މި އަހަރުގެ ފިތުރު އީދު ކުލަގަދަކޮށް ފާހަގަކުރަން ކ. މާފުށީ ކައުންސިލުން ނިންމައިފިއެވެ.
މާފުށީގައި އިއްޔެ އޮތް ނޫސްވެރިންގެ ބައްދަލުވުމެއްގައި އެ ރަށުގެ ކައުންސިލް ރައީސް ހަސަން ސޮލާހު ވަނީ ކުރިއަށް އޮތް ފިތުރު އީދު ދުވަސް ކުލަގަދަކޮށް ފާހަގަކުރަން ނިންމާފައިވާކަން އިޢްލާންކޮށްފައެވެ.
އެގޮތުން، ފިތުރު އީދު ދުވަހާއި ގުޅިގެން މާފުށީގައި ބާއްވާ ހަރަކާތްތައް ފެށިގެންދާނީ އެ ދުވަހުގެ ހެނދުނު ބޮޑު ޖަމާޢަތުގައި ކުރެވޭ އީދު ނަމާދަށްފަހުގައި ކަމަށާއި، އެއަށްފަހު ވަރަށް ހާއްސަ ސަގާފީ ސައިފޮދެއްގެ އިތުރުން މެންދުރުގެ ފަރިއްކުޅުވުމެއް ބޭއްވުމަށް ހަމަޖެހިފައިވާކަމަށް ވެސް ސޮލާހު ފާހަގަކުރެއްވިއެވެ.
ސޮލާހު ވިދާޅުވީ، އީދު ދުވަހު ކުޑަކުދިންގެ ހަވީރެއްގެ އިތުރުން ހުރިހާ އުމުރުފުރައިގެ މީހުންނަށް ހާއްސަކޮށް އެރޭ މިއުޒިކް ޝޯވ އެއް ވެސް ބޭއްވުމަށް ހަމަޖެހިފައިވާ ކަމަށެވެ.
ސޮލާހު އިތުރަށް ވިދާޅުވީ، މިފަހަރުގެ އީދު ކުލަގަދަކޮށް ފާހަގަކުރަން ނިންމާފައިވަނީ އީދުގެ ސަގާފަތާއި މުޖުތަމަޢުގެ އެންމެންގެ މެދުގައި ގުޅުން ބަދަހިކުރުމަށް އަމާޒުކޮށްގެން ކަމަށެވެ. އަދި އެ ދުވަހުގެ ހަރަކާތްތަކުގައި ރަށުގެ ރައްޔިތުންނާއި، ފަތުރުވެރިންގެ އިތުރުން އެރަށުގައި ވަޒީފާ އަދާކުރާ ފަރާތްތަކުން ބައިވެރިވާނެކަމަށް ވެސް ސޮލާހު ފާހަގަކުރެއްވިއެވެ.
މީގެއިތުރުން، މި ފެސްޓިވަލްގައި ބައިވެރިވުމަށް ރާއްޖޭގެ ހުރިހާ ރައްޔިތުންނަށް މާފުށި ކައުންސިލް އަދި އެރަށުގެ ރައްޔިތުންގެ ނަމުގައި ދައުވަތު އަރުވާކަމަށް ވެސް ސަލާހު ވަނީ ވިދާޅުވެފައެވެ.
މާފުށީ ކައުންސިލުން ވަނީ އީދު ދުވަހުގެ ހަރަކާތްތަކުގައި ބައިވެރިވުމަށް މާލެއިން މާފުށްޓަށް ދަތުރުކުރާ ފަރާތްތަކަށް ހާއްސަކޮށްގެން ލޯންޗް ފެރީގެ ހިދުމަތް ހަމަޖެއްސުމުގެ މަސައްކަތް ފަށާފައެވެ. އެހެންކަމުން، އެ ރަށަށް އީދުގެ ހަރަކާތްތަކުގައި ބައިވެރިވުމަށް އަންނަ ހުރިހާ ފަރާތްތަކުން ވެސް ކުރީބައިގައި ރޫމްތައް ބުކް ކުރުމަށާއި ލޯންޗުގެ ޖާގަ ކަށަވަރުކުރުމަށް މާފުށީ ކައުންސިލުން އިލްތިމާސްކޮށްފައިވެއެވެ.