މިހާރު ކުރިއަށްދާ ފުޑް އެންޑް ބެވަރޭޖް (އެފްއެންބީ) ޝޯގައި ކިޗަން އެންޑް ހޯމް އެޕްލަޔަންސަށް ހާއްސަ ބްރޭންޑެއް ކަމަށްވާ "ރަސެލް ހޮބްސް" އެސްޓީއޯ އިން ތަޢާރަފްކޮށްފިއެވެ.
ކަލިނަރީ ދާއިރާ އަށް ހާއްސަކޮށްގެން ކޮންމެ އަހަރަކު ބާއްވަމުން އަންނަ އެފްއެންބީ ޝޯގެ ފަސްވަނަ އެޑިޝަން ހުޅުމާލޭ ސެންޓްރަލް ޕާކްގައި އިއްޔެ ފެށިއިރު، އެސްޓީއޯގެ ސްޓޯލްގައި "ރަސެލް ހޮބްސް" ބްރޭންޑް އިފްތިތާހް ކޮށްދެއްވީ ނައިބު ރައީސް ފައިސަލް ނަސީމް އެވެ.
އެސްޓީއޯ އިން ރާއްޖޭގައި މުޅިން އަލަށް ތަޢާރަފްކުރި "ރަސެލް ހޮބްސް" އަކީ އިނގިރޭސި ވިލާތުގެ މަޝްހޫރު ބްރޭންޑެކެވެ.
ބަދިގެ އާއި ގޭތެރޭގެ ސާމާނު އުފެއްދުމަށް ހާއްސަ "ރަސެލް ހޮބްސް" ގެ ގިނަ ޕްރޮޑަކްޓްތަކެއް އެސްޓީއޯގެ ފިހާރަ އިން ލިބެން ހުންނާނެ ކަމަށް އެ ކުންފުނިން ބުނެއެވެ.
އެގޮތުން، މި ބްރޭންޑްގެ ސްލޯ ކުކާ، ސްޓީމާ، ގްރިލް، އެއާ ފްރަޔާ، ކޮފީ މޭކާ, މިކްސާ، ޓޯސްޓަރާއި ސެންޑްވިޗް މޭކާ އަދި ކެޓްލް ވެސް ލިބެން ހުންނާނެ ކަމަށް އެސްޓީއޯ އިން ބުނެއެވެ.
މި އަހަރުގެ ޝޯ ބާއްވާފައިމިވަނީ، ކޮވިޑް ބަލިމަޑުކަމުގެ ސަބަބުން މިދިޔަ ދެ އަހަރު ނުބާއްވާ އޮތުމަށްފަހު، ދެ އަހަރުގެ މެދުކެނޑުމަކަށްފަހުގަ އެވެ.
މިފަހަރުގެ އެފްއެންބީ ޝޯ މި ޖޫން މަހުގެ 2 އިން 4 ވަނަ ދުވަހުގެ ނިޔަލަށް، ކޮންމެ ދުވަހަކު ހަވީރު 4:00 އިން ރޭގަނޑު 10:00އަ ހަމައަށް ކުރިއަށް ދާނެ އެވެ.