ސަރުކާރުގެ މައި ކުންފުނި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް ސާފު ފައިދާގެ ގޮތުގައި މިދިޔަ އަހަރު 487 މިލިއަން ރުފިޔާ ލިބުނު ކަމަށް އެ ކުންފުނީގެ މާލީ ހިސާބުތަކުން ދައްކައިފިއެވެ.
އެސްޓީއޯ އިން އެ ކުންފުނީގެ ރަސްމީ ވެބްސައިޓްގައި މިއަދު އާއްމުކުރި މިދިޔަ އަހަރުގެ ހިސާބުތައް ދައްކާގޮތުން، އެސްޓީއޯ ގްރޫޕްގެ އެހެން ކުންފުނިތައް ނުހިމަނައި ޕޭރެންޓް ކުންފުނީގެ ފައިދާ ހިސާބުކުރުމުން ޓެކްސްއަށް ފަހު ސާފު ފައިދާއަކީ 487 މިލިޔަން ރުފިޔާ އެވެ. މިއީ 2020 ވަނަ އަހަރު ސާފު ފައިދާގެ ގޮތުގައި ލިބުނު 359 މިލިއަން ރުފިޔާއާ އަޅައި ބަލާއިރު 47 އިންސައްތައިގެ އިތުރުވުމެކެވެ.
އެސްޓީއޯ ގްރޫޕުގެ މިދިޔަ އަހަރު ޖުމްލަ އާމްދަނީގެ ގޮތުގައި 11.2 ބިލިއަން ރުފިޔާ ލިބުނުއިރު، މިއީ އޭގެ ކުރީ އަހަރާ އަޅައި ބަލާއިރު 32 އިންސައްތައިގެ އިތުރުވުމެކެވެ. އެ ފައިސާ އިން ހަރަދު ކަނޑައި ޓެކްސް ވެސް ދެއްކުމަށްފަހު އެސްޓީއޯ ގްރޫޕަށް ލިބުނު ސާފު ފައިދާގެ އަދަދަކީ 1.9 ބިލިއަން ރުފިޔާ އެވެ. މިއީ އޭގެކުރީ އަހަރާ އަޅާބަލާއިރު 12 އިންސައްތައިގެ އިތުރުވުމެކެވެ.
މިދިޔަ އަހަރުގެ އާމްދަނީއަކީ 10.2 ބިލިއަން ރުފިޔާ ކަމަށް ވާއިރު، އެންމެ ބޮޑު އާމްދަނީއެއް ހިއްސާކުރީ ތެލުގެ ވިޔަފާރިން ލިބުނު 6.4 ބިލިއަން ރުފިޔާ އެސްޓީއޯ އަށް ލިބިފައިވެއެވެ. މިއީ އޭގެ ކުރީ އަހަރާ އަޅާ ބަލާއިރު 63 އިންސައްތައިގެ އިތުރުވުމެކެވެ.
އެސްޓީއޯ ގްރޫޕަށް ދެން ދެން އެންމެ ބޮޑު އާމްދަނީ އަށް ލިބުނީ މަސްވެރިކަމުގެ އުފެއްދުންތަކުންނެވެ. މި ސެކްޓާ އިން ލިބުނު 1.2 ބިލިއަން ރުފިޔާގެ އާމްދަނީ އަކީ ރެކޯޑް އަދަދަކަށް ވީ ހިނދު, މިއީ އޭގެ ކުރީ އަހަރާ އަޅައި ބަލާއިރު 17 އިންސައްތައިގެ އިތުރުވުމެކެވެ.