އަބަދުވެސް އަހަރެމެންނަށް މި ފެންނަނީ ކޮންމެވެސް ހާއްސަ ބަޔަކަށް ހާއްސަ ކުރެވިފައިވާ ދުވަސްތަކެއް ފާހަގަ ކުރާތަނެވެ. އެވެނި މިވެނި މަސައްކަތްތަކެއް ކުރާ ބައެއްގެ އަގުވަޒަންކޮށް އެމީހުންނަށް މަރުހަބާ އާއި ޝުކުރު ދަންނަވާ ތަނެވެ. އެހެން ނަމަވެސް ކޮންމެ އިދާރާއަކާއި، ވުޒާރާ އަކާއި އަދި ކޮންމެ މުއައްސަސާއެއް ހިންގުމުގައި އެތައް ބައެއްގެ ގުރުބާނީއެއް ވާނެއެވެ. އެ ބައެއްގެ މަސައްކަތް ނުފެންނަ، އެ ބައެއްގެ މަސައްކަތު ނަތީޖާ ސީދާ ނުފެންނަ ކިތަންމެ ބައެކެވެ. އެމީހުން އެ ކުރާ މަސައްކަތްތަކަކީވެސް އަހަރެމެން ހެޔޮ ހިތުން ބަލައިގަނެ، ޝުކުރުވެރިވެ، އަގުވަޒަން ކުރަން ޖެހޭނޭ ހިދުމަތްތަކެކެވެ.

އެންމެ އާދައިގެ މުއައްސަސާއަކަށް ބަލާލަމާ ހިނގާށެވެ. ރާއްޖޭގެ ރަށެއްގައި ހުންނަ ކޮންމެވެސް މުއައްސަސާއަކަށް ބަލައިލަމާ ހިނގާށެވެ. ފެނޭ ހެެއްޔެވެ؟ ކައުންސިލް އިދާރާ އާއި ސުކޫލާއި ސިއްހީ މަރުކަޒުތަކެވެ. ކައުންސިލަރުންނަ އަހަރު ފުރޭ ދުވަސްތަކާއި، ޓީޗަރުންގެ ދުވަހާއި، ޑަކްޓަރުންނާއި ނަރުހުންގެ ދުވަސްތަކަކީ ކުލަގަދަކޮށް ފާހަގަ ކުރެވޭ ދުވަސްތަކެވެ. ނަމަވެސް ވިސްނާލީމާ އެނގޭ ކަމަކީ އެއީ އެތަންތަން ހިނގުމުގައި މުހިންމު ބައެއް ކަމުގައި ވިޔަސް އެއީ އެއްބައި ކަމެވެ. އަނެއްބައި އޮތީ އަހަރެމެންނަށް އަޅާ ނުލެވިއެވެ.

އިދާރީ މީހުންނެވެ. އިދާރީ މުވައްޒަފުންނެވެ. ކޮންމެ ތަނެއްގައިވެސް ތިބޭ ބައެކެވެ. އެކަމު އެބައެއްގެ އަގު ވަޒަންކުރެވޭލެއް ކުޑަ ބައެކެވެ. އެމީހުން އެ ކުރަނީ އަމުދަކުން ލުއި މަސައްކަތެއް ނޫނެވެ. އެމީހުންގެ އަގު ވަޒަން ނުކުރެވެނީ އެމީހުންނަށް ކުޑަ މުސާރައެއް ލިބޭތީ ހެއްޔެވެ؟ އާދޭހެވެ! އަގު ވަޒަން ކުރާ ބަޔަކުވެސް އުޅޭނެއެވެ. ނަމަވެސް ހާއްސަކޮށް އެމީހުންގެ މަސައްކަތަށް ޝުކުރުވެރިވާން ވާނެއެވެ. ތަން ހިންގުމަށްޓަކައި އިދާރީ މުވައްޒަފުން އެ ކޮށްދޭ ހިދުމަތްތަކަކީ އަމުދަކުން ކުޑަ ހިދުމަތްތަކެއް ނޫނެވެ. މަސައްކަތުގެ ވަގުތު ހަމަވެ ދާއިރުވެސް، މަސައްކަތް ގިނަކަމުން އެވެރިން އިތުރުގަޑީގައި މަސައްކަތް ކުރަނީ މަދެއްކޮށެއްވެސް ނޫނެވެ. މޭޒުދޮށުގައި އިނުމަކީ ބަލާބެލުމަށް ކުއިކަމެއް ނަމަވެސް އެވެރިންގެ ސިކުނޑިތަކުން އެއްފަހަރާ ތިން ހަތަރު މަސައްކަތް ކުރެއެވެ. ކަންކަން އެނގޭ، ވިސްނޭ މީހުނަށް މިކަންކަން އެނގޭނެއެވެ.

މަސައްކަތު މީހުންނެވެ. މިއީވެސް ވަރަށް ހާއްސަ ބައެކެވެ. ކުނިކަހާ ސާފުކޮށް، ތަން، ބަލައިލަން ކެރޭ ވަރު ކޮށްދެނީ މަސައްކަތު މީހުންނެވެ. އެތަނުގައި އުޅޭ އެހެން މީހުން، ތަނުގައި އުޅި ހަޑިވުމުން ސަލާމަތްކޮށްދެނީ މަސައްކަތު މީހުންނެވެ. އިދާރާތަކާއި މުއައްސަސާ ތަކުގެ ގެއާއި ގޯތިތެރެ ކުނިކަހައެވެ. ގަހެއް ވާނަމަ، އެ ގަހަކަށް ނުވަތަ ގަސްތަކަކަށް ފެންދީ ބަލަހައްޓައެވެ. އެއްޗެހި އުފުލުމާ ދަމާ ގެންދިއުމާ، ތަންތަން ތަރުތީބު ކުރުވާ މީހުންނަކީވެސް މަސައްކަތު މީހުންނެވެ.

ދަމަށް ތިބޭ ސެކިއުރިޓީ އޮފިސަރު ނުވަގަ ވޮޗަރެވެ. އާންމުކޮށް ރޭގަނޑުގެ ނިދި ނަގާލާފައި ތަނެއްގެ ފާރަވެރިކަމުގައި ތިބެއެވެ. އެނގެއެވެ. އެމީހުންނަށަ ނިދިވެސް ޖެހިދާނެއެވެ. އެއީ އެމީހުންގެ އަގުވަޒަން ނުކުރަންވީ ސަބަބެއް ހެއްޔެވެ؟ ނޫނެކެވެ. މަގާމުގެ ގޮތުން ދަށް މަގާމެެއް ނަމަވެސް، އެމީހުންގެ އެ ވަމުންދާ ގުރުބާނީގެ އަގު ހަގީގަތުގައި ވަޒަން ކުރަން ވާނެއެވެ. ކުރެވެން ވާނެއެވެ.

ދަށްމަގާމުތަކޭ ނިސްބަތްކޮށް ކިތަންމެ މަގާމެއް އަހަރެމެން ކިޔަސް، އެއީކީ އެއްވެސް ހާލެއްގައި ދަށް މަގާމުތަކެއް ނޫނެވެ. އެއީ ދަށް މަގާމުތަކެއް ނަމަ، ނިކަން އެ މުވައްޒަފުން ނުލާ ތަނެއް ހިނގާތޯ ބަލާބަލާށެވެ. ހިލާ ނުހިނގާނެއެވެ. އިދާރީ ބަޔަކު ނުވާނަމަ، ތަން ނުވެސް ހުޅުވުނީހެވެ. މަސައްކަތެއްވާ ނުހިނގީހެވެ. މަސައްކަތު މީހެއް ނުވާނަމަ، ތަން އޮންނާނީ "ގޮނޑެއް" ހެންނެވެ. ބަލާލަންވެސް ވާ ނުކެރޭނެއެވެ. ވިސްނާ ބަޔަކަށް މިކަންކަން ފަހުމްވެ އެނގޭނެއެވެ!