އެސްޓީއޯ އިން ވިއްކާ އުފެއްދުންތަކުގައި "ހަކަތަރި" ލޭބަލް ޖަހަން ފަށައިފިއެވެ.
"ހަކަތަރި" އަކީ ކަރަންޓު އާލާތްތަކުގެ ސަމަކާރަމިން (އެފިޝެންސީ) ދައްކުވައިދިނުމަށް މިނިސްޓްރީ އޮފް އެންވަޔަރަމެންޓް، ކްލައިމެޓް ޗޭންޖް އެންޑް ޓެކްނޮލޮޖީ އިން އުފައްދާފައިވާ ލޭބަލް އެކެވެ.
އެސްޓީއޯ ޕީޕަލްސް ޗޮއިސް ސުޕަމާޓުގައި މިއަދު ބޭއްވި ހަފްލާއެއްގައި "ހަކަތަރި" ލޭބަލް ބޭނުންކުރުން ފައްޓަވައިދެއްވީ އެ ކުންފުނީގެ މެނޭޖިންގ ޑިރެކްޓަރ ހުސައިން އަމްރު އަދި އެންވަޔަރަމެންޓް މިނިސްޓަރު އާމިނަތު ޝައުނާ އެވެ.
މި ލޭބަލްގެ ޛަރިއްޔާއިން އާއްމުކޮށް ދިރިއުޅުމުގައި ބޭނުންކުރާ ކަރަންޓު އާލާތްތައް ކަމަށްވާ އެއާ ކޮންޑިޝަން (އޭސީ)، ފްރިޖު އަދި ދޮންނަ މެޝިނުން ގަޑިއަކު މަސައްކަތްކުރާ މިންވަރާއި، އަހަރަކު ހަކަތަ ބޭނުންކުރާ މިންވަރު އެނގޭނެ އެވެ. އަދި އެ ލޭބަލްގައި އިންނަ ސަމަކާރަމިން (އެފިޝެންސީ) މިން ގިންތިކޮށްދޭ ފަސްތަރިން، ގިނައިން ކަރަންޓު ހަރަދު އަރާ ތަކެތި ވެސް ފާހަގަކުރަން ފަސޭހަވާނެ އެވެ.
ޝައުނާ ވިދާޅުވީ، މި ޕްރޮގްރާމްގެ މައިގަނޑު މަގްސަދަކީ ތެލަށް ބަރޯސާވާ މިންވަރު ކުޑަކުރުން ކަމަށާއި، އަދި މިފަދަ އުފެއްދުންތައް ބޭނުންކުރުމުން އާއްމު ރައްޔިތުން ކަރަންޓަށް ކުރާ ހޭދަ ކުޑަކުރުމަށް ވެސް އެހީވެދޭނެ ކަމަށެވެ.
އެސްޓީއޯ އަކީ "ހަކަތަރި" ލޭބަލް ޖަހައިގެން ކަރަންޓު އުފެއްދުންތައް ވިއްކާ ފުރަތަމަ ކުންފުންޏެވެ.