ދުނިޔޭގައި ފާހަގަ ކުރާ ދުވަސްތަކުގެ ތެރެއިން މިއަދަކީވެސް ފާހަގަ ކޮށްލެވޭ ދުވަހެކެވެ. މިއަދަކީ ދުނިޔޭގެ އާބާދީގެ ބޮޑު ބަޔަކަށްޓަކާ ހާއްސަކޮށް، މުޅި ދުނިޔޭގައި ފާހަގަކުރާ ބައިނަލްއަގުވާމީ ކުޑަކުދިންގެ ދުވަހެވެ. ކުޑަކުދިންގެ ދުވަހެއް ފާހަގަ ކުރެވޭއިރު، ކުޑަކުދިންނަށް އުފާވެރި މާހައުލަކާ، ހީލާ ސަކަރާތް ޖަހާލެވޭނޭ ފުރުސަތެއް އަހަރެމެން އެބަ ފަހިކޮށްދެމުއެވެ. ނަމަވެސް މިފަދަ ދުވަހެއް އައުމަކީ ހަގީގަތުގައި އެކުދިންގެ އަގުވަޒަންކޮށް އެކުދިންނަޓަކައި ފަހުރުވެރިވުމުގެ އިތުރަށް އެކުދިންނާމެދު ސަމާލުވުމަށްވެސް އަހަރެމެންނަށް ހަނދާންކޮށްދޭ ދުވަހެކެވެ.

އާދޭހެވެ! އަހަރެމެންގެ ދަރީންނަކީ އަހަރެމެންނާ ހަވާލު ކުރައްވާފައިވާ ވަރަށް އަގުބޮޑު ނިއުމަތެއް އަދި އެހާމެ އަގުބޮޑު އަމާނާތެއް ކަމާއި މެދު އަހަރެމެން މުސްލިމުން ދެބަހެއް ނުވާނެއެވެ. އެހެންކަމުން ކުޑަކުދީންގެ ދުވަހެއް ފާހަގަ ކުރާއިރު، މިއީ ހަގީގަތުގައި އަހަރެމެން ވިސްނާލުން މުހިންމު ކަމެކެވެ. 

ކުޑަކުދިންގެ ދުވަހުގެ މުނާސަބުގައި އަބަދުވެސް އަހަރެމެންނަށް ކުރެވޭ ކަމަކީ އެ ކުދިންނަށް ހަދިޔާ ދިނުމާއި އެ ކުދިން ލައްވާ ގިނަ ކުޅިވަރުތައް ކުޅުވާ، ކުޅިވަރާ މަޖަލުގައި އެކުދިން ޝާމިލްކުރުވާ އެކުދިން އުފާކޮށްދިނުމެވެ. އަސްލުގައިވެސް މިއީ ކުރަން ވަރަށްވެސް ރަނގަޅު، އަދި ކުރަންވެސް ޖެހޭނޭ ކަމެކެވެ. ހަމައެއާއެކު، މިފަދަ ހަރަކާތްތަކާއި އެކު، ކުޑަކުދިންގެ ހައްގުތަކާއި، އެކުދިންނަށް ލިބިދާނޭ ނަފްސާނީ އަދި ޖިސްމާނީ އަނިޔާއަކުން އެކުދިން ސަލާމަތްކޮށް ރައްކާތެރި ކޮށްދިނުމަށް ބެލެނިވެރިން ހޭލުންތެރިވެ، އެ ހޭލުންތެެރިކަން އިތުރުކުރުމަކީވެސް ކުޑަކުދިންގެ ދުވަހުގައި ކުރުން މުހިންމު، އަދި އެހާމެ ބޭނުންތެރި ކަމެކެވެ.

އުފާވެރި ކުޑަކުދިންގެ ދުވަހެއް، ހިތްތަކުގެ މާމެލާމެލީގެ ޝަރަފާއި ޢިއްޒަތް އެކުދިންނަށް ދެމުން، އެކުދިން އުފާކޮށްދެމުން ދާއިރު، ބައެއް ބޮޑެތި މީހުންގެ ޝައިޠާނީ އަމަލުތަކުގެ ސަބަބުން އެތައް ކުޑަކުދިންގެ ދިރިއުޅުން ވަނީ ހަލާކުވެފަައެވެ. މި ކުޑަ ކުޑަ ދިވެހި ރާއްޖޭގައިވެސް މެއެވެ. މިއީ ހިތާމަހުރި ކަމެކެވެ. ކުޑަކުދިންނަކީ އަހަރެމެން ބޮޑެތި މީހުންގެ ހިމާޔަތާއި ރައްކާތެރިކަން އަބަދުވެސް ދީގެން ތިބެން ޖެހޭނޭ ބައެކެވެ. ނަވެސް ބައެއް ފަހަރަށް މި ހިމާޔަތާއި ރައްކާތެރިކަން ދޭންވީ ފަރާތުން އެކުދިންނަށް އިހުމާލުވާތަން އެބަ ފެނެއެވެ. އާދޭހެވެ! ވަނީ ހަމަ އެކަނި އިހުމާލެއް ނޫނެވެ. ބައެއް ހާލަތްތަކުގައި އަނިޔާ ދެވޭތަންވެސް އެބަ އާދެއެވެ. ނަފްސާނީ އަނިޔާ އާއި ޖިސްމާނީ އަނިޔާއެވެ. ގެވެށި އަނިޔާ އާއި ޖިންސީ އަނިޔާއެވެ. 

ތުއްތު ތުއްތު ކިތައް ކުދިން މިއަދު ނަފްސާނީ ބަލިތަކަށް ފަރުވާހޯދަން ޖެހިފައި ވޭތޯއެވެ؟ ބަޔަކު މީހުންގެ އިހުމާލުން ނުވަތަ ޖަސްތުގައި ނަމަވެސް ބަޔަކު މީހުންގެ ސަބަބުން ލިބިފައި ހުރި ޖިސްމާނީ އަނިޔާތަކަށް ކިތައްކިތައް ކުޑަކުދިން މިއަދު ފަރުވާ ހޯދާތޯއެ؟ ގޭތެރޭގައި ކުރެވޭ ޒުވާބުތަކާއި އާއިލާގައި ޖެހޭ މައްސަލަތަކުގައި ކުޑަކުދިންނަށް އޭގެ އަސަރު ފޯރުވާ، ގެވެށި އަނިޔާގެ ޝިކާރައަކަށް ވެފައިވާ ކިތައް ކިތައް މައުސޫމު ކުދިންނެއް އެބަ އުޅޭތޯއެވެ؟ ހިތްތަކުގެ މާމެލާމެލިން ކަމުގައި ބުނަމުން، އެއިން ކިތައް މަލުގެ ފިޔަތައް، ކަރުގަނޑާއެކު ބިމަށް ރޫޅާ އަޅާލެވިފައިވޭތޯއެވެ؟ ވިސްނޭ ހެއްޔެވެ! ވިސްނާކަށް ނުވޭ ހެއްޔެވެ!

ބޮޑެތިވަމުން އަންނަ ޖީލު، މަސްތުވާ ތަކެއްޗާއި ދިމާލަށް މިސްރާބު ޖަހުވަން، އަދުގެ ބައެއް ޒުވާނުން މިއަދު ތިބީ "ގުންފައި" ވިއްދާފައެވެ. އެ ޒުވާނުން ކުރަމުން އަންނަ ހަރާމް ވިޔަފާރީގެ ތެރެއަށް، އަދުގެ ކުޑަކުދިން ވައްދާ އެމީހުންގެ ވިޔަފާރި ފުޅާކުރުމުގެ ދަހިވެތިކަމުގައެވެ. ނަމަވެސް މިކަމަށް ފަރުވާލެއް ބެހެއްޓީ ކޮން ބެލެނިވެރިއަކު ހެއްޔެވެ؟ އާދެހެވެ! މިނިވަން ކަމެވެ. އެކުއްޖާ ހިތްހަމަ ޖެހޭ ގޮތަކަށް އުޅުމުގެ މިނިވަންކަމެވެ. މައިންބަފައިންނަށް، ދަރިން ދުނިޔޭގައި މަރު ނުވެ ހުރެއްޖެނަމަ، ވަރިހަމަ ވެގެން ތިބެވެނީއެވެ. ބޮޑު ވަރިހަމައިގަައެވެ.

އަދުގެ ކުޑަކުދިން، ކުށުގެ ވެށީގައި އުޅޭ ކަމީ ހިތާމަ ހުރި ކަމެކެވެ. މައިންބަފައިންނާއި ބެލެނިވެރިންގެ އަތްދަށުން ދޫވެ، ލާޗާރުބިޗާރަށް މަގުތައް މަތީ އުޅޭ ކުޑަކުދިން އެހާމެ ގިނައެވެ. ނަމާދުކުރުމުގެ ރޫހެއް ހިތުވައި ނުވާ ކިތަންމެ ކުޑަކުދިންނެކެވެ. ބަހުރުވައިގައި ގަބުޅި ކަމާއި ހުތުރުކަން އިންތިހާއަށް ގޮސްފައިވާ ކިތަންމެ ކުޑަކުއްޖެކެވެ. ބޮޑެތި މީހުންނަށް ކުރަން ޖެހޭ އިހްތިރާމަކީ އޮންނަ އެއްޗެއްކަމުގެ އިހުސާސް ނުކުރެވޭ ކިތަންމެ ކުއްޖެކެވެ.

އާދެހެވެ! ފަހަރުގައި އަހަރެމެންގެ ދަރީން މިދެންނެވިހެން ނޫޅޭތީ އަހަރެމެންނަށް މިކަންކަން އިހުސާސް ނުވެދާނެއެވެ. ނަމަވެސް ސުކޫލުތަކަށް ނަޒަރު ހިންގާލާށެވެ. ވިސްނައިފި ކޮންމެ ބެލެނިވެރިއަކަށް މިކަން ފެންނާނެއެވެ. ވިސްނުމެއް ފަރުވާއެއް ނުބަހައްޓާނަމަ، އާދޭހޭ، ނުފެންނާނެއެވެ. ކުޑަކުދިންގެ ދުވަހެއްގައި މިވާހަކަ ދެއްކުމަކީ ފަހަރުގައި މާ މުނާސަބު ކަމަކަށް ނުވެދާނެއެވެ. ނަމަވެސް މިއީ މި ލިޔުންތައް ކިޔަމުންދާ ބެލެނިވެރިންނަށް، ކުޑަކުދިންގެ ދުވަހު، ވިސްނާލާ، އެކަންކަމުގެ ހަނދާން އައުކޮށްލާ، ހޭލުންތެރިވެ، ހިޔާލު ބަދަލުކޮށް، ކަންކަމުގެ ހައްލަށް ވާސިލްވުމަށް ފިކުރު ހިންގުމަށް އިލްތިމާސްކޮށްދިނުމުގެ މަގުސަދުގައި ލިޔުނު ލިޔުމެކެވެ. ދުޢާ އަކީ އަހަރެންގެ ހުރިހާ ކުޑަކުދީންނަކީވެސް، ކިޔަމަންތެރި، ހިކްމަތްތެރި އަދި އަހަރެމެންދެކެ ލޯބިވާ، އިހްތިރާމް ކުރަން ދަންނަ، މޮޅު ކުދިންތަކެއް ކަމުގައި ވުމެވެ!