މޯލްޑިވްސް ސްޓޭޓް ޝިޕިންގ (އެމްއެސްއެސް)ގެ ބަލްކް ކެރިއާ ބޯޓު "އެމްއެސްއެސް ކްރޯމް" ގެ ފުރަތަމަ ދަތުރުގައި މިއަދު ރާއްޖެ އަތުވެއްޖެއެވެ.
"އެމްއެސްއެސް ކްރޯމް" އަކީ ރާއްޖެ އަށް ކޮންސްޓްރަކްޝަން ސާމާނު އެތެރެކުރުމަށް އެމްއެސްއެސް އިން ގަނެފައިވާ ބޯޓެކެވެ. މިއީ މިހާތަނަށް އެމްއެސްއެސް އިން ރާއްޖޭގައި ބޭނުންކުރާ އެންމެ ބޮޑު ބޯޓެވެ.
މިއީ މުދަލާއެކު މި ބޯޓު، ރާއްޖެ އަށް ކުރި ފުރަތަމަ ދަތުރަށްވުމާއެކު އެކަން ފާހަގަކުރުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވަނީ ވޯޓަރ ސެލިއުޓަކާއެކު ހޫނު މަރުހަބާއެއް ކިޔާފައެވެ.
23 ފަޅުވެރިންނާއެކު "އެމްއެސްއެސް ކްރޯމް" ގެ ފުރަތަމަ ދަތުރުގައި، 41،500 މެޓްރިކް ޓަނުގެ ހިލަ އާއި ހިލަވެލި އެތެރެކޮށްފައިވާ ކަމަށް އެމްއެސްއެސް އިން ބުނެފައިވެއެވެ. ދިގު މިނުގައި 190 މީޓަރު، އަދި އުސް މިނުގައި 16.6 މީޓަރު ހުންނަ މި ބޯޓުގެ ކެޕޭސިޓީ އަކީ ގާތްގަނޑަކަށް 43،929 މެޓްރިކް ޓަނެވެ.
އެމްއެސްއެސް އަކީ ރާއްޖެ އަށް މުދާ އެތެރެކުރުމުގައި ވީހާވެސް ހެޔޮ އަގެއްގައި ގެނެވޭނެ މަގުފަހިކުރުމުގެ ގޮތުން 2020 ވަނަ އަހަރުގެ ފެބުރުއަރީ މަހުގައި ސަރުކާރުން އުފައްދާފައިވާ އެސްޓީއޯގެ ސަބްސިޑަރީ ކުންފުންޏެކެވެ.
އެ ކުންފުނިން ވަނީ މިވީ ކުރުމުއްދަތުގެ ތެރޭގައި ޝިޕިން ވިޔަފާރީގެ ތެރެއަށް ވަދެ، ރަނގަޅު އާމްދަނީއެއް ހޯދާފައެވެ.