ފަތްޕިލާވެއްޔަކީ އޭގައި އެތައް އަޖައިބުތަކެއް ވާ އެއްޗެއް. ބައެއް ގަސްގަހުގައި ހުންނަ ފަތްތަކުގެ ކުލަ، އަނެއްބައި ގަސްގަހުގައި ހުންނަ ފަތްތަކާއި ތަފާތުވެދޭ. ފަތްތަތަކަށް އެކި އެކި ކުލަ އަރަމުން ދަނީ ނުވަތަ އެކި އެކި ގަސްގަހުގައި އެކި ކުލަ ކުލާގައި ފަތް ހުންނަނީ ކީއްވެގެންކަން ދެނަހުރީމުތަ؟

ފަތްތަކުގައި އެ ހުންނަ ކުލަތައް ބިނާވެގެންވަނީ އެ ފަތްތަކުގައި ހުންނަ މާއްދާއެއްގެ މައްޗަށް. އެ މާއްދާއެއް ފަތުގައި ގިނަ ވާނަމަ، އެ މާއްދާއަކުން ފާޅުވާ ކުލަ، އެ ފަތަކުން ފެންނާނެ.

ފަތުގައި ހުންނަ ކްލޮރޮފީލް ނަމަކަށް ކިޔާ މާއްދާގެ ސަބަބުން ފަތުން ދައްކުވާދޭނީ ފެހިކުލަ. ފެހިކުލަ ގަދަ ފަތްތަކަކީ އެ މާއްދާ ގިނަ ފަތްތަކެއް. އަދި ފެހިކުލަ ފަނޑުވާނަމަ އޭގެމާނައަކީ އެ މާއްދާ އެ ފަތަކުން މަދުވާކަން.

އެންތޯސައިއެނިން ނަމަކަށް ކިޔާ މާއްދާއެއް ފަތުގައި ގިނަނަމަ، އެ ފަތެއް ފެންނާނީ ރަތް ނުވަތަ ދަނބު ކުލައިގަ. އަދި ކެރަޓޮނައިޑްސް ނަމަކަށް ކިޔާ މާއްދާއެއް ފަތުގައި ގިނަނަމަ، އެ ފަތެއް ފެންނާނީ އޮރެންޖު، ރީނދޫ ނުވަތަ މުށި ކުލައިގަ. މި ކުލަތަކާއި އިސްވެ ބުނެވުނު މާއްދާތަކަކީ ފަތް ގަހުގައި އިންނަ ވަގުތު، ފެންނަ ކުލަތަކާއި މާއްދާތަކެއް. ގަހުން ފަތް ވަކިވުމާއި އެކުގައިވެސް ހިނގާނީ މާއްދާތަކުގެ ނަހަމަކަމުގެ އަސަރުތަކެއް. ނަމަވެސް އެއީ އިސްވެ ބުނެވުނު ކުލަ ބަޔާންކޮށްދޭ ސަބަބުތަކުން އިސްތިސްނާ ވާ ހާލަތްތަކެއް.