ޒަމާނުއްސުރެ ދިވެހިންނަކީ ރޯދަހަމަހަށް ހާއްސަކޮށް ތައްޔާރީތައް ވަމުންދާ ބައެކެވެ. ރޯދަމަހާއި ދިމާކޮށް ހާއްސަ ކެއުންތައް ދިވެހިން ތައްޔާރު ކުރެއެވެ. އެގޮތުން މިއަދާޖެހެންދެންވެސް ދިވެހިންގެ ހާރު ކެއުމުގައި ބޭނުން ކުރާ ބަތްޕެނަކީ އަހަރެމެން ދިވެހިންގެ ހިތްތަކުގައި ވަރަށް ހާއްސަ މަގާމެއް ދެވިފައިވާ ބުއިމެކެވެ. ރޯދަމަހު ހާރުދަމު ބަތްޕެންފޮދެއް ނުބޯނަމަ ރޯދަވެސް ފުރިހަމަ ނުވާނެއޭ ދިވެހިންނަަށް އިހުސާސް ވާ ކަހަލައެވެ. އޭރުވެސް ދިވެހިން ބަތްޕެން ކައްކާ އަދި ބޭނުން ކުރަމުން އައީ މިހާރުވެސް ބޭނުންކުރާ ގޮތަށެވެ. ނަމަވެސް މިއަދު ބައެއް މީހުން ތަފާތު އެއްޗެހި ބަތްޕެނުގެ ތެރެއަށް އަޅައިގެން ބޮއެވެ. އަދި އަނެއްބަޔަކު މަދު މަދުން ނަމަވެސް ބަތްޕެނާ ދުރަށް ދެއެވެ.
ބަތްޕެނަކީ ހަމަ އެކަނި ހާރުދަމު ދިވެހިން ބޮއެ އުޅޭ ބުއިމެއް ނޫނެވެ. ބައެއް ބަލިތަކުގައި މީހާގެ ވަރު ދެރަކޮށްލުމުންވެސް ބަތްޕެން ބޮއެ އުޅެއެވެ. ހާއްސަކޮށް ބޭރަށް ހިންގުމާއި ގަދަ ހުންހުމުގައެވެ. ދިވެހިންގެ ހިތްތަކުގައި ބަތްޕެނަށް މިހާބޮޑު ލޯތްބެއް ޖެހިފައިވާ ވާއިރު، ބަތްޕެނުން ލިބޭ ސިއްހީ ފައިދާތަކަށް ބަލާލުން ވަރަށްވެސް މުހިންމެވެ. ދިރާސާތަކެއް އަދި ތަހުލީލުތަކެއް ކުރެވެން ނެތް ޒަމާނުއްސުރެ މިއަދާ ޖެހެންދެން ދިވެހިން ބަތްޕެނަށް ހާއްސަމަގާމެއް ދީގެން ހާއްސަ ހާލަތްތަކުގައި ބޭނުން ކުރާކަމީ ދިވެހިންގެ ޙިކުމަތްތެރިކަމާއި ތޫނުފިލިކަން ހާމަ ކޮށްދޭ ކަމެކެވެ.
ބަތްޕެނަކީ ހަޖަމުގެ ނިޒާމަށް މޮޅު ފަރުވާ އެކެވެ. ހަޖަމުގެ ނިޒާމުގެ ކަންކަން ތަރުތީބު ވުމާއި ހަޖަމުގެ ނިޒާމުގެ ކަސިޔާރުކަން ފިލުވައިދޭން ބަތްޕެނަކީ މޮޅު ބުއިމެކެވެ. ވިހައެއް ކެވުމާއި ނުވަތަ ބޮވުމާއި، ބޭރަށް ހިންގުމާއި، ހަޖަމު ނުވުމާއި މިއީ ހައްތަހާވެސް ބަތްޕެނުގެ ސަބަބުން ފަރުވާލިބިދާ ކަންކަން ކަމަށް މާހިރުން ވިދާޅުވެއެވެ. އަދި ވަކީން ހާއްސަކޮށް ވައިގެ އުނދަގޫތަކާއި ވައި ހެދުމުން ދުރުކޮށްދިނުމަށް ބަތްޕެން އަދާކުރަނީ ވަރަށްވެސް މުހިންމު ދައުރެކެވެ. ބަތްޕެނުގައި ގިނަ އަދަދަކަށް ވިޓަމިނާއި މިނަރަލް އެކުލެވޭ އިރު ފައިބަރާއި ކާބޯސްވެސް ހިމެނެއެވެ.
ފެނުގައި ހަނޑޫތައް ކައްކަމުން ދާއިރު، ހަނޑުލުގައި ހުންނަ ކާބޯސްގެ މާއްދާތަަކުން ބޮޑު ބައެއް ފެނުގެ ތެރެއަށް ދެއެވެ. އެކެންކަމުން ބަތްޕެން ވެގެންދާނީ ކާބޯސް އިން މުއްސަނދިވެފައިވާ ބުއިމަކަށެވެ. ކާބޯސް އަކީ އޭގެ ސަބަބުން ހަށިގަނޑުގައި ވަރު ޖައްސައިދޭ މާއްދާއެކެވެ. ދުވަސް ފަށައިގަތުމަށް ބަތްޕެން ފަދަ އެއްޗެއް ބުއިމަކީ އޭގެ ސަބަބުން މުޅި ދުވަހު، ހަށިގަނޑުގައި ވަރު ޖެހިފައި ހުރުމަށް މަގުފަހިކޮށްދޭނޭ ކަމެކެވެ. ހަމަ އެއާއި އެކު ބަތްޕެނުން މި ލިއްބައިދޭ ހަކަތައަކީ މީހާގެ މިޒާޖާއި މޫޑަށް ތާޒާކަން ގެނެސްދީ ނަފްސުގެ ހޭލުންތެރިކަން އިތުރުކޮށްދޭނޭ ހަކަތައެކެވެ.
ބޭރަށް ހިންގާ މީހާ ވަރުދެރަވުމުން ލޮނުޕަކެޓްފެނަކީ ޑަކްޓަރުން ލިޔާ ފަރުވާއެކެވެ. ހަމަ އެގޮތަށް ޑަކްޓަރުން ފާހަގަ ކުރާ ގޮތުގައި ބަތްޕެނަކީ ޤުދުރަތީ ލޮނުޕަކެޓް ފެނެކެވެ. ބަތްޕެނުގައި ސީދާ ލޮނު އެކުލެވިފައި ނުވި ނަމަވެސް ބަތްޕެނުގެ ސަބަބުން ހަށިގަނޑުގައި ހުންނަ ލޮނުގެ މާއްދާ، ބޭރުވިޔަ ނުދީ ހިފަހައްޓައި ދެއެވެ. މިގޮތަށް ލޮނުގެ މާއްދާ ހިފެހެއްޓިފައި ވާނަމަ އެއީ އޭގެ ސަބަބުން ހަށިގަނޑުގައި ހުންނަ ފެނުގެ މިންވަރުވެސް ހަށިގަނޑުގައި ހިފެހެއްޓިފައި ހުންނާނޭ ކަމެކެވެ. އެހެންކަމުން ބަތްޕެނަކީ ހަށިގަނޑުން ފެން މަދުވިޔަ ނުދީ ހިފަހައްޓައި ދިނުމަށް އެހީތެރިވެދޭ ބުއިމެކެވެ. އަދި ހަންގަނޑު ކުރަކި ވުމާއި ހަން ފޮޅުން ފަދަ ކަންކަމުންވެސް ދުރުކޮށްދިނުމަށް ބަތްޕެން އެހީތެރިވެދޭ ކަމަށް މާހިރުން ވިދާޅުވެއެވެ.
ރޯދަ މަހު ހާރުދަމު ބަތްޕެން ބުއިމަކީ ކިހާ މުހިންމު ކަމެއްކަން މިހާރު އިހުސާސް ކުރެވޭ ހެއްޔެވެ؟ ރޯދައަަށް ހުރުމުގެ ސަބަބުން ހަޖަމުގެ ނިޒާމުގައި އުފެދޭ ވަޔާއި އެ ވައިން ކުރިމަތިވާ އެކި އެކި އުނދަގޫތަކުން ސަލާމަތް ވުމަށް ހާރުދަމު ބަތްޕެން ބޭނުންކުރުން މުހިންމެވެ. ރޯދައަށް ހުރުމުން ލިބޭ ވަރުބަލިކަން ފިލުވާލުމަށް ބަތްޕެންވަރެއް ހަމަ ނެތެވެ. ހަށިގަނޑުގައި ވަރު ޖައްސައި ދީ މީހާގެ މޫޑު ތާޒާކޮށްދިނުމަށްވެސް ބަތްޕެން ފެންފޮދެއް ފުދެއެވެ. ކަރުހިއްކުމާއި ހަށިގަނޑުން ފެންމަދުވުމުން ދުރުކޮށްދޭ، ހާރުދަމުގެ އެކުވެރިއަކީ ބަތްޕެނެވެ. ރޯދަ ވެރިޔާއަށް މިއީ ވަރަށްވެސް ބޭނުންތެރި މުހިންމު ކަމެކެވެ. ދިވެހިންނަކީ ހިކުމަތުން ކަންކުރާ ބައެއްކަން ހަމަ އެކަނި ބަތްޕެނުގެ މިސާލަށް ބަލައިލުމުންވެސް ފުދެއެވެ.