ސެކަންޑް ހޭންޑް މުދާ ވިއްކުމާއި ކުއްޔަށް އަންނައުނު ފަދަ ތަކެތި ދޫކުރުމަކީ ދިވެހިން އެހާ ފަރިތަ ކަމެއް ނޫނެވެ. ނަމަވެސް މިއީ ތަރައްގީވެފައިވާ ގިނަ ގައުމުތަކުގައި ހިނގާ ކަންކަމެވެ. މީހަކު އެއްފަހަރު ބޭނުންކޮށްފައި ހުރި އެއްޗެއް ބޭނުން ކުރުމަކީ ލަދު ގަންނަން ޖެހޭ ކަމެއް ނޫނެވެ. އެއީ އިޤްތިޞާދު ކުރުމުގެ ތެރެއިންވާ ކަމެކެވެ. އަދި ތިމާވެއްޓަށް ދެވޭ ފަރުވާ އެކެވެ. އާންމުކޮށް ރާއްޖެއިން ބޭރަށް ދަތުރު ކުރައްވާ ފަރާތްތަކަށް މިއީ ވަރަށް ފަރިތަ ކަމެކެވެ.

މިކަން ދިވެހިންގެ ތެރެއަށް ތަޢާރަފް ކުރުމަށް އެންމެ ކުރިން އެންމެ ފާހަގަ ކޮށްލެވޭ މަސައްކަތެއް ކުރީ ދިވެހި ކަނބަލެކެވެ. އެންމެ ފުރަތަމަ އިންސްޓަގްރާމްގައި މި ފަދަ ތަކެތި ވިއްކުމަށްފަހު އެކަން އާ ހަރުފަތަކަށް ގެންގޮސް ފިހާރައެއް ވަނީ ހުޅުވާފައެވެ. މިކަމުގައި އިސްވެހުރި ސިޒީ އަޙުމަދު އާ ތީރުގެ ފަރާތުން ބައްދަލު ވުމުން އެންމެ ފުރަތަމަ ވެސް ކުރެވުނު ސުވާލަކީ، މިއީ ކިހިނެތް އައި ޚިޔާލެއްތޯ ކުރެވުނު ސުވާލެވެ. ޖަވާބުގައި ސިޒީ ބުނެފައިވަނީ އެއްފަހަރު އެއްޗެއް ބޭނުން ކުރުމަށް ފަހު އެއްލާލުމުގެ އާދަ ނައްތާލާ ހެޔޮ އަގުގައި ތަކެތި ހޯދަން ބޭނުންވާ ފަރާތްތަކަށް އެފުރުސަތު ފަހިކޮށް ދިނުމުގެ ގޮތުން ފެށި މަސައްކަތެއް ކަމަށެވެ. ކުރިން އާއިލާގެ މީހުނާއި ރައްޓެހިންގެ ފަރާތުން ހިލޭ ލިބޭ ހެދުމާއި ފައިވާން ފަދަ ތަކެތި އިންސްޓަގްރާމްގައި ވިއްކުމަށްފަހު، ގާތްމީހުންގެ އެހީގައި ފިހާރައެއް ހުޅުވީ ކަމަށްވެސް ސިޒީ ހާމަ ކުރިއެވެ..

އާންމުކޮށް މި ފިހާރައިގައި ހުންނާނީ ސެކަންޑް ހޭންޑް އެއްޗެހި ނަމަވެސް ބައެއް ތަކެއްޗަކީ މުޅި އާ ތަކެއްޗެވެ. ނަމަވެސް އެއްވެސް އެއްޗެއްގެ އަގު 150 ރުފިޔާ އަށް ވުރެ އަގުބޮޑު ނުވާނެ ކަމަށް ފިހާރައިން މައުލޫމާތު ދިނެވެ. މި މަސައްކަތް މިހެން ކުރާކަން އެނގުމުން އެކަމަށް އެއްބާރުލުން ދިނުމުގެ ގޮތުން ގިނަ ބަޔަލު ހިލޭ ތަކެތި ހަދިޔާ ކުރި ނަމަވެސް ބައެއް ފަރާތް ތަކުން ތަކެތި ނަގަނީ 30-10 ރުފިޔާގެ އަގެއް ދީފައި ކަމަށްވެސް ހާމަކުރިއެވެ.

ކޮވިޑް-19 ގެ ޙާލަތަށް ވެސް ވިސްނައިގެން، ފިހާރައަށް ގެންނަ ކޮންމެ އެއްޗެއްވެސް  ވަރަށް ރަގަޅަށް ދޮވެއެވެ. އެންމެ ގިނައިން މި ފިހާރައިން ލިބެން ހުންނަނީ ދެ ޖިންސުގެ ބޮޑެތިމީހުނާއި ކުޑަކުދިންގެ އަންނައުނާއި ފައިވާން އަދި ބޫޓު ފަދަ ތަކެއްޗެވެ. ނަމަވެސް އާންމުންގެ ފަރާތުން އެހީތެރިކަން ލިބޭ ނަމަ، މި ކަން އިތުރަށް ފުޅާކޮށް ގޭތެރޭގައި އަތްލާހިފާ ތަކެތިވެސް ވިއްކުމަށް ބެހެއްޓުމުގެ ވިސްނުން ހުރި ކަމަށް ސިޒީ ކިޔާދިނެވެ.

މި މަހުގެ 21 ވަނަ ދުވަހު ހުޅުވުނު މި ފިހާރައަށް އާންމުގެ ބޮޑު ތަރުޙީބެއް ލިބެމުންދާ ކަމަށާ މިއީ އިސްރާފު ކުޑަ އަދި ހޭލުންތެރި ވައްޓަފާޅިއަކާ ދިމާލަށް އެޅުނު މުހިންމު ފިޔަވަޅެއް ކަމަށް ވެސް ސިޒީ ހާމަ ކުރިއެވެ. ބޭނުންކޮށްފައި އެއްލާލަން ބޭނުންވާ އެއްޗެއް ހުރިނަމަ އެއްލާލުމުގެ ބަދަލުގައި ރިސޭލް ވޭވް ފިހާރައިގެ ފޭސްބުކް ޕޭޖަށް މެސެޖްކޮށްލުމުން، އެއްޗެއްގެ ބޭނުން ޖެހިފައިވާ މީހަކަށް ހެޔޮ އަގެއްގައި އެ އެއްޗެއް ލިބޭނެ މަގު ފަހި ކޮށްދެވުނީއެވެ.

https://www.facebook.com/resalvewave.mv