ސްޓެލްކޯގެ ކަރަންޓު ބިލްގެ ޖޫރިމަނާ މަޢާފުކުރެވޭނެ އުޞޫލެއް ހަދަމުން އަންނަ ކަމަށް އެ ކުންފުނިން ހާމަކޮށްފިއެވެ.
ސަންގުޓީވީގެ "ހަބަރަށްފަހު" ޕްރޮގްރާމުގައި ވާހަކަދައްކަމުން ސްޓެލްކޯ އިތުރަށް ހަރުދަނާ ކުރުމަށް އޮނިގަނޑަށް ގެނެސްފައިވާ ބަދަލުތަކާއި، ކުންފުންޏާއި، ކަސްޓަމަރުންގެ ކުރިއެރުމަށް ގެންގުޅުއްވާ ތަސައްވުރާއި ގުޅޭ މައުލޫމާތުތައް ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފު އާދަމް ވަނީ ހިއްސާ ކުރައްވާފައެވެ.
ސްޓެލްކޯ އަކީ މިހާރުވެސް ދުޅަހެޔޮ ކުންފުންޏެއް ކަމަށާއި އެކަމަކު އަދިވެސް އެ ކުންފުނި އިތުރަށް ހަރުދަނާ ކުރުމުގެ ގޮތުން ރަނގަޅު ކުރަންޖެހޭ ކަންތައްތައް ހުރި ކަމަށާއި އެގޮތުން ކަރަންޓު ބިލްގެ ޖޫރިމަނާ މަޢާފްކުރެވޭނެ އުޞޫލެއް ނެތުމުން އެ މަސައްކަތްތައް ފަށާފައިވާ ކަމަށް ވެސް ޝަރީފު ވިދާޅުވިއެވެ.
ޝަރީފު ވިދާޅުވީ، މިހާތަނަށްއައިއިރު ކަރަންޓު ބިލްގެ ޖޫރިމަނާ މަޢާފްކުރެވޭނެ އުޞޫލެއް ހެދިފައިނެތުމުން އެކަމުގެ ބުރަ ރައްޔިތުންނަށް އިންތިހާއަށް އުފުލަންޖެހިފައިވާ ކަމަށެވެ. އެހެންކަމުން އެކަމަކީ، ކަރަންޓު ބިލް ނުދެއްކޭ ފަރާތްތަކަށް ލުއިފަސޭހަ ގޮތްތަކެއް ހޯދައިދިނުމުގެ ގޮތުން ކޮންމެހެން ކުރަންޖެހިފައިވާ މުހިއްމު ކަމެއް ކަމަށެވެ.
މީގެއިތުރުން، ޝަރީފު ވިދާޅުވީ ސްޓެލްކޯގެ ހިދުމަތްތައް ޒަމާނީކުރުމުގެ މަސައްކަތްތައް ކުރަމުން އަންނަ ކަމަށާއި، އެގޮތުން އެއްފަހަރު ހިދުމަތަށް އެދޭ ފަރާތަކުން ދެވަނަ ފަހަރަށް ހިދުމަތަށް އެދޭ ނަމަ އެ ފޯމް އަނެއްކާ ފުރަންޖެހުން ފަދަ ތަކުލީފުތައް ކުޑަކުރުމުގެ އިންތިޒާމްތައް ވެސް ހަމަޖެއްސުމަށް މަސައްކަތްކުރަމުން އަންނަ ކަމަށެވެ.
ޝަރީފު އިތުރަށް ވިދާޅުވީ، ސްޓެލްކޯގެ ހިދުމަތް ފުޅާކޮށް، ރައްޔިތުންނަށް ލުއިފަސޭހަ ގޮތްތައް ހޯދައިދިނުމުގެ ގޮތުން މިހާރު ހަ ރަށެއްގައި ހުރި އިންޖީނުގެތައް ހުރިތަން ނޫން އެހެން ސަރަހައްދަކަށް ބަދަލުކުރުމުގެ މަސައްކަތްވެސް ކުރަމުން އަންނަ ކަމަށެވެ.