އެސްޓީއޯ އިން "ޕްލާސްޓިކް ނޫން ގޮތެއް ރިވާޑްސް" ގެ ނަމުގައި އެސްޓީއޯ ޕީޕަލްސް ޗޮއިސް ފިހާރައިން ބާޒާރުކުރާއިރު ފޮތިކޮތަޅު ލިބޭ ކެމްޕެއިނެއް ފަށައިފިއެވެ.
އެސްޓިއޯ ޕީޕަލްސް ޗޮއިސްގައި މިއަދު ހެނދުނު ބޭއްވި ރަސްމިއްޔާތެއްގައި ވާހަކަ ދައްކަމުން އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު ވިދާޅުވީ، ޕްލާސްޓިކް ނޫން ގޮތެއް ހޯދަން ޖެހިފައިވާ ކަމަށެވެ.
މި ހަފްލާގައި އެސްޓިއޯގެ އެމްޑީ އަމްރުގެ އިތުރުން ދިރާގުގެ ސީއީއޯ އަދި އެމްޑީ އިސްމާއިލް ރަޝީދު އާއި ޔޫއެންޑީޕީ އިން ރާއްޖެ އަށް ކަނޑައަޅާފައި ހުންނަ ރެޒިޑެންޓް ރެޕްރެޒެންޓޭޓިވް އެންރީކޯ ގަވެގްލިއާ ބައިވެރިވެޑައިގަތެވެ.
މިއީ ޕްލާސްޓިކް ނޫން ގޮތެއް މި ކެންޕެއިންގެ ދަށުން މޯލްޑިވްސް އޮތެންޓިކް ކްރާފްޓްސް ކޯޕަރޭޓިވް ސޮސައިޓީ، ޖީއީއެފް ސްމޯލް ގްރާންޓްސް ޕްރޮގްރާމް ފަންޑިންގެ ދަށުން، ޔޫއެންޑީޕީގެ އެހީތެރިކަމާއިއެކު އެސްޓީއޯ އަދި ދިރާގުން ޕާޓްނަރުންގެ ގޮތުގައި ބައިވެރިވެ، ފެށި ހަރަކާތެކެވެ.
މި ކެމްޕެއިންގެ މައިގަނޑު މަގްޞަދަކީ އެއްފަހަރު ބޭނުންކޮށްފައި އުކާލާ ޕްލާސްޓިކް ކޮތަޅުގެ ބަދަލުގައި ބާޒާރުކުރުމަށް ފޮތިކޮތަޅު ބޭނުންކުރުން އާދަކުރުމެވެ.
އަމްރު ވަނީ މިދިޔަ އަހަރު ވެސް އެ ކުންފުނިން ޕްލާސްޓިކާ ދެކޮޅަށް ފެށި ހަރަކާތްތަކުގެ ތެރެއިން ފާމަސީތަކުގައި ޕްލާސްޓިކް ކޮތަޅު ބޭނުންކުރުން ހުއްޓާލާފައިވާ ކަމަށާއި އޭގެ ސަބަބުން ރާއްޖޭން ކަނޑަށް އުކާލާ ޕްލާސްޓިކްގެ ތެރެއިން ބޮޑު މިންވަރެއް މަދުކުރެވިފައިވާ ކަމަށެވެ. އަދި އެސްޓީއޯ ޕީޕަލްސް ޗޮއިސްގައި މި ފެށި ކެމްޕެއިނާއެކު ޕްލާސްޓިކް ކޮތަޅު ބޭނުންކުރާ މިންވަރު ވަރަށް ބޮޑު ތަނުން ކުޑަވެގެންދާނެ ކަމަށެވެ. އަދި މީގެއިތުރުން، މިފަދަ ކެމްޕެއިނެއްގައި ބައިވެރިވުމަކީ އެ ކުންފުންޏަށް ލިބޭ އުފަލެއް ކަމަށް ވެސް އަމްރު ފާހަގަކުރެއްވިއެވެ.
އެސްޓީއޯ އަދި ދިރާގު ޕާޓްނަރުންގެ ގޮތުގައި މިއަދު ފެށި ކެމްޕެއިނުގައި ރަޖިސްޓްރީވުމަށްޓަކައި، "ޕްލާސްޓިކް ނޫން ގޮތެއް ރިވާޑްސް" އެޕްލިކޭޝަން، ފޯނަށް ޑައުންލޯޑްކުރުމަށްފަހު އެސްޓީއޯ ޕީޕަލްސް ޗޮއިސް އަށް ގޮސް ވިޔަފާރިކުރުމުން ލިބޭ ބާޒާރުކޮތަޅުގައިވާ އެންއެފްސީ ޗިޕް، ފޯނު މެދުވެރިކޮށް ސްކޭންކޮށްލުމުން ބައިވެރިވެވޭނެ އެވެ. އަދި މި ބާޒާރުކޮތަޅު ބޭނުންކޮށްގެން ވިޔަފާރިކުރާ ކޮންމެ ފަހަރަކު ރިވާޑްސް ޕޮއިންޓް ލިބޭނެ އެވެ. އަދި ވަކި ވަރަކަށް ވިޔަފާރިކުރުމުން ލިބޭ ޕޮއިންޓްތައް ބަދަލުވެގެންދާނީ ރިވާޑްސް ނުވަތަ ހަދިޔާއަށެވެ. ހަދިޔާގެ ގޮތުގައި ދިރާގު ޑޭޓާ އަދި އެސްޓީއޯ އިން ގިފްޓް ހެމްޕާސް ލިބޭނެ އެވެ.