މުސްލިމުންގެ ހިތްތަކުގައި މަސްޖިދުލް އަޤްޞާ އަަށް ދެވިފައިވާ ލޯތްބަކީ ފަނޑުވުމެއް ނެތް ލޯތްބެކޭ އަހަރެމެން ބުނަމުއެވެ. ނަމަވެސް ކޮންމެ ރަމަޟާން މަހަކާއި ދިމާކޮށް ފަލަސްޠީނުގެ ބިމަށް ނުހައްގުން ވެރިވެގަނެފައިތިބި މީހުން، ފަލަސްޠީނުގެ ރައްޔިތުންނަށް ކުރާ އުނދަގޫތަކާއި ޖެއްސުންތަކާއި އަދި މަސްޖިދުން އަޤްޞާ އަށް ދެމުންދާ ގެއްލުންތަކުގެ ހައްގުގައި މާ ފާޅުކަން ބޮޑު ގޮތެއްގައި މަސައްކަތް ކުރާތީ ނުފެނެއެވެ. ފާޅުގައި ބަސްބުނާތީ ނުއެއް ފެނެއެވެ. އަދި "އެކްޝަން" ފިލްމެއް ބަލާހެން، އިސްރާއީލު ސިފައިން މުސްލިމުންނަށަ އަނިޔާކުރާތަން ބަލައެވެ. ހަގީގަތުގައި ބަސް ބުނުމުގެ ގާބިލުކަން ނުވަތަ ހައްގު ލިބިގެން ނުވާ މުސްލިމުންގެ ހިތްތަކުގައި އަޤްޞާ އަކީ އަދި މާ މުޤައްދަސް ތަނެކެވެ. 

މިއީ އެފަދަ ވާހަކައެކެވެ. ހިތާއި ނަފްސާއި، ހިތުގެ ސާފު އަގީދާއިން ފަލަސްޠީނަށާއި މަސްޖިދުލް އަޤްޞާއަށް އޮތް ލޯބި، އަދި ފަލަސްޠީނުގެ ރައްޔިތުންނަށް އޮތް ހަމްދަރުދީ ހާމަކޮށްދިން ވީޑިއޯއެއްގެ ވާހަކައެވެ. މިއީ މައްކާގެ ހަރަމްފުޅުގެ ތެރޭގައި މި ހިނގާ ރަމަޟާންމަހު ކުރެވިފައިވާ ވީޑިއޯއެކެވެ. މި ވީޑިއޯގައި ފެންނަނީ ފަލަސްޠީނަށް ނިސްބަތްވާ ޒުވާނަކު ވީޑިއޯ ކުރަމުން ދަނިކޮށް ފެންނަ އުމުރުން ދުވަސްވީ ދެމަފިރިންނެވެ. އެ ދެމަފިރިން ފޮޓޯ އެއް ނަގަން އުޅޭ މަންޒަރު ފެނުމުން، ފަލަސްޠީނުގެ މި ޒުވާނާ އެ ދެމަފިރިން ކުރެން އެ ދެމަފިރިންގެ ފޮޓޯ ނަގައިދެންތޯ އެދެއެވެ. ދެން އެ ދެމަފިރިން މި ޒުވާނާގެ އަތަށް އެމީހުންގެ ފޯނު ދެއެވެ. ދެން ފޮޓޯ ނެގުމަށް ފަހު، ފޯނު އެމީހުންނާ ހަވާލު ކުރަމުން ކޮން ގައުމެއްތޯ އެހިއެވެ. 

މި އުމުރުން ދުވަސްވެފައިތިބި މި ދެމަފިރިންނަކީ ޓިއުނީޝިޔާ އަަށް ނިސްބަތްވާ ދެމަފިރިން ކަމުގައި ބުނެއެވެ. ދެން މި ޒުވާނާ އަކީ ކޮން ގައުމެއްގެ މީހެއްތޯ އެމީހުން ސުވާލުކުރެއެވެ. އަދި ޔަމަނު މީހެއްތޯ އެހުމުން މި ޒުވާނާ ނޫނެކޭ ބުނެ، މި ޒުވާނާއަކީ ފަލަސްޠީނުގެ ޒުވާނެއްކަމަަށް ބުނެއެވެ. ދެން އުމުރުން ދުވަސްވީ އެ ދެމަފިރިންގެ ތެރެއިން ފިރިހެން މީހާ ތަކުރާރުކޮށް އެއީ ފަލަސްޠީނުގެ ޒުވާނެއްތޯ އަހައެވެ. ދެން އެ ޒުވާނާ ތަކުރާރުކޮށް ޖަވާބު ދިނުމުން، އެ ފިރިހެން މީހާގެ ލޮލުން ހިފެހެއްޓުމެއް ނެތް ކަރުނަ އޮހޮރެން ފަށައެވެ. އަނގައިން ބަސް ބޭރުނުވާ ހާލު މި ޒުވާނާގެ ގައިގައި ބައްދާލައެވެ.

ގިސްލަ ގިސްލާފައި ރޮމުން، ފަލަސްޠީނަށް ނަސްރު ދެއްވާނޭ ކަމަށާއި އަދި ނަސްރު ދެއްވުން އެދި ދުޢާ ކުރިއެވެ. ރޮމުން ގިސްލަމުންނެވެ. ތަކުރާރުކޮށެވެ. ދެން އެ ފިރިހެންމީހާގެ އަންހެނުންވެސް ފެންކަޅިވެފައިވާ ހާލުގައި ފަލަސްޠީނަށް ނަސްރު ދެއްވުން އެދި ދުޢާ ކުރިއެވެ. އެ ފިރިހެންމީހާގެ ލޮލުން ކަރުނަތަށް އޮހޮރުނީ ހިފެހެއްޓުމެއް ނެތިއެވެ. އަދި އެ ވީޑިއޯކޮޅު ނިމުނު އިރުވެސް އެ ފިރިހެންމީހާ ރުއިން ހުއްޓައެއް ނުލައެވެ.

އޭ އެންމެހާ މުސްލިމުންނޭވެ! މުސްލިމު ތަކުންގެ ވެރިންނޭވެ! ބަައިނަލްއަގުވާމީ ފެންވަރުގައި ބަސްބުނުމާ ހަރަކާތް ކުރުމުގެ ގާބިލުކަން ލިބިގެންވާ އެންމެހާ މުސްލިމުންނޭ! އަހަރެމެންގެ ހިތްތަކުގައި ފަލަސްޠީނަށާއި މަސްޖިދުލް އަޤްޞާއަށް އޮންނަން ވާނީ އެފަދަ ލޮތްބެކެވެ. އެ ފިރިހެން މީހާ އެހާވަރަށް ރޮއުނު އެއް ސަބަބަކީ އޭނާ ފަލަސްޠީނުގެ ހައްގުގައި ކިތަންމެ ކަމެއް ކުރަން ބޭނުން ވިޔަސް އެފުރުސަތު އޭނާއަށް ނުލިބޭތީއެވެ. އަދި އިސްލާމީ ގައުމުތަކުން ފަލަސްޠީނަށް ވާގިވެރި ނުވާތީއެވެ.

ފަލަސްޠީނަކީ މުސްލިމުންގެ ޢުމްރާ ދަތުރު ތަކުގައި ތިންވަނަ ހަރަމެއްގެ ގޮތުގައި ޒިޔާރަތްކުރާ ބިމެކެވެ. ހުރިހާ މުސްލިމުންވެސް ފަލަސްޠީނާއި މަސްޖިދުލް އަޤްޞާ އާއި އެ ސަރަހައްދުގައިވާ ގުއްބަތުއް ޞަހްރާ އާއި އަޤްޞާ އާއި ގުޅިފައިވާ އާސާރީ ކިތަންމެ އެއްޗެއް ދެކެން ބޭނުންވެއެވެ. ނަމަވެސް ފަލަސްޠީނުގެ ރައްޔިތުންގެ ހައްގުގައި ބަސްބުނާތީ ނުފެނެއެވެ. ވިސްނާލަބަލާށެވެ! އަހަރެމެން އިސްލާމީ ގައުމުތަކުގެ ވެރީންނަކީ އިސްވެ ބުނެވުނު ވީޑިއޯގައި އެ ފެންނަ ފިރިހެންމީހާ ފަދައިންވާނަމަ، މިއަދު ފަލަސްޠީނުގެ ޣައްޒާގައި އޮންނާނީ އަމާންކަމެވެ. މަސްޖިދުލް އަޤްޞާގައި ތަޅާފޮޅުމެއް ނުހިނގާނެއެވެ. އޮންނާނީ ސުލްޙައާއި މަސަލަސްކަމެވެ. އަމާންކަމާއި ރައްކާތެރިކަމެވެ.

މުސްލިމުންގެ ކަންކަން ހިންގެވުމަށް، މާތް ﷲ ހޮއްވަވާ އިހްތިޔާރު ކުރައްވަވާފައިވާ އެންމެހާ ވެރީންނަށް ހިދާޔަތާއި ހެޔޮވިސްނުން ދެއްވާށިއެވެ. އަދި ނަސްރާއި ކާމިޔާބީ މިންވަރު ކުރައްވާށިއެވެ! އާމީން.