މިއަހަރުގެ ނޮވެންބަރު މަހު ގަތަރުގައި ފަށާ ފީފާ ވާލްޑް ކަޕް 2022 އާ ގުޅުވައިގެން އުރީދޫއިން "އުރީދޫ ވޯލްޑްކަޕް ފޯރި" ނަމުގައި ހާއްސަ ކެމްޕެއިނެއް މިއަދު ފަށައިފިއެވެ.
ކްރޮސްރޯޑްސްގައި މިއަދު ބޭއްވި ހަފުލާއެއްގައި މި ކެމްޕެއިން ފައްޓަވައިދެއްވީ ޔޫތު މިނިސްޓަރު އަހުމަދު މަހުލޫފް އަދި އުރީދޫ މޯލްޑިވްސްގެ ސީއީއޯ ހާލިދް ހަސަން އަލް-ހަމަދީގެ އިތުރުން ކްރޮސްރޯޑްސްގައި ހުންނަ ހާޑް ރޮކް ހޮޓެލްގެ މެނޭޖަރު ޓޮލްގާ އުނާން އެވެ.
މި ކެމްޕެއިން ފެށުމުގެ ގޮތުން ކުޅެވުނު ހާއްސަ ފުޓްސަލް މެޗުގައި އުރީދޫ މޯލްޑިވްސްއާ ދެކޮޅަށް ކުޅެ ހާޑް ރޮކް ހޮޓެލްގެ ޓީމު މޮޅުވީ 5-0 އިންނެވެ.
ގަތަރުގައި މިއަހަރު ބާއްވާ ފީފާ ވޯލްޑް ކަޕްގެ އޮފިޝަލް ގްލޯބަލް ކަނެކްޓިވިޓީ ސާވިސަސް ޕްރޮވައިޑާ އަކީ އުރީދޫ މޯލްޑިވްސްގެ ބެލެނިވެރި ކުންފުނި އުރީދޫ ގަތަރެވެ.
އެހެންކަމުން ކުރިއަށް އޮތް ވޯލްޑް ކަޕުގައި ކުޅޭ 64 މެޗުގެ ލައިވް ފީޑް ދުނިޔޭގެ ހުރިހާ ގައުމަކަށް ފޮނުވުމުގެ މަސައްކަތް ކުރާނީ ވެސް އުރީދޫ އިންނެވެ. އަދި ވޯލްޑް ކަޕުގެ މެދުއިރުމައްޗާއި އެފްރިކާ ބައްރުގެ ޓެލެކޮމިއުނިކޭޝަންސް އޮޕަރޭޓަރަކީ ވެސް އެ ކުންފުންޏެވެ.
"އުރީދޫ ވޯލްޑް ކަޕް ފޯރި" ކެމްޕެއިންގެ ތެރޭގައި ހިންގަން ރާވާފައިވާ ހަރަކާތްތަކުގެ ތެރޭގައި ވޯލްޑް ކަޕާއި ގުޅޭ ހާއްސަ އިވެންޓުތަކުގެ އިތުރުން އުރީދޫގެ ކަސްޓަމަރުންނަށް ހާއްސަ އޮފާތައް ހިމެނެ އެވެ. އެގޮތުން، ކުރިއަށް އޮތް ދުވަސްތަކުގައި މި ހަރަކާތްތަކުގެ ތަފުސީލު ގެނެސްދޭނެ ކަމަށް އެ ކުންފުނިން ބުންޏެވެ.