ދުނިޔޭގައި ކަންކަން ހިނގަނީ އެ ކަންކަމާއި އެކަންކަމުގެ އިންތިޒާމުގެ ފަހަތުގައި ބަޔަކު ވާ އަގުބޮޑު ގުރުބާނީތަކަކާއި އެކުގައެވެ. ހިންގުމާ ހިންގުމުގެ ނިޒާމަކީ ކަމުގެ ޠަބީއަތުން، ފެންނަ ފެނުމަށް ވަރަށްވެސް ފަސޭހަ ކަމެކެވެ. ނަމަވެސް އެ އޮޑިއަށް އަރާ، ކަނޑުގައި ދުއްވާލުމުން، އެކަމުގައި ހުރި ބުރަކަން އިހުސާސް ކުރެވޭނެއެވެ. ނަމަވެސް އެ ބުރަކަމާއި އެކުގައި ވިޔަސް، ހިންގުމާ ހަވާލުވެ ތިބޭ މީހުން ސާލުކަން ދޭން ޖެހޭ ބައެއް މުހިންމު ކަންކަން އެބަހުއްޓެވެ.

ތަންތަނާއި ކަންކަމުގެ ހިންގުމާއި ހަވާލުވެ ތިބޭމީހުން، އެމީހުންގެ ދަށުން މަސައްކަތް ކުރާ މީހުންނާއި މެދު ކަންކުރާ އުސޫލެވެ. މަސައްކަތުގެ މާހައުލުގައި ބޭއްވޭ ބައްދަލުވުންތަކުގައި، އިސްވެރިން ނުވަތަ ކަންކަމާއި ހަވާލުވެފައި ތިބޭ ފަރާތްތަކުން، އެމީހުންގެ ދަށުން މަސައްކަތްކުރާ މީހުންނަށް އަބަދުވެސް ދޭ ނަސޭހަތެއް އޮވެއެވެ. އެއީ ބުނެކިޔައިގެން ކަންކަން ކުރަން ނުހެދުމާއި، އަމިއްލައަށް އިސްނަގައިގެން، އަމިއްލަ އަަށް ފެނިގެން ކަންކަން ކުރަން ދޭ އިރުޝާދާ ނަސޭހަތެވެ. އާދޭހެވެ! ވަރަށްވެސް ރަނގަޅު ވާހަކައެވެ. ބުނެކިޔައިގެން ކަން ކުރުމަށްވުރެ، އަމިއްލަ އަށް ފެނިގެން ކަން ކުރާނަމަ އެއީ އެ ތަނެއްގެ ނުވަތަ އެ ބައެއްގެ މަސައްކަތުގެ ފެންވަރު، ވަރަށް ބޮޑަށް ކުރި އަރައިގެން ދާނޭ ކަމެކެވެ. އެހެންކަމުން، އެކަން ކަމުގައި ހުރިހާ މުވައްޒަފުން ސަމާލުކަން ދެއެވެ.

ކަންއޮތީ މިހެން ކަމުގައި ވުމާއި އެކު، ތަންތަނާއި ކަންކަމުގެ ޒިންމާ އާއި ހިންގުމުގެ މަސްއޫލިއްޔަތު ނަގައިގެން ތިބޭ މީހުންވެސް، އަމިއްލަ އަށް ފެނިގެން ކަންކަން ކުރަންވާނެއެވެ. އަމިއްލަ އަށް ފެނިގެން ކަން ކުރަން ވާނީ ހަމައެކަނި ދަށުން މަސައްކަތް ކުރާ މުވައްޒަފުންނެއް ނޫނެވެ. ދަށުން މަސައްކަތް ކުރާ މުވައްޒަފުންގެ ހުރިހާ ކަމެއް ބަލަހައްޓާނޭ ފަރާތަކީ ހިންގުމާ ހަވާލުވެ ހުންނަ މީހާއެވެ. އެހެންކަމުން، އެމީހެއްގެ ދަށުގައި މަސައްކަތް ކުރާ މުވައްޒަފުންގެ ކަންކަން، އެ މުވައްޒަފުން ބުނެ ކިޔުމުގެ ކުރިން، ހިންގުމާ ހަވާލުވެ ހުންނަ ފަރާތުން ކޮށްދޭންވާނެއެވެ.

ބައެއް މިސާލުތަކަށް ޖެހިލާނަމެވެ. އެކައްޗަކީ މުސާރަައެވެ. ހިންގުމާ ހަވާލުވެ ހުންނަ މީހާ، އޭނާގެ ދަށުން މަސައްކަތް ކުރާ މީހުން ކުރެ، އަމިއްލައަށް ފެނިގެން ކަންކަން ކުރަން ބުނާއިރު، ގިނަ ފަހަރަށް އޮންނަނީ ހިންގުމާ ހަވާލުވެ ހުންނަ މީހާއަށް، އޭނާގެ ދަށުން ތިބޭ މުވައްޒަފުންނަށް މުސާރަ ނުދެވިފައެވެ. މުސާރަ ދެވެނީ އެ މުވައްޒަފުން ކިޔާ އަޑުގަދަ ކުރީމައެވެ. ސަލާމާއި އާއިލީ ޒިންމާއާއި އަހަރީ ޗުއްޓީ ހޯދަންވެސް މުވައްޒަފު މީހާ ޖެހެނީ ސަލާން ޖަހާށެވެ. ބިދޭސީ މީހުންހެ ވިސާ އާއި ޕާސްޕޯޓުގެ ކަންކަމުގައިވެސް އެވެރިން ކިޔާ އާދޭސް ކޮށްގެން ނޫނީ ކަމެއް ކޮށްދެވޭ ކަމަކަށް ނުވެއެވެ. މާދަމާގެ ތާވަލާ އަންނަ ހަފްތާގެ މަސައްކަތު ތާވަލު ހޯދުމުގަައިވެސް މުވައްޒަފުމީހާ ޖެހެނީ އާދޭސް ކުރާށެވެ. ކަންކަމުގައި ހަދަންވީގޮތާއި ކަން ކުރަންވީ ގޮތް ބުނެ ނުދިނުމުގެ ސަބަބުން އެކަންކަމުގައި ކަން ކުރަންވީގޮތް އޮޅުން ފިލުވަންވެސް މުވައްޒަފު މީހާ ޖެހެނީ ބުނެ ކިޔާށެވެ. މިހެން ވިޔަ ނުދޭށެވެ. އަމިއްލަ އަށް ފެނިގެން ހިންގުމާ ހަވާލުވެ ހުންނަ މީހާވެސް އެތައް ކަމެއް ކުރަންވާނެއެވެ.

ބައެއްފަހަރު ހިންގުމާ ހަވާލުވެ ހުންނަ މީހާ ކަންކަމުގަައި ގޮތް ނިންމާނެއެވެ. އެފަދަ ބައެއް ހާލަތްތަކުގައި އެ ނިންމާ ގޮތެއް، މުވައްޒަފުންނަށް ބުނެ ނުދީ ހުރެއެވެ. އެއްވެސް ހާލެއްގައި ހިންގުމާ ހަވާލުވެ ހުންނަ މީހާގެ ހިތުގައި ކަންކުރުމަށް ގަސްދުކުރާ ގޮތެއް، ނުބުނާހާ ހިނދަކު މުވައްޒަފުންނަށްވެސް ނޭނގޭނޭކަން ހިންގުމާ ހަވާލުވެ ހުންނަ މީހާ ދަންނަން ޖެހޭނެއެވެ. ހަގީގަތުގައި މުވައްޒަފުންނަށްވުރެ ހިންގުމާ ހަވާލުވެ ހުންނަ މީހާގެ ޒިންމާ ބޮޑުވާނެއެވެ. މަސްއޫލިއްޔަތުވެސް ބޮޑުވާނެއެވެ. ނަމަވެސް ބައެއް މީހުންނަށް ހީވަނީ ހިންގުމާ ހަވާލުވުމަކީ ވަރަށްވެސް ފަސޭހަ ކަމެއް ކަމަށެވެ. ނަމަވެސް އެއީ ބޮޑު ޒިންމާއެކެވެ. ހިންގުމާ ހަވާލުވެ ހުންނަ ކޮންމެ މީހަކު މިކަންކަމަށް ސަމާލުވެ ފަރުވާ ބަހައްޓަންވާނެއެވެ.