ބޭންކް އޮފް މޯލްޑިވްސް (ބީއެމްއެލް) ގެ ބޭންކިންގ އެޕްގެ އެންމެ ފަހުގެ އަޕްޑޭޓާއެކު "ބީއެމްއެލް ޕޭ ވޮލެޓް" ގެ ނަމުން ޑިޖިޓަލް ވޮލެޓެއް ތަޢާރަފްކޮށްފިއެވެ.
ބީއެމްއެލް އެޕްގެ ފަހުގެ އަޕްޑޭޓާއެކު ކޮންޓެކްޓްލެސް ޕޭމަންޓްގެ ހިދުމަތް އަދި ވޮލެޓް-ޓު-ވޮލެޓް ޓްރާންސްފާގެ ހިދުމަތް ވެސް ލިބިގެންދާނެ އެވެ.
އެގޮތުން، މިފަހަރުގެ އައު އަޕްޑޭޓާއެކު އެޕް މެދުވެރިކޮށް ހަލުވިކަމާއި ރައްކާތެރިކަމާއެކު ޕޭމަންޓް ފުރިހަމަކުރުމަށްޓަކައި ސްކޭން ޓު ޕޭގެ ހިދުމަތް ބޭނުންކުރެވޭނެ އެވެ. އަދި އެ ކަސްޓަމަރެއްގެ އެކައުންޓް ނަންބަރުގެ ބަދަލުގައި، މޯބައިލް ނަންބަރު އެކަނި ބޭނުންކޮށްގެން ފަސޭހަކަމާއެކު އާއިލާ އާއި ރަހުމަތްތެރިންނަށް ފައިސާ ފޮނުވޭނެ އެވެ.
ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ޓިމް ސޯޔާ ވިދާޅުވީ، މުޅި ދުނިޔޭގައި ވެސް އެންމެ ރައްކާތެރި އަދި އެންމެ ހަލުވި ޕޭމަންޓްތަކަކީ މޮބައިލް ބޭންކިންގ މެދުވެރިކޮށް ހަދާ ކޮންޓެކްޓްލެސް ޕޭމަންޓްތައް ކަމަށެވެ.
އަލަށް ތަޢާރަފްކުރެވުނު ބައެއް ފީޗާސްތައް:
ސްކޭން ޓު ޕޭ: ޕީއޯއެސް ޓާމިނަލް މެދުވެރިކޮށް "ސްކޭން ޓު ޕޭ" ނެގުމަށް ފަހު ނުވަތަ މާޗަންޓް މެދުވެރިކޮށް ބީއެމްއެލް ކިއުއާރު ސްޓިކާ ބޭނުންކޮށްގެން ކާޑާއި ނުލައި ބީއެމްއެލް މޯބައިލް ބޭންކިން އެޕް މެދުވެރިކޮށް ފައިސާ ދެއްކޭނެ.
ޓެޕް ޓު ޕޭ: ކަސްޓަމަރުންގެ އެންއެފްސީގެ ހިދުމަތް ލިބޭ ސްމާޓް ފޯނު، ޕީއޯއެސް މެޝިންގައި ޖައްސާލުމުން ކާޑާއި ނުލައި ބީއެމްއެލް އެޕް މެދުވެރިކޮށް ފައިސާ ދެއްކޭނެ.
މޯބައިލް ކީ-އިން: ޕޭމަންޓެއް ހެދުމުގެ ކުރިން، "މޯބައިލް ކީ-އިން" ނެގުމަށް ފަހު ފޯނު ނަންބަރު ޖެހުމުން ކަސްޓަމަރުންނަށް ފައިސާ ދައްކަން ރިކުއެސްޓެއް ލިބޭނެ؛ އެ ރިކުއެސްޓް އެޕްރޫވްކުރުމުން ޕީއޯއެސް ޓާމިނަލް މެދުވެރިކޮށް ފައިސާ ދެއްކޭނެ.
މީގެއިތުރުން، ވެސް ބީއެމްއެލް އެޕްގެ ފަހުގެ އަޕްޑޭޓާއެކު ކުރިން އިންޓަނެޓް ބޭންކިން މެދުވެރިކޮށް ނުލިބޭ އެތައް ހިދުމަތްތަކެއް ހޯދުމަށް އެޕްލިކޭޝަން ހުށަހެޅޭނެ އެވެ.
ބީއެމްއެލް އިން ރާއްޖެ އަށް މޯބައިލް ބޭންކިންގެ ހިދުމަތް ތަޢާރަފްކުރީ 2015 ވަނަ އަހަރުގައެވެ. މިހާރު ބޭންކުގެ 90 އިންސައްތައެއްހާ ކަސްޓަމަރުން އިންޓަނެޓް ބޭންކިންގެ ހިދުމަތް ބޭނުންކުރަމުންދާ ކަމަށް ބީއެމްއެލް އިން ބުނެއެވެ.