އުމުރުން ދުވަސްވީ މީހުންނަށް ހާއްސަކޮށްގެން "އިސްރަށްވެހިޕްލޭން" ނަމުގައި ހާއްސަ ޕޯސްޓްޕެއިޑް ޕެކޭޖެއް އުރީދޫން ތަޢާރަފްކޮށްފިއެވެ.
ދުނިޔޭގެ ޓެލެކޮމިއުނިކޭޝަން ދުވަހާ ގުޅުވައިގެން އުރީދޫން މިއަދު ތަޢާރަފްކުރި ޕެކޭޖުގެ ދަށުން އުމުރުން ދުވަސްވީ މީހުންނަށް 30 ޕަސެންޓްގެ ޑިސްކައުންޓާއި، ހިލޭ ޑޭޓާގައި ވައިބާ ބޭނުންކުރެވޭނެ އެވެ.
އުރީދޫން ބުނާގޮތުގައި، މި ޕްލޭނަކީ ދުނިޔޭގެ ޓެލެކޮމިއުނިކޭޝަން ދުވަހުގެ ޝިއާރުގައި ވާގޮތަށް ދޮށީ އުމުރުގެ މީހުންނަށް ޓެކްނޮލޮޖީގެ ވަސީލަތްތައް ބޭނުންކުރުމަށް ހިތްވަރުދިނުމާއި ފާގަތި، ދުޅަހެޔޮ ދިރިއުޅުމެއް މަގުފަހިކޮށްދިނުމުގެ ގޮތުން ތަޢާރަފްކުރި ޕްލޭނެކެވެ.
މި ޕެކޭޖް އިފްތިތާހުކޮށްދެއްވީ ޖެންޑަރ މިނިސްޓަރު އާއިޝަތު މުހައްމަދު ދީދީ އެވެ. މި ހަފްލާގައި އުރީދޫ މޯލްޑިވްސްގެ މެނޭޖިންގ ޑިރެކްޓަރ އަދި ސީއީއޯ ޚާލިދު އަލް-ހަމާދީ އާއި އެ ކުންފުނީގެ އެކްޓިންގ ޗީފް ކޮމަރޝަލް އޮފިސަރ ހުސައިން ނިޔާޒު ވެސް ބައިވެރިވިއެވެ.
އުރީދޫގެ އެމްޑީ ހާލިދު ވިދާޅުވީ އިންޓަނެޓަކީ މިހާރު އަސާސީ ބޭނުންތަކަށް ވަރަށް މުހިންމު އެއްޗެއް ކަމަށާއި ޓެކްނޮލޮޖީ އަށް ބަރޯސާވެފައި ވަނީ ހަމައެކަނި މުވާސަލާތު ކުރުމަށް ނޫން ކަމަށެވެ.
ހާލިދު ވިދާޅުވީ، އުއްމީދަކީ މިހާރަށްވުރެ ބޮޑަށް ޑިޖިޓަލް ދުނިޔޭގައި އިސްރަށްވެހިންގެ ބައިވެރިވުން އިތުރުކޮށް، އާ ފުރުޞަތުތަކާ ގުޅުވާލައިދިނުން ކަމަށެވެ. އަދި ޑިޖިޓަލް ޛަރިއްޔާތައް މެދުވެރިކޮށް ދޮށީ އުމުރުގެ މުޖުތަމަޢުގެ ދިރިއުޅުން މުއްސަނދިކުރުމަށް ކުރަމުންދާ މަސައްކަތުގައި އުރީދޫން ދެމިތިބޭނެކަމަށް ވެސް ހާލިދު ވިދާޅުވިއެވެ.
އުރީދޫން މިއަދު ތަޢާރަފްކުރި ޕެކޭޖަށް ސަބްސްކްރައިބްކޮށްގެން އުމުރުން 60 އަހަރުން މަތީގެ މީހުންނަށް އެ ކުންފުނީގެ ކްލަބް ޕްރިމިއާ ގޯލްޑް މެމްބަޝިޕާއެކު ރާއްޖެއާއި ރާއްޖެއިން ބޭރުގެ މަގްބޫލު ބްރޭންޑްތަކާއި ވިޔަފާރިތަކުން ހާއްސަ އޮފާތައް ވެސް ލިބޭނެ އެވެ.
އިސްރަށްވެހިންގެ ޕޯސްޓްޕެއިޑް ޕެކޭޖަށް ސަބްސްކްރައިބްކުރުމަށް:
60 (އައިޑީ ކާޑް ނަންބަރު) ޖެއްސެވުމަށްފަހު 929 އަށް SMS ކޮށްލައްވާ.