އެސްޓީއޯ އިން "ތުއްތު ދަރިފުޅު" ފޮތް އިފްތިތާހުކޮށްފިއެވެ.
އަލަށް އުފަންވާ ކުދިންގެ މަންމަ އާއި ބައްޕަ އަށް ހާއްސަކޮށް ޑރ. އަބްދުﷲ ނިޔާފްގެ އެހީތެރިކަމާއެކު ތައްޔާރުކޮށްފައިވާ "ތުއްތު ދަރިފުޅު" ފޮތް މިއަދު ލޯންޗްކޮށްދެއްވީ އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު މުހައްމަދު އެވެ.
ތުއްތު ދަރިފުޅުގެ ހަޔާތުގެ ފުރަތަމަ 100 ދުވަހަށް ހާއްސަކޮށް ހިމަނާފައިވާ މުހިއްމު އެތައް މަޢުލޫމާތެއް ހިމަނައިގެން ތައްޔާރުކޮށްފައިވާ މި ފޮތުގައި، ދަރިފުޅު އުފަންވާ ދުވަހުން ފެށިގެން ކުރިމަތިވާ އެންމެ ކުދި ކަންތައްތަކުން ފެށިގެން އެންމެ ބޮޑެތި ކަންތައްތަކާއި ގުޅިގެން އަމަލުކުރަންވީ ގޮތް ވަރަށް ރަނގަޅަށް ބަޔާންކޮށްދީފައިވެއެވެ.
އެގޮތުން، ތުއްތު ދަރިފުޅު އުފަންވާ ވަގުތު ހޮސްޕިޓަލުގައި ދެވޭ ފަރުވާއިން ފެށިގެން، ހޮސްޕިޓަލުން ދޫކޮށްލުމަށްފަހު ގޭގައި ދަރިފުޅު ގެންގުޅުމުގައި ސަމާލުކަންދޭންޖެހޭ ކަންކަންވެސް ވަރަށް ތަފްސީލާއެކު ބަޔާންކޮށްފައިވެއެވެ.
މީގެއިތުރުން، ފުރަތަމަ ދުވަސްކޮޅުގައި ދަރިފުޅުގެ ހަށިގަނޑު ތަޖުރިބާކުރާނެ ކަންތައްތަކާއި، އަދި މި ކަންކަމުގައި އާއިލާއިން ކަންކުރަންވީ ގޮތުގެ މަޢުލޫމާތާއި، ތުއްތު ދަރިފުޅުގެ ސިއްހަތާއި މަންމަގެ ދުޅަހެޔޮ ސިއްހަތާއި ގުޅުންހުރި އެތައް މަޢުލޫމާތެއް މި ފޮތުގެ އެހީގައި ލިބިގެންދާނެ އެވެ.
ކުރިއަށް އޮތް ތަނުގައި އެސްޓީއޯއިން، އަލަށް އުފަންވާ ކުދިންނަށް ދޭ ހަދިޔާގެ ތެރޭގައި މި ފޮތް ހިމެނޭނެއެވެ.
އެސްޓީއޯގެ ވެބްސައިޓް މެދުވެރިކޮށް "ތުއްތު ދަރިފުޅު" ފޮތް ކިޔުމުގެ ފުރުޞަތު ލިބިގެންދާނެ ކަމަށް އެ ކުންފުނިން ބުނެއެވެ.