ބޭންކް އޮފް މޯލްޑިވްސް (ބީއެމްއެލް)ގެ ކްރެޑިޓް ކާޑުގެ ހިދުމަތަށް އަލަށް އެދޭ ކަސްޓަމަރުންނަށް އަމާޒުކޮށްގެން ޕްރޮމޯޝަނެއް ފަށައިފިއެވެ.
މި ޕްރޮމޯޝަންގެ ދަށުން ބީއެމްއެލްގެ ކްރެޑިޓް ކާޑު އަލަށް ހައްދާ މީހުން ދައްކަންޖެހޭ ޖޮއިނިންގ ފީ އާއި ފުރަތަމަ އަހަރުގެ އެނުއަލް ފީ ދައްކަން ނުޖެހޭނެއެވެ.
އެގޮތުން، ބޭންކުން އެންމެ ފުރަތަމަ އެޕްރޫވްކުރާ 200 ކަސްޓަމަރުންގެ ކާޑަށް ކޭޝްބެކް ދިނުމަށް ހަމަޖެހިފައިވެއެވެ. މިއިން ކޮންމެ ކާޑަކަށް ވެސް ކޭޝްބެކްގެ ގޮތުގައި ދިނުމަށް ނިންމާފައިވަނީ 2،500ރ. އެވެ.
އަދި މި ޕްރޮމޯޝަންގެ ދަށުން ކޮންމެ ހަފްތާއަކު ކްރެޑިޓް ކާޑަށް އެދި ހުށަހަޅާ ކަސްޓަމަރުންގެ ތެރެއިން ގުރުއަތުން ހޮވޭ ފަރާތަކަށް 5،000ރ.ގެ ގިފްޓް ކާޑެއް ލިބޭނެ އެވެ.
މީގެއިތުރުން، މި ހިދުމަތަށް އެންމެ ފުރަތަމަ އެދޭ 2،000 ކަސްޓަމަރުންނަށް 3،000 ބީއެމްއެލް ރިވޯޑްސް ޕޮއިންޓްސް ލިބޭނެ އެވެ. މި ޕްރޮމޯޝަންގެ ދަށުން ގުރުއަތުން އެއްވަނަ މަގާމަށް ހޮވޭ ފަރާތަކަށް 50،000ރ. އަގުހުރި އިނާމެއް ލިބޭނެ އެވެ.
ބީއެމްއެލްގެ ރިވޯޑްސް ޕޮއިންޓްސް ބޭނުން ކޮށްގެން ގިނަ އެއާ ލައިނާއި، ހޮޓާތަކާއި، ކާރު ކުއްޔަށް ނެގުމުގެ އިތުރުން އެމެޒޯން، އެޕްސްޓޯ، އައިޓިޔުންސް، ގޫގުލް ޕްލޭ، ޕްލޭސްޓޭޝަން ފަދަ ބްރޭންޑުތަކުގެ ގިފްޓު ކާޑު ގަތުމުގެ ފުރުޞަތު ވެސް ލިބޭނެ އެވެ.
މި ޕްރޮމޯޝަން ކުރިއަށްދާނީ މި މަހުގެ 15 އިން ފެށިގެން އަންނަ ޖޫން މަހުގެ 30 ގެ ނިޔަލަށެވެ.