަށިގަނޑުގެ ދިފާއީ ނިޒާމުގައި މުހިންމު އެއް ދައުރެއް އަދާކުރާ އެކައްޗަކީ ލޭގެ ތެރޭގައި ހުންނަ މާއްދާއެއް ކަމަށްވާ "ވައިޓް ބްލަޑް ސެލްސް" އެވެ. މިއީ ހުދުލޭހަތައެވެ. ހަށިގަނޑުގައި ހުންނަ ޖަރާސީމުތަކާއި ނުރައްކާތެރި މާއްދާތަކާއި އަދި ލޭގެ ތެރޭގައި ދައުރުވާ އެކިކަހަލަ ޖަރާސީމުތަކާއި ދެކޮޅަށް މަސައްކަތް ކުރުމުގެ ނުވަތަ ހަނގުރާމަ ކުރުމުގެ ކުޅަދާނަކަމާއި ގާބިލުކަން މި ހަތައިތަކަށް ފުރިހަމައަށް ލިބިގެންވެއެވެ.
އާދޭހެވެ! އިސްލާމް ދީނުގައި ކޮންމެ ކަމެއްވެސް އައިސްފައިވަނީ އޭގައި އެތައް ހިކުމަތްތަކެއް ވާ ގޮތުގެ މަތިންނެވެ. އިންސާނުން ހޯދާ ދެނެގަތުމުން މިކަންކަން ހާމަވެ، މިއީ އިބުރަތުން ފުރިގެންފާ ފިލާވަޅުތަކެއް އަދި ދަރުސްތަކެއް ކަމުގައި ވެދެއެވެ. މިގޮތުން ރޯދަމަހަކީ ފާހަގަ ކޮށްލެވޭ ހާއްސަ މަހެކެވެ. މި މަހަކީ ސިއްހީ އެތައް ފައިދާއެއް އިންސާނުންނަށް ކުރުމާ މަހެއްކަމަަށް ގިނަ ޑަކްޓަރުންނާއި ސައިންސުވެރިން ފާހަގަ ކުރެއެވެ. އެގޮތުން ރޯދައަށް ހުރުމަކީ އޭގެ ސަބަބުން އިންސާނާގެ ދިފާއީނިޒާމު ވަރުގަދަކޮށްދޭ ކަމެކެވެ.
މިކަން މެދުވެރިވަނީ ރޯދަވެރިޔާގެ ލޭގެ ތެރޭގައި ހިމެނޭ ހުދުލޭހަތާތަކުގެ ލަޝްކަރު އައުވެގެންނެވެ. އިންސާނާ ރޯދައަށް ހުންނަ ހުރުމުގެ ސަބަބުން ލޭގެ ތެރޭގައި ހުންނަ "ކާނާ" ގެ މިންވަރު މަދުވެއެވެ. ނުވަތަ ދަށްވެއެވެ. މިކަމުގެ ސަބަބުން ލޭގެ ތެރޭގައި ދައުރުވާ އެކިއެކި ހަތައިތަކަށް ބޭނުންވާ "ކާނާ" ލިބުމުގައި ދަތިތަކެއް ކުރިމަތިވެއެވެ. ނުވަތަ ކާނާ ލިބޭ މިންވަރު މަދުވެއެވެ. އެގޮތުން އިންސާނާގެ ދިފާއީ ނިޒާމުގައި ހިމެނޭ ހުދުލޭ ހަތާތަކަށްވެސް މިކަމުގެ އަސަރު ފޯރައެވެ. ނަމަވެސް ހުދުލޭ ހަތާތަކަށުގެ ތެރޭގައި ހިމެނޭ ދުޅަހެޔޮ ހަތާތަކަކަށް މިކަމުން އެއްވެސް ގެއްލުމެއް ނުލިބެއެވެ. އެހެނަސް ހުދުލޭ ހަތާތަކުގެ ތެރޭގައި ހުންނަ ދުވަސްވީ ހަތާތަކާއި ބަލިކަށި ހަތާތަކަށް ބޭނުންވާ މިންވަރަށް ކާނާ ނުލިބި އެ ހަތާތަށް މަރުވެ ނުވަތަ ނެތިދެއެވެ.
އާދޭހެވެ! މިއީ ވަރަށް ފުރިހަމަ ނިޒާމެކެވެ. ގުދުރަތުގެ މި ނިޒާމު ހަމަޖެހިފައިވާގޮތުން މިގޮތަށް ލޭގެ ތެރެއިން މަދުވާ ހުދުލޭ ހަތާތަކުގެ ބަދަލުގައި އޭގެ އައު ހަތާތަކެއް އުފެދެއެވެ. މައިބަދައިން އުފައްދައިދޭ އައު ހުދުލޭ ހަތާތަކާއިއެކު، ދިފާއީ ނިޒާމުގައި ހުންނަ މި ހަތާތަކުގެ ދުޅަހެޔޮކަން އިތުރުކޮއްދީ މި ލަޝްކަރުގެ ބާރު ގަދަވެގެން ދެއެވެ. އަދި މި ހުދުލޭ ހަތާތަކުގެ ތާޒާކަން އިތުރުކޮށްދީ ޒުވާންކަން ގެނުވައެވެ. ޑަކްޓަރުންނާއި ސައިންސްވެެރިން ހާމަ ކުރާ ގޮތުގައި މިއީ ދިފާއީ ނިޒާމު ވަރުގަދަވެ، ހަރުދަނާ ވެގެންދާ ކަމެކެވެ.
ކަންއޮތީ މިހެން ކަމުން، ރޯދަމަހަކީ ރޯދަވެރިޔާގެ ސިއްހަތަށް ފައިދާކުރާ މަހެއްކަން ސާފުކޮށް ހާމަވެއެވެ. އާދޭހެވެ! ރޯދައަށް ހުރުމަކީ ދިފާއީ ނިޒާމު ވަރުގަދަކޮށްދޭ ކަމަކެވެމެ. މިކަންކަމުން އެނގި ހާމަ ވަނީ މާތް ﷲ ގެ ކުޅަދުންވަންތަކަމާއި އެ އިލާކުގެ ޙިކުމަތްވަންތަ ކަމެވެ. ހުރިހާ ހަމްދަކާއި ޘަނާއެއް ހުރީ ގަދަކީރިތިވަންތަ ﷲ ސުބްޙާނަހޫ ވަތަޢާލާއަށެވެ.