ނިމިގެން ދިޔަ މި އަހަރުގެ ފުރަތަމަ ކުއާޓަރުގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް އާމްދަނީގެ ގޮތުގައި 4.04 ބިލިއަން ރުފިޔާ ލިބިއްޖެ އެވެ.
މިއަހަރުގެ ފުރަތަމަ ކުއާޓަރުގައި އެސްޓީއޯ އަށް ލިބުނު އާމްދަނީ ވަނީ މިދިޔަ އަހަރުގެ ހަތަރުވަނަ ކުއާޓަރަށް ވުރެ 19 އިންސައްތަ އިތުރުވެފައެވެ. 2021 ވަނަ އަހަރުގެ ހަތަރުވަނަ ކުއާޓަރުގައި އެސްޓީއޯ އަށް އާމްދަނީގެ ގޮތުގައި ލިބިފައިވަނީ 3.3 ބިލިއަން ރުފިޔާ އެވެ.
ފުރަތަމަ ކުއާޓަރުގައި އެސްޓީއޯގެ އާމްދަނީ އިތުރުވެފައިމިވަނީ ދުނިޔޭގެ ބާޒާރުގައި ތެލުގެ އަގު މައްޗަށް ދިޔުމާއެކު، އެސްޓީއޯއިން ވިއްކި ތެލުގެ އަދަދު މިދިޔަ އަހަރުގެ ފަހު ކުއާޓަރާ އަޅާބަލާއިރު 14 އިންސައްތަ އިތުރުވުމުންނެވެ. އެހެންނަމަވެސް، ދުނިޔޭގެ ބާޒާރުގައި ތެލުގެ އަގު ބޮޑުތަނުން އިތުރުވަމުންއައިއިރު ނިސްބަތުން އެސްޓީއޯ އިން ތެލުގެ އަގުބޮޑުކޮށްފައެއްނުވެއެވެ.
އެ ކުންފުނީގެ ވެބްސައިޓްގައި ޢާއްމުކޮށްފައިވާ މާލީ ހިސާބުތަކުން ދައްކާގޮތުން، މިދިޔަ ކުއާޓަރުގައި އޮޕަރޭޓިން ޕްރޮފިޓްގެ ގޮތުގައި އެސްޓީއޯ އަށް 209 މިލިއަން ރުފިޔާ ލިބިފައިވެއެވެ. މީއީ 2021 ވަނަ އަހަރުގެ ހަތަރުވަނަ ކުއާޓަރާ އަޅާބަލާއިރު 15 އިންސައްތައިގެ އިތުރުވުމެކެވެ.
ޓެކްސްއަށް ކެނޑުމުގެ ކުރިން، އެސްޓީއޯ އަށް މިދިޔަ ކުއާޓަރުގައި 177 މިލިއަން ރުފިޔާ ލިބިފައިވާއިރު، މިއީ އޭގެ ކުރީ ކުއާޓާ އަށް ވުރެ 15 އިންސައްތައިގެ ކުރިއެރުމެކެވެ. އަދި ޓެކްސްއަށް ކެނޑުމަށްފަހު މި ކުއާޓާރުގެ ސާފު ފައިދާއަކީ 150 މިލިއަން ރުފިޔާ އެވެ. މިއީ އޭގެ ކުރީ ކުއާޓަރާ އަޅާބަަލާއިރު 14 އިންސައްތައިގެ އިތުރުވުމެކެވެ.