މީސްމީޑިޔާއަކީ އެއަށް ކިހާ އިތުބާރެއް ކުރެވޭ ތަނެއް ހެއްޔެވެ؟ އެއީ އެއިން އިވޭ ހަބަރުތައް އަހަރެމެން ޔަގީންކޮށް ގަބޫލުކުރަން ޖެހޭވަރު ތަނެއް ހެއްޔެވެ؟ އެތަނުގައިވެސް އިތުބާރެވެ. ތިބާ އެ ބަޔަކަށް ނުވަތަ މީހަކަށް އިތުބާރުކުރާ މީހަކު ބުނާ ވާހަކަ ތަކާއި ދައްކާ ވާހަކަ ތައް ތިބާއަށް ގަބޫލުކުރެވެއެވެ.

އަދި ތިބާ އެމީހަކަށް އިތުބާރު ނުކުރާ ނުވަތަ ތިބާވެ ވިސްނުމާ ތަފާތު ވިސްނުމެއްގެ ބަޔަކު ނުވަތަ މީހަކު ލިޔާ އެއްޗެއް ތިބާއަކަށް ކަމަކު ނުދާނެއެވެ. މިއީ މިފާޑަކަށް ފައްކާވެފައިވާ ނިޒާމެކެވެ.

މީސްމީޑިޔާގެ ވަސީލަތްތައް މެދުވެރިކޮށް ހަބަރު ފަތުރާ ވަސީލަތްތަކުން ތަފާތު އެތައް ހަބަރެއް ފޯރުކޮށްދެއެވެ. ކޮންމެ މީހަކުވެސް އާދަވެ ކިޔަނީ އެމީހަކު ގަޔާވާ، ނުވަތަ އެމީހެސްގެ ވިސްނުމާއި އެއް ވިސްނުމެއްގެ އަސާސެއްގެ މައްޗަށް ބިނާވެފައިވާ ނޫހެއްގައި ހުންނަ ހަބަރުތަކެވެ. އެހެން ނޫސްތަކުގައި ހުންނަ ހަބަރުތައް ގޯސްވެފާ ކަމުނުދާތީކީއެއް ނޫނެވެ. އެ ނޫސްތަކުން ހަބަރު ކިޔާހިތްނުވަނީއެވެ. ތިބާ ގަބޫލުކުރާ މިންގަނޑަށް ނުފެތޭތީއެވެ. ތިބާ އިތުބާރުކުރާ ބައެއްގެ އަނދިރިފުށް ހާމަވެދާތީއެވެ.

ނޫސްވެރިކަން މިފަދައިން އަތްތަށް ގޮސް ހުސްވެފައި ވާކަމީ މިއަދު ހިތާމަ ހުރި ކަމެކެވެ. އެނޫހުގައި ހުންނާނީ އެވެނި މިވެނި އަސާސެއްގެ ހަބަރުތަކޭ ބުނަން މިއަދު އެނގެއެވެ. ސަބަބަކީ ހަބަރުތަކުގައި މިނިވަންކަމުގެ ކުލަ ޖެހިފައި ނުވުމުވެ. މިނިވަން ނޫސްވެރިކަމެއް ކުރެވޭތަން ފެންނަނީ މަދުންނެވެ.

ހަމަ އެކަނި ނޫސްވެރިކަމެއް ނޫނެވެ. އާންމުންގެ ވިސްނުންވެސް މިކަމުގައި އަމުދުން ގޯހީއެވެ. އެއް ނޫހަކުން ނޫނީ އެއް މަސްދަރެއްގެ މައްޗަށް ބިނާވެފައިވާ ނޫސްތަކެއް ނޫނީ ކިޔާހިތް ނުވަނީއެވެ. އިސްވެ ދެންނެވުނު ސަބަބުތައް އެހެން އޮތީތީއެވެ. ނަމަވެސް މިފަދައިން އަތްއަތަށް ޖެހިފައިވާ ހަބަރުތަކާއި ނޫސްތަކަށް، ކިޔުންތެރިވެސް ގޮސް ހުސްވެ، އަތްއަތަށް ޖެހިގެން ތިބޭކަމީ ހިތާމަ ހުރި ކަމެކެވެ. ހިޔާލު ތަފާތުވުމަކީ މައްސަލައެއް ނޫން ކަމަށާއި، އެ ތަފާތުވާ ހިޔާލުގެ ތެރެއިން ކުރިއަށް ދިއުމަކީ ބުއްދިވެރިންގެ ގޮތް ކަމަށް ބުނަމުން އަހަރެމެން އަބަދުވެސް ގެންދަމެވެ. ނަމަވެސް މި ތަފާތުވާ ހިޔާލުތަކާއި އެކު ނޫސްވެރިކަންވެސް މިފަދައިން ތަފާތުވެ އަތްއަތަށް ޖެހި، ކިޔުންތެރިންވެސް އަތްއަތަށް ޖެހި ތިބޭ ކަމީ ހިޔާލުތަފާތުވުން ތަކުގައި ކުރިއަށް ނުދެވޭ ކަމެކެވެ. މިފަދައިން ހުންނަ ހަބަރުތައް، މި ވިސްނުމުގައި ތިބޭ މީހުން އަބަދު ކިޔާނަމަ އެކަމުގެ ތެރެއިން އުފަންވާނީ ހައްތަހާ ތަފާތު ހިޔާލުތަކެެވެ. އިސްވެ ތަފާތުވި ހިޔާލުގައި އެ ތަފާތުގެ ފަރަގު ބޮޑުވެ ދެއެވެ. އެއްކަލަ ހަސަދަވެރިކަމާއި ރުޅިވެރިކަމާއި ނަފްރަތު ހައްތަހާ ބޮޑުވެ، ހުޅުރޯވެ ގަދަޔަށް އަނދަމުން ހިނގައިދެއެވެ. މިއީ މިއަދު އަހަރެމެންގެ މި ކުޑަކުޑަ ދިވެހި ރާއްޖޭގައިވެސް ވަރަށް ބޮޑަށް ފެތުރިފައިވާ ފިތުނައެކެވެ. އަތްއަތަށް ޖެހިފައިވާ ނޫސްތަކާއި ހަބަރުތައް، އަތްއަތަށް ޖެހިފައިވާ އާންމުން ކިޔާ ހެދުމުން، އަތްއަތަށް ޖެހޭ ގޮތާއި ޖެހެވޭ މިންވަރު އިތުރުވެގެން ދެއެވެ. އިސްވެ ދެންނެވުނު ފަދައިން ފިތުނައާއި ރުޅިވެރިކަމާއި ނަފްރަތު ނޫން ކަމެއް މިކަމުގެ ތެރެއިން އުފަންެވެގެންނެއް ނުދެއެވެ.

މިއީ ހަބަރުފަތުރާ ވަސީލަތްތަކުންނާއި ހަބަރު ކިޔާ ފަރާތްތަކުންވެސް ވިސްނަން ޖެހޭ މުހިންމު ކަމެކެވެ. ހަބަރު ފަތުރާ ފަރާތްތަކުން ހަބަރުތަކުގެ ތެދު ދޮގު ބަލާ ޔަގީން ކުރުމާއި ވަކި އަތަކަށް ޖެހި ބުރަވެފައި އޮތުމުގެ ބަދަލުގައި މިނިވަން ކޮށް ދެތުވެރިކަމާއި އެކު ހަބަރު ގެނެސްދިނުން ކޮންމެހެން ބޭނުންތެރިއެވެ. އަދި ހަބަރު ކިޔާ ފަރާތްތަކުންވެސް ވަކި އަތަކަށް ޖެހިފައި ހުންނަ ހަބަރުތައް ކިޔުމުގެ ބަދަލުދައި ދެފަރާތަށްވެސް ސަފްހާ އުކަމުން ކިޔާށެވެ. ހަގީގަތާއި ހިސާބަަށް ވާސިލް ވެވޭނީ އޭރުންނެވެ. ސުލްހައާއި އަމާންކަން ވެސް ބިނާވެގެން ދާނީ އޭރުންނެވެ. ރުޅިވެރިކަމާއި ނަފްރަތާއި ހަސަދަ ފިލާދާނީވެސް އޭރުންނެވެ!