މަސްތުވާތަކެއްޗާއި އެތަކެއްޗާއި ގުޅުންހުރި އެއްވެސް ކަމަކީ އިންސާނާއަށް އެކަންކަމުން އެއްވެސް ކަހަލަ ހިތްހަމަ ޖެހުމެއް އުފާވެރިކަމެއް ލިބޭނޭ ކަމެއް ނޫނެވެ. އަހަރެމެންގެ އިސްލާމް ދީނުގައިވެސް މިކަން ވަރަށް ސާފުކޮށް ބަޔާންވެގެންވެއެވެ. އަދި ދުނިޔޭގެ އެތައް އިބުރަތްތެރި ހާދިސާތަކަކުންވެސް މެއެވެ. މިއީވެސް މިފަދަ ހާދިސާއެކެވެ. ޒުވާނަކު އޭނާގެ މީސްމީޑިޔާގައި ހިއްސާކޮށްފައި އޮތް ވާހަކައެކެވެ.

އެއީ އޭނާގެ އުމުރުން 17 އަހަރުގައެވެ. މަތީ ތަޢުލީމު ހާސިލް ކުރުމަށް މާލެ ދިޔައެވެ. ރާއްޖެ ތެރޭގެ އުޅުމާއި މާލޭގައި އުޅުމާއި އުޑާއި ބިންހާ ތަފާތެވެ. އެ ޒުވާނާއަށް އެކަން އިހުސާސްވީ މާލޭގައި އުޅެންފެށުމުންނެވެ. މާލެއިން ބައްދަލުވީ މުޅިން އާ އެކުވެރިންތަކަކާއެވެ. އެ ޒުވާނާގެ ބައްޕަފަރާތު ބޮޑުބޭބެއެއްގެ ކައިރީގައި މާލޭގައި ހުރި އިރު، ތަޢުލީމު ހާސިލްކުރަމުން ދިޔައީ މާލޭގެ ނަން މަޝްހޫރު ސުކޫލެއްގައެވެ. އެ ސުކޫލުގައި އެއް ކުލާހެއްގައި ކިޔަވާންތިބި ކުދިންނަކީ މާލޭގެ ފެނަށް ދިރިފާ ތިބި ބައެކެވެ.

އެ ކުދިންގެ އަތުގައި އޮންނަނީ އެންމެ ފަހުގެ ޒަމާނީ ފޯނުތަކެވެ. އަތުގައި އަޅާފައި އޮންނަނީ ފެންވަރު ރަނގަޅު ގަޑިތަކެވެ. ކަންފަތަށް ޖަހާފައި ހުންނަނީ ވާގަނޑު ނުލާ ހެޑްސެޓް ތަކެވެ. އަޅަނީ ފެޝަން އަވި އައިނެވެ. ޖަހަނީ އަގުބޮޑެތި ސެންޓެވެ. ސުކޫލަށް އަންނަނީ އަމިއްލަ ސައިކަލުތަކުގައެވެ. 18 އަހަރު ނުފުރުނަސް އަމިއްލަ ސައިގަލު ގެންގުޅެއެވެ. ނަމަވެސް މި މަންޒަރުގައި ފަރުދާވެފައިވަމީ އެ ޒުވާނާގެ ހަޔާތެވެ. އެ ޒުވާނާގެ އަތުގައި އޮންނަނީ ބައްތި ފޯނެއް އެކަންޏެވެ. އަތުކުރި ގަޑިއެއް ހެޑްސެޓެއް އަވިއައިނެއް މީރުވަސްދުވާ އަގުބޮޑު ސެންޓެއް އަމިއްލަ ސައިކަލެއް ނެތެވެ. މިކަން ވެގެން ދިޔައީ އެ ޒުވާނާ އެ ކުލާހު ކުދިންނާއި ކުޑަކޮށް ނަމަވެސް އެކަހެރި ކުރުވި ސަބަބަކެށެވެ.

މިއާއި އެކު އެ ޒުވާނާގެ ހިތުގައި އެ ތަކެއްޗަށް އޮތް އެދުންވެރިކަން ބޮޑުވާން ފެށިއެވެ. ނަމަވެސް ވަޒީފާއެއް އަދާނުކުރުމާއި މައިންބަފައިންގެ އަތްމަތި ދަތިކަމުން އެފަދަ ހަރަދެއް ކުރާނޭ ތަނަވަސްކަމެއް އެ ޒުވާނާއަކަށް ނުލިބެއެވެ. ކޮންމެ މަހަކު ބައްޕަ ފޮނުވާ 500 ރުފިޔާ ނޫން އެއްޗެއް ނޯވެއެވެ. ނަމަވެސް އެ ޒުވާނާގެ އެ އެދުންވެރިކަން ދިޔައީ ބޮޑުވަމުންނެވެ.

ދުވަސްތައް ފަހެވެ. އެ ޒުވާނާއަށް ދިމައިވަނީ އެ ޒުވާނާގެ ރަށު އެހެން ޒުވާނަކާއެވެ. އޭނާ އަކީ މަސްތުވާތަކެތީގެ ވިޔަފާރި ކުރާ މީހެެއްކަން އެ ޒުވާނާއަށް އެނގެއެވެ. ނަމަވެސް ރަށު މީހަކަށް ވުމުން ކޮފީއަކަށް އަރާ ވާހަކަ ދައްކާލެވުނެވެ. މަސްތުވާ ތަކެތީގެ ވިޔަފާރީގެ ނަފާ މިލިއަނުން ބިލިއަނުން ލިބޭކަމަށް އޭނާގެ ވާހަކަތަކުން އެ ޒުވާނާއަށް އެނގުނެވެ. އެ ޒުވާނާ ބޭނުންވީ އެ "ފަގީރު" ދިރިއުޅުން "މުއްސަނދި" ދިރިއުޅުމަކަށް ބަދަލު ކޮށްލާށެވެ. އެކަމުގެ ދަހިވެތިކަމުގައި މަސްތުވާތަކެތީގެ ވިޔާފާރީގެ ތެރެއަށް އެ ޒުވާނާ ވަނެވެ. 

މިކަމުގެ އިތުރު ތަފްސީލެއް އެ ޒުވާނާ ހިއްސާކޮށްފައެއް ނެތެވެ. ނަމަވެސް އެއް ވާހަކަ ހިއްސާކޮށްފައި އޮތެވެ. އެެއީ އެ ވިޔަފާރިން ލިބޭ ފައިސާ ކިތަންމެ ގިނަ ވިޔަސް، އެ ފައިސާއިން ކިތަންމެ އެއްޗެއް ގަނެވުނަސް ހިތްހަމަ ޖެހުމެއް ނުލިބޭ ވާހަކައެވެ. އެ ވިޔަފާރީގައި އެކުގައި އުޅޭ މީހުންނަނީ ހަގީގަތުގައި ހަތުރުން ކަމުގައި އެ ޒުވާނާ ސިފަ ކުރެއެވެ. ނުބައި ވިހަގަދަ ހަރުފަތެއް ކަމަށް ބުނެއެވެ.

އެ ޒުވާނާއަށް ދިމައިވީ ކޮން ހާދިސާއެއްކަން އެ ޒުވާނާ ކިޔައިދީފައި ނުވި ނަމަވެސް، އެ ޒުވާނާއަށް އެ ދިމައިވި ކަމަކުން، މަސްތުވާ ތަކެތީގެ އެ "ތަނަވަސް" ހަޔާތް އެއްކޮށް އޭނާ ދޫކޮށްލީ، އުފަލާ އަރާމުގައި ހިތްހަމަޖެހިގެން އުޅޭށެވެ. ނުތަނަވަސް ކަމާއި ބިރުވެރިކަމެއްގައި ކިތައްމެ ގިނަ ފައިސާ ލިބުނަސް ބޭނުން ނުވާކަމަށް އެ ޒުވާނާ ބުންޏެވެ. މީހެެއްގެ އެހީތެެރިކަމަކާއި ނުލާ އެކަނި ކުރި ހިތްވަރުން އެ ޒުވާނާ މަސްތުވާ ތަކެތީގެ ވިޔަފާރިން ނުކުތެވެ. މިނިވަން މީހެއްގެ ގޮތުގައެވެ. އެނބުރި ތައުލީމީ ހަޔާތުގެ ތެރެއަށް ދާށެވެ. އެ ޒުވާނާއަށް ތެދުމަގު ދެއްކެވީތީ ﷲ އަށް ޝުކުރުވެރިވަމެވެ.

އެނގޭހެއްޔެވެ؟ އެ ޒުވާނާ ހާމަ ކޮށްފައިވާ ގޮތުން، އެ ޒުވާނާ އެ ހަޑިމުޑުދާރު ވިޔަފާރިން ވަކިވިތާ 5 މަސް ފަހުން އޭނާގެ ކުރީގެ ވިޔަފާރީގެ ބައިވެރިން ފުލުހުން ހައްޔަރު ކުރިއެވެ. އެ މީހުންގެ އެ ވިޔަފާރިން އެ ޒުވަނާއަށް ނުކުމެވުނު ކަމީ އެ ޒުވާނާ މިއަދު ޝުކުރުވެރިވާ ކަމެކެވެ. ނަމަވެސް އެ ޒުވާނާ ހިތާމަ ކުރަނީ އެ ޒުވާނާގެ ސަބަބުން އެތައް ބަޔަކަށް މަސްތުވުމަށް އެހީތެރިވެވުނީތީއެވެ. އެކަމުން ހޯދި ފައިސާއިން ތަކެތި ގަނެ ބޭނުން ކުރެވުނީތީއެވެ. އެތައް ފަހަރަކު ކާންވެސް ކެވުނީތީއެވެ. ނަމަވެސް މިއަދު އެ ޒުވާނާއަކީ މާލެ އައި އިރު ހުރި ގޮތަށް ހުރި ޒުވާނެކެވެ.

އެ ޒުވާނާގެ ހަޔާތަށް އެއައި އެއްވެސް ބަދަލެއް އެއްވެސް މީހަކަށް އިހުސާސްވެސް ނުކުރެވުނެވެ. އެކަންތައް ވަނީ ބޮޑު ސިއްރެއްގެ ގޮތުގައެވެ. ނަމަވެސް އެކަން އެނގޭނެ ބަޔަކު އެރަށުގައި އުޅޭނޭކަން އެ ޒުވާނާއަށް އެނގެއެވެ. އެ ޒުވާނާ، އޭނާ ދަންނަ އެންމެންގެ ކިބައިން މައާފަށް އެދުމުގެ ގޮތުން އެކަން މީސް މީޑިޔާގައި ހިއްސާކުރީއެވެ. މާތް ﷲ އެ ޒުވާނާގެ ފާފަ ފުއްސަވާ ހިދާޔަތުގެ މަގުގައި ލަހައްޓަވާށިއެވެ.