އަލިކަން ހޯދުމަށް ދުނިޔޭގެ އެންމެ ޤަދީމީ ޒަމާނުއްސުރެ ބޭނުން ކުރަމުން އައި އެކައްޗަކީ އުއްބައްތި! އުއްބައްތި އެންމެ ފުރަތަމަވެސް ދުނިޔޭގައި ބޭނުން ކުރެވެން ފެށުނު ސާފު ތާރީޚެއް އެނގޭކަށް ނެތް. އުއްބައްތިއާއި މެދު މިއަދުވެސް އަޖައިބުވާ ކަމަކީ މިހާ ޤަދީމީ އެއްޗެއް މިއަދުވެސް އަހަރެމެން އާދަވެ ބޭނުން ކުރާކަން. ކަރަންޓު ދިއުމުން ދިއްލާނޭ ބޮކިތަކާ ބައްތިތަކާ ހުއްޓެއް ކަމަކު، މިހާރުވެސް އުއްބައްތިއަކީ އާންމުކޮށް މީހުން ބޭނުން ކުރާ އެއްޗެއް.

އެނގޭތަ! ބުނެވޭ ގޮތުގައި ޤަދީމީ ޒަމާނުގައި އުއްބައްތި އުފައްދާފައި ހުރީ ކުޅަނދުރު ހަތާ ބޭނުން ކޮށްގެން. އަދި ބައެއް ޖަނަވާރުންގެ ސަރުބީވެސް ބޭނުން ކޮށްފައިވޭ. މޫދުގައި ނުވަތަ ކޯރުގައި އުޅޭ ހާއްސަ މަހެއްގެ، މަސްގަނޑާއި ހަންގަނޑާ ދެމެދުގައިވާ ސަރުބީގެ ފަށަލައެއްވެސް ޤަދީމީ ޒަމާނުގެ އުއްބައްތިތައް އުފެއްދުމުގައި ބޭނުން ކޮށްފައިވޭ. ނަމަވެސް މިއަދު އުފައްދާ އުއްބައްތި ތަކުގެ ތާސީރަކީ ކާއްޓާއި ކާށިތެލާއި ޕެޓްރޯލިއަމްގެ ބައެއް މާއްދާތައް ކަމަށް ދިރާސާވެރިން ބުނޭ.

ދެވަނަ ބޮޑުހަނގުރާމަ އާއި ގުޅިގެން ދުނިޔެއަށް ކުރިމަތިވި ހައިހޫނުކަމާއި ބޮޑު ތަދުމަޑުކަމުގެ ތެރޭގައި، ހުޅަނގުގެ ބައެއް ގައުމުތަކުގެ މީހުން އުއްބައްތީގެ އުއް ކައި އުޅުނު ކަމަށް ބުނެވޭ. ދިރާސާވެރިން ފާހަގަ ކުރާ ގޮތުގައި މިގޮތަށް ކައި އުޅުނީ ކުޅަނދުރު ހަތައިންނާއި ދިރޭތަކެތީގެ ސަރުބީއިން އުފައްދާފައު ހުރި އުއް.

ނަމަވެސް މި ޒަމާނުގައި ޕެޓްރޯލިއަމް ބޭނުން ކޮށްގެން މި އުފައްދާ އުއް މިއީ ކެއުމުން ގެއްލުންތަކެއް ކުރިމަތި ކުރުވަފާނޭ އެއްޗެއް.