ދިވެހިންގެ މެދުގައި އެންމެ މަގުބޫލް އެއް ސޯޝަލް މީޑިއާ ޕްލެޓްފޯމް ކަމަށްވާ "ސްނެޕްޗެޓް" އާ ގުޅިގެން އުރީދޫން ރާއްޖޭގެ ޓޫރިޒަމް ޕްރޮމޯޓްކުރަން ދިވެހިވަންތަ ލެންސަކާއި ފިލްޓަރެއް ތައާރަފުކޮށްފިއެވެ.
އުރީދޫ މައި އޮފީހުގައި މިއަދު ބޭއްވި ހަފްލާއެއްގައި އޭއާރް ލެންސާއި ޖިއޯ-ފިލްޓާ ފައްޓަވައިދެއްވީ އެ ރަސްމިއްޔާތު ޝަރަފުވެރިކޮށްދެއްވި ކޮމިއުނިކޭޝަންސް އެންޑް ޓެކްނޮލޮޖީ މިނިސްޓަރު އައިޝަތު ޝައުނާ އެވެ.
މި ހަފްލާގައި އުރީދޫ މޯލްޑިވްސްގެ މެނޭޖިންގ ޑިރެކްޓަރު އަދި ސީއީއޯ ހާލިދު ހަސަން އަލް-ހަމާދީ އާއި ސްނެޕްޗެޓްގެ ކެރިއާ ޕާޓްނާޝިޕްސް މެނޭޖާ ބަޝީރް ބުމެޑީން ވެސް ބައިވެރިވެވަޑައިގަތެވެ.
އުރީދޫގެ އެމްޑީ ހާލިދު ވިދާޅުވީ މި ޕްރޮމޯޝަން ފެށުމުގެ ބޭނުމަކީ ރާއްޖެ އަންނަ ފަތުރުވެރިންގެ ތަޖުރިބާތައް ހިއްސާކުރަން ފަސޭހަކޮށްދިނުން ކަމަށެވެ. އަދި ސްނެޕްޗެޓްގެ "އެޑްވާންސްޑް ޓޫލްސް" ބޭނުންކޮށްގެން އެކަން ކުރަން "ތަފާތު، މަޖާ" ގޮތަކަށް އެ ތަޖުރިބާތައް ކިޔައިދެވޭނެ ކަމަށް ވެސް ހާލިދު ވިދާޅުވިއެވެ.
ސްނެޕްޗެޓާ އެކު އުރީދޫން މި ފެއްޓެވި ޕާޓްނާޝިޕަށް ތައުރީފުކުރައްވަމުން ޓެކްނޮލޮޖީ މިނިސްޓަރު ޝައުނާ ވިދާޅުވީ، ކޮވިޑް ބަލިމަޑުކަމުން އަރައިގަތުމުގައި ޓެކްނޮލޮޖީގެ އެހީގައި ނުހަނު ބޮޑު އެހީތެރިކަން ލިބިފައިވާ ކަމަށެވެ. އަދި އިގްތިޞާދިގޮތުން އޮތް ފިއްތުންތަކުގެ ތެރެއިން ސްނެޕްޗެޓް ފަދަ ގާބިލު ބަޔަކާ ގުޅިގެން ރާއްޖެ ޕްރޮމޯޓްކުރުމަކީ ވަރަށް މުހިއްމު ކަމެއް ކަމަށް ވެސް ޝައުނާ ފާހަގަކުރެއްވިއެވެ.
މި ފިލްޓާތަކާއެކީ އުރީދޫން ވަނީ ސްނެޕްޗެޓަށް ހާއްސަ ޑޭޓާ އެލަވަންސްތަކެއް ލިބޭ ޕެކޭޖުތަކެއް ވެސް ތައާރަފުކޮށްފަ އެވެ.
ދުވާލަކަށް - (އެލަވަންސް: 2 ޖީބީ؛ އަގު: 10ރ.)
ހަފުތާއަކަށް - (އެލަވަންސް: 10 ޖީބީ؛ އަގު: 50ރ.)
މަހަކަށް - (އެލަވަންސް: 20 ޖީބީ؛ އަގު: 100ރ.)