އިންސާނުން އެކި އެކި ކަންކަން ކުރުމުގައި އަވަދިނެތިވާއިރު، އެ ކަންކަން ތަންފީޒުވުމާއި އެކަންކަން ކުރުމުގައި އިންސާނާގެ ކިބައިގައިވާ ސިފަތަށް ވަރަށްވެސް މުހިންމެވެ. ރުޅިގަދަ، އަޑުގަދަ، ހަޅޭލަވާ ހިތްވާ މީހުންނަށް ފަހަރުގައި ވަރަށް ފަސޭހައިން ކަންކަން ވެދާނެއެވެ. ނިޒާމުން ބޭރުން އުސޫލުން ބޭރުންނެވެ. ހަމަ އާއި އިންސާފުންވެސް ބޭރުންނެވެ. ނަމަވެސް ކޮންމެ ހާލެއްގައިވެސް ކެތްތެރިވާ މީހާ، ކެތްކުރާ މީހާއަށް އެހާ ފަސޭހައިން ކަންކަން ވެގެން ނުގޮސްފާނެއެވެ. ނަމަވެސް ކެތްތެރިވި މީހާއަށް ކަންކަން ވެގެންދާނީ އުސޫލާއި އެއްގޮތަށް ހަމައާއި އިންސާފުގެ ތެރެއިންނެވެ.

އާދޭހެވެ! ކެތްތެރިކަމުގެ ސިފަ އަކީ އަހަރެމެން ކޮންމެ އިންސާނެއްގެ ކިބައިގައިވެސް ވަރަށް ބޮޑަށް އަށަގަނެފައި ހުންނަން ޖެހޭނޭ ސިފައެކެވެ. މިކަމަށް އަހަރެމެންގެ މާތްވެގެންވާ އިސްލާމް ދީންވެސް ބާރުއަޅައެވެ. އަދި ދީނުގެ ކިތަންމެ އަޅުކަމެއްގައި ކެތްތެރިކަމުގެ ސިފަ އަކީ މަޖުބޫރު ސިފައެކެވެ. މި ހިނގާ ރޯދަމަހަކީ ކެތްތެރިކަމުން އިސްލާމީ އުންމަތް ޖަރީވެދާ މަހެކެވެ. ނަމަވެސް ހިތާމައަކީ އިންސާނުންގެ ތެރޭގައި، މުސްލިމުންގެ ތެރޭގައި ކެތްތެރިކަމޭ މި ކިޔާ ސިފައިގެ ކުޑަ ނަމަވެސް އަސަރެއް ނުވާ މީހުން އުޅޭކަމެވެ. އަދި މިއީ މަދު އަދަދެއްވެސް ނޫނެވެ.

އަހަރެމެން ދިވެހިންގެ އާދައިގެ ތެރޭގައި ކުރަންބޭނުންވާ ކަންކަން ނުވެ ލަސްވުމުން، އެކަންކަމުގެ އިންތިޒާރުގައި މާގިނަ ދުވަހު ތިބެން ޖެހުމަކީ މަދުފަހަރެއްގައި ނޫނީ ނުވާ ކަމެކެވެ. ޑަކްޓަރަށް ދެއްކުމަކީވެސް ރަށްފުށުގައި ވަރަަސް ފަސޭހަ ކަމެކެވެ. އަދި އެނޫންވެސް ހިދުމަތް ހޯދުމުގައި ރަށްފުށުގައި މާ އުނގަދޫކަމެއް ނެތެވެ. ނަމަވެސް ރާއްޖޭގެ ވެރިކަން ކުރާ މާލެ އެއާއި މުޅިން ތަފާތެވެ. މާލޭގައި ހިދުމަތެއް ހޯދަން ކިއުއެެއްގައި ނުޖެހޭ ތަނެއް މަދެވެ. ކަންމަތީ ފިހާރައަކަށް ވަނަސް، ދައުލަތުގެ އިދާރާއަކަށް ވަނަސް، ދިގު ކިއުއެއްގައި ނުޖެހި ހިދުމަތެއް ލިބޭގޮތެެއް ވަރަށްވެސް މަދެވެ.

އާދޭހެވެ! މިއީ އަހަރެމެންނަށް ޖެހިފައިވާ ތަކުލީފެއްކަމަށް ގިނަ މީހުން ގަބޫލު ކުރެއެވެ. ނަމަވެސް އަހަރެމެން މުސްލިމުންނަށްވީތީ، މި ކަންކަމަކީ އަހަރެމެންނަށް ކުރިމަތިވެފައިވާ އިމްތިހާނެއްކަން ގަބޫލުކުރުން ކީއްވާނެތޯއެވެ. ހިދުމަތްތަކުގައި ދިގު ކިއުތަކުގައި ޖެހުމާއި ކަންކަން ވާލެއް ލަސްވަނީ، ހަމަ އަހަރެމެންފަދަ އެހެން އިންސާނަކަށް އެ ހިދުމަތްތައް ދޭތީކަން ގަބޫލުކުރަންވާނެއެވެ. އަދި ހަަމަ އަހަރެންނެކޭ އެއްފަދައިން އެ ހިދުމަތުގެ އިންތިޒާރުގެ އަހަރެންނަށް ވުރެ ގިނައިރު، ހޭދަކުރި މީހުންވެސް އެބަތިބިކަން ހަނދާން ކުރަންވާނެއެވެ. މިއީ ކެތްތެރިވުމަށް އަހަރެމެންނަށް ލިބޭ ހިތްވަރަކަށް ވެދާނެއެވެ.

އިންސާނާގެ ކެތްތެރިކަން ފިލާ ދިއުމުން، އިންސާނާގެ ރީތި ސޫރަ ހުތުރުވާގޮތް ވެއެވެ. ބުނަން ނުވާ ކިތަންމެ އެއްޗެއް ދުލުން ބުނެވޭ ގޮތް ވެއެވެ. ކުރަން ނުވާ ކިތަންމެ ކަމެއް ކުރެވޭތަން އާދެއެވެ. އަދި ކުރަން ޖެހޭ ކިތަންމެ ކަމެއް ނުކުރެވޭތަންވެސް އާދެއެވެ. މިފެންނަނީ ހަމަހިމޭން އިންސާނެއްގެ ތީރި ސޫރަ މުޅިން މުޑުދާރުވެދާ ކަންކަމެވެ. މިއީ އެއްވެސް ހާލެއްގައި ބުއްދި އާއި ވިސްނުން ހެވަށް ލިބި ހުރި އިންސާނަކު ކަން ކޮށްގެންވާނޭ ގޮތެެއް ނޫނެވެ.

ކަންކަމަށް ކެތްކުރުމާއި ކަންކަމުގައި ލަސްވުމާއި ގިނަ އިރު ނެގުމަކީ އެއްވެސް އިންސާނަކަަށް ބަރުދާސްތުކުރަން ފަސޭހަ ވާނޭ ކަމެއް ނޫނެވެ. ނަމަވެސް އެކަން އިންސާނާ ކުރަންވަނީ އެކަމަށް އަމުރުވެފައި ވާތީއެވެ. އެހެންކަމުން އަހަރެމެންނަކީ ކެތްތެރި ބައެއް ކަމުގައި ލައްވާ، ޝަކުވާ މަދު ޒުވާބުކުރުމާއި ރުޅިވެރިކަން މަދު ބައެއް ކަމުގައި ލައްވާށިއެވެ.