އެއްފަހަރު ބޭނުންކޮށްފައި އުކާލާ ޕްލާސްޓިކް ބޭނުންކުރުން މަދުކުރުމަށް ބާރު އެޅުމުގެ ގޮތުންނާއި، ވިޔަފާރި ބޭނުންތަކަށް ބޭނުންކުރާ ކޮތަޅު ދައުރުވާ މިންވަރު މަދުކުރުމަށް، ކަސްޓަމަރުންނަށް ޝޮޕިންގ ބޭގްގެ ގޮތުގައި ބޭނުންކުރަން ތިމާވެއްޓާއި ރައްޓެހި ކޮތަޅު ކައިލާންގެ ފިހާރަތަކުން ވިއްކުމަށް ހަމަޖައްސައިފިއެވެ.
ތަފާސްހިސާބުތައް ދައްކާ ގޮތުން ދުނިޔޭގައި އަހަރަކު އެވްރެޖްކޮށް 500 ބިލިއަން ކޮތަޅު ބޭނުން ކުރެއެވެ. އަދި ހިނގާ ކޮންމެ މިނެޓަކަށް މިލިއަނެއްހާ ކޮތަޅު މުޅި ދުނިޔޭގައި ބޭނުން ކުރާ ކަމަށް ތަފާސްހިސާބުތަކުން ދައްކައެވެ. މިގޮތަށް ދައުރުވާ ކޮންމެ ކޮތަޅަކުންވެސް ތިމާވެއްޓަށް އޭގެ ނޭދެވޭ އަސަރު ފޯރައެވެ.
ތިމާވެއްޓާ ރައްޓެހި ކޮތަޅު އުފެއްދުމަށްޓަކައިވެސް އެތައް ގަހެއް ބިމާ ހަމަކުރަންޖެހޭކަން ފާހަގަކޮށްލެވެއެވެ. އެހެން ކަމުން އެކަމަށް އެންމެ ބޮޑު ހައްލެއް ގެނެވޭނެ ގޮތަކީ ތަކުރާރުކޮށް، ކޮންމެ ކޮތަޅެއް، ވީ އެންމެ ގިނަ ދުވަހު ބޭނުން ކުރުން ކަން ދިރާސާ ތަކުން ދައްކާތީ އެކަމަށް ބާރު އެޅުމުގެ ގޮތުން ޕްލާސްޓިކް ކޮތަޅު ބޭނުން ކުރުން މުޅިން ހުއްޓާލާ، ކައިލާން އިން މިހާރު އަންނަނީ ތިމާވެއްޓާ ރައްޓެހި ކޮތަޅު ބޭނުން ކުރަމުންނެވެ.
އަދި މި ބަދަލަކީ ތިމާވެއްޓާ ރައްޓެހި ކޮތަޅުވެސް ތަކުރާރުކޮށް ބޭނުން ކުރުމަށް ކަސްޓަމަރުންނަށް ބާރު އެޅުމުގެ ގޮތުން ގެނެވުނު ބަދަލެކެވެ. މި ކެމްޕޭންގައި ވީހާ ގިނަ ބޭފުޅުން ބައިވެރިވެ، އެހެން ފިހާރަތަކުންވެސް މިގޮތަށް ޢަމަލު ކުރުމަކީ ކައިލާން ގްރޫޕްގެ ވަރަށް ބޮޑު އެދުމެކެވެ.
އެގޮތުން، އަންނަ ޖުލައި މަހުގެ 1 ވަނަ ދުވަހުން ފެށިގެން ޝޮޕިންގ ބޭގްގެ ގޮތުގައި ބޭނުންކުރާ ކޮތަޅު ކައިލާންގެ ފިހާރަތަކުން ޖެހޭނީ ގަންނާށެވެ. އަދި އެ ކޮތަޅު ތަކުރާރުކޮށް ބޭނުން ކުރުމަށާއި ވިޔަފާރި ކުރައްވަން ވަޑައިގަންނަވާއިރު ކޮތަޅު ގެނައުމަށް ކައިލާން ފިހާރައިން އެދެއެވެ.
ކުރިއަށް އޮތް ޖީލުތަކާ ހަމަޔަށް އަޅުގަނޑުމެންގެ ތިމާވެށި ރައްކާތެރިކަމާއެކު ވާސިލުކޮށްދެވޭނީ އަޅުގަނޑުމެން އެންމެން ގުޅިގެން ކުރާ މަސައްކަތަކުން ކަން ޔަޤީނެވެ. ކައިލާން ފިހާރައަށް އެކަނި މިފަދަ ބޮޑު ބަދަލެއް ނުގެނުވުނު ނަމަވެސް ކައިލާންގެ އިސްނެގުމާއެކު މިފަށާ ފެށުމަކީ ރާއްޖޭގައި މިބަދަލު ގެނައުމަށް އެޅިގެންދާ ބިންގަލެއްކަމާމެދަކު ޝައްކެއް ނެތެވެ.
މިއީ މިހާރު ދުނިޔޭގައި ތަޙުޒީބް ވެފައިވާ ވަރަށް ގިނަ ޤައުމުތަކުގައި ބޭނުން ކުރަމުން އަންނަ އާދައަކަށް ވީއިރު، އަޅުގަނޑުމެން މި ރާއްޖޭގެ ހުރިހާ ވިޔަފާރިތަކުންވެސް މިގޮތަށް ޢަމަލު ކުރަން ފަށައިފިނަމަ އަޅުގަނޑުމެން ދިވެހިންގެ ތެރޭގައިވެސް މިފަދަ ރަނގަޅު އާދަތަށް އިސާހިތަކު އަށަގަނެ އޭގެ ހެޔޮ ބަދަލު ތިމާވެއްޓަށް ކުރާނެކަން ޔަޤީނެވެ.
ކައިލާންގެ ފިހާރަތަކުން މިފަށާ ކެމްޕޭންގައި ކައިލާން ފިހާރައިގެ އެންމެހާ ކަސްޓަމަރުންގެ ފުރިހަމަ އެއްބާރުލުމަށް ކައިލާން ގްރޫޕުން އެދެއެވެ.