އަހަރެމެން އެންމެންނަށްވެސް ދުންފަތުގެ އިސްތިއުމާލުކުރުމުން ސިއްހީ ނުރައްކާތެރިކަން ހުރިކަމާއި އެކަމުގެ ބިރުވެރިކަން އެނގެއެވެ. ނަމަވެސް މި އެނގޭ މައުލޫމާތު ތަކުގެ ސަބަބުން އެ އާދަ ދޫކޮށްލަން ފަސޭހައެއް ނުވެއެވެ. ދޭތެރެ ދޭތެރެއިން ދުންފަތުގެ އިސްތިއުމާލުކުރާ މީހަކަށް ވިޔަސް ނުވަތަ މުޅި އުމުރަށް ދުންފަތުގެ އިސްތިއުމާލުކުރާ މީހަކަށް ވިޔަސް، ހުއްޓާލުމަކީ ހަގީގަތުގައި ވެސް އުނދަގޫ ކަމެކެވެ.

ދުންފަތުގެ އިސްތިއުމާލު ކުރުމަކީ ޖިސްމާނީ އަޅުވެތިކަމެއްގެ އިތުރުން ނަފްސާނީ އާދައެކެވެ. ސިނގިރޭޓުން ލިބޭ ނިކޮޓީން އަކީ އޭގެ ސަބަބުން އެޑިކްޓް ކުރުވާ ނުވަތަ އަޅުވެރި ކުރުވާ، މަސްދަރެއް އޭގައި އެކުލެވޭ އެއްޗެކެވެ. ނިކޮޓީންގެ ސަބަބުން ސިކުނޑިއަށް ކުރާ “އަރާމެއްގެ” އަސަރުގެ ސަބަބުން، ސިނގިރޭޓު ބުއިމަަށް އެނބުރި ދިއުމަކީ، ސަމާލުކަން އިތުރުކޮށް، ހާސްކަން ފިލުވައިދީ، ހަމަޖެހުމެއް ހޯދުމަށް އަވަސް އަދި އިތުބާރު ކުރެވޭ ގޮތެއް ކަމުގައި ސިނގިރޭޓު ބޯމީހުންނަށް އިހުސާސްކުރެވެއެވެ. މިއީ ދުންފަތާ ދުރަށްދާން، ގިނަ މީހުންނަށް އުނދަގޫވާ އެއް ސަބަބެވެ.

ދުންފަތުގެ އިސްތިއުމާލުކުރުމަކީވެސް ދުވަހުން ދުވަހަށް ކުރާ ކަމެއްގެ ގޮތުގައި ބައެއް މީހުންގެ އުޅުމުގައި ބިންވަޅު ނެގިފައިވާ ކަމެކެވެ. އެއީ ހެނދުނުގެ ކޮފީއާއެކު ސިނގިރޭޓް ބުއިމާއި، މަސައްކަތުގެ ހުސް ވަގުތުގައްޔާއި، ނުވަތަ ބުރަ މަސައްކަތަކަށް ފަހުގައްޔާއި އަދި ބައެއް ދިގު ދަތުރުތަކަށް ފަހުގައި ގަވައިދުން ދުންފަތުގެއިސްތިއުމާލު ކުރާމީހުން އުޅެއެވެ. ނުވަތަ ރައްޓެހިންނާއި، އާއިލާއާއި، ނުވަތަ އެކުވެރިން ދުންފަތުގެ އިސްތިއުމާލުކޮށް، އެއީ ތިބާ އެމީހުންނާ ގުޅޭ ގޮތުގެ "ބަޔަކަށް" ވެސް ވެފާ އޮވެއެވެ.

ކާމިޔާބުކަމާއެކު ދުންފަތުގެ އިސްތިއުމާލުކުރުން ހުއްޓާލުމަށްޓަކައި، އެ އަޅުވެތިކަމާއި، އެއާ އެކު ހިނގާ އާދަތަކާއި ތަރުތީބުވެ ހިނގާ ކަންކަމަށް ވެސް ޙައްލު ހޯދަން ޖެހޭނެއެވެ. ރަނގަޅު ހިތްވަރަކާއި އެކު ދުންފަތުގެ އިސްތިއުމާލު ކުރުން ހުއްޓާލުމުގެ ތާވަލަކާއި އެކު، މީގެ ކުރިން އެތައް ފަހަރަކު މަސައްކަތްކޮށް ނާކާމިޔާބުވި ނަމަވެސް ދުންފަތުގެ އިސްތިއުމާލުކުރާ ކޮންމެ މީހަކަށް ވެސް އެކަމުން ދުރުވެވިދާނެއެވެ.

ދުންފަތާއި ދުރަށް ދާން ބޭނުންވާނަމަ ތިބާއަކީ ދުންފަތުގެ އިސްތިއުމާލުކުރާ ކޮންކަހަލަ މީހެއްކަން، ތިބާގެ ދިރިއުޅުމުގާ ދުންފަތުގެ އިސްތިއުމާލު ކުރެވޭ ވަގުތުތަކާއި އަދި ކީއްވެގެންތޯ ވިސްނާލަން ވަގުތު ހޭދަކުރާށެވެ. މިއީ ތިބާއަށް އެންމެ ފައިދާހުރި އުކުޅުތަކާއި، ނުވަތަ "ތެރަޕީތަކަކީ" ކޮބައިކަން ދެނެގަތުމަށް އެހީތެރިވެދޭނެ ކަމެކެވެ.

އެންމެ ފުރަތަމައީ ތާރީހެއް ކަނޑައެޅުމެވެ. އެ ތާރީހެއް ވާން ޖެހޭނީ ތިބާއަށް ފަސޭހަ އަދި އިހްތިޔާރީ ތާރީހަކަށެވެ. އެ ތާރީހުގެ މައްޗަށް އެހެންމީހެއްގެ ހިޔާލެއް ނުފޫޒެއް އޮވެގެން ނުވާނެއެވެ. ދެވަނައީ އެކަން ކުރަން އުޅޭކަން، ގިނަބައެއް ކައިރީގައި ބުނުމެވެ. އާއިލާ މީހުންނާއި އެކުވެރި ރަހުމަތްތެރިން ކައިރީގައި ބުނުމެވެ. އެހެނީ އޭރުން އެމީހުންގެ އެއްބާރުލުން ލިބުމާއި އެކު، އެމީހުންގެ ހިތްވަރުވެސް ލިބޭނެތީއެވެ. ދުންފަތާ ދުރުވުމަށް ކުރާ މަސައްކަތުގައި ދިމައިވެދާނެ ގޮންޖެހުންތައް ކުރީބައިގައި ފާހަގަކޮށް އެކަންކަމަށް އެޅިދާނޭ ފިޔަވަޅުތަކާއި މެދު މަޝްވަރާކޮށް ތައްޔާރުވެގެން ހުރުން ވަރަށްވެސް ބޭނުންތެރިއެވެ. ދެން އޮތީ ދުންފަތާ ދުންފަތުގެ އިސްތިއުމާލު ކުރަން ބޭނުންކުރާ ތަކެތި ތިބާ ދިރިއުޅޭ މާހައުލާއި މަސައްކަތު މާހައުލުން ދުރުކުރުމެވެ. މިކަމުގައި މަސައްކަތު މާހައުލުގެ އެކުވެރިންނާއި ގޭތެރެއިން އާއިލާ މީހުންގެ އެއްބާރުލުން ހޯދިދާނެއެވެ. އެންމެ ފަހު ކަމަކަށް އޮތީ ތައްޔާރުވެ ޑަކްޓަރަށް ދެއްކުމެވެ. ކަމާ ބެހޭ، ލަފާދޭނޭ މާހިރެއްގެ އެހީ ހޯދުމެވެ. އެފަރާތުން ދޭ ތާވަލަކާއި އެއްގޮތަށް، މަސައްކަތް ކުރުމެވެ. 

މި ހުރިހާ ކަމެއް އެއްކިބާކޮށް ދެން އޮތީ މާތް ﷲ އަށް ދުޢާ ދެންނެވުމެވެ. އެ އިލާހުގެ ހަޟްރަތުން، މަދަދަށް އެދި ދުޢާ ކުރުމެވެ. އިރާދަ ކުރައްވައިގެން މި ތާވަލާއި އެކު، ހެޔޮ ނިޔަތެއް އޮވެ ތަރުތީބު ކޮށްފި އަމަލުތަކަކުން، މިކަން ކާމިޔާބުވެދާ ހުއްޓެވެ!