ހަގީގަތަށް ލޯބި ކުރާ ކޮންމެ މީހަކު ރަސޫލާއަށް ފުރައްސާރަ ކުރުން ފަދަ އަމަލުތައް ކުށްވެރިކުރާނެ ކަމަށް ހުކުރު ޚުތުބާގައި ބުނެފިއެވެ. އަދުގެ ހުކުރު ޚުތުބާ ހާއްސަ ކޮށްފައިވަނީ ކީރިތި ރަސޫލާ ދެކެ ލޯބިވުމުގެ މައްޗަށެވެ. އެކަލޭގެފާނަށް ފުރައްސާރަ ކުރުން އިތުރުވެފައިވާ ކަމަށްވެސް ޚުތުބާގައި ވަނީ ފާހަގަ ކުރައްވާފައެވެ. އަދި އެކަލޭގެފާނު ދިފާއު ކުރުމުގައި މުސްލިމުގެ ދައުރަށް ވަނީ އަލިއަޅުވާލައިފައެވެ.

ނަބިއްޔާއަށް ފުރައްސާރަ ކުރުން ފަދަ ދަށު ދަރަޖައިގެ އަމަލުތަކަކީ މިހާރު ދޭދޭ ޤައުމުތަކުގެ މެދުގައި އެއްބަސްވެފައިވާ ބައިނަލްއަގުވާމީ މުއާހަދާތަކާ ޚިލާފު ކަމެއް ކަމަށާއި ހަގީގަތަށް ލޯބި ކުރާ ކޮންމެ އިންސާނަކު ވެސް މި ނުބައި އަމަލު ކުށްވެރި ކުރަން ޖެހޭ ކަން ވެސް ޚުތުބާގައި ވަނި ފާހަގަކުރައްވާފައެވެ.

ދިވެހި ރާއްޖެއިންވެސް އެފަދަ އަމަލުތައް ފެންނަކަން ފާހަގަކޮށް ޚުތުބާގައި ބުނެފައިވަނީ އެފަދަ ދޮގު ލިޔުންތައް އުފައްދައި އާއްމު ކުރާ މީހުންނަކީ އަޤީދާ ފާސިދުވެފައިވާ ބައެއް ކަމަށެވެ. އަދި އެމީހުންގެ ބޭނުމަކީ މުޅި ދުނިޔެއަށް ފެތުރިފައިވާ ﷲ ގެ ދީން މީސްތަކުންނަށް އޮޅުވާލައި އިސްލާމް ދީނާ މެދު ނަފްރަތު އުފައްދައި މީހުން ދީނާ ދުރުކުރުން ކަމަށެވެ.

ރަސޫލާގެ ހަޔާތްފުޅުގައި އެކަލޭގެފާނު ކުރައްވާފައިވާ ކަންކަމާމެދު މަލާމާތްކޮށް، ފުރައްސާރައިގެ މޭރުމުން ވާހަކަދެއްކުމުގެ ޙައްގު އެއްވެސް މީހަކަށް ނޯންނެއެވެ. އެކަލޭގެފާނުގެ ހަޔާތްޕުޅަކީ ހެޔޮލަފާ ޖީލެއް ބިނާކޮށް، ރަނގަޅު މުޖުތަމެއްގެ ބިންގާ އެޅުމުގެ އެންމެހައި ފިލާވަޅުތައް ފެންނަން ހުރި ނަމޫނާ ހަޔާތްޕުޅެއް ކަމަށް ވެސް ޚުތުބާގައި ބުނެފައިވެއެވެ.

މީގެ އިތުރުން އެކަލޭގެފާނު ދެކެ ލޯބިވެ، އެކަލޭގެފާނުގެ ދިފާއުގައި ތެދުވުމަކީ ކޮންމެ މުސްލިމެއްގެ ވާޖިބެއްކަން ފާހަގަކޮށް ޚުތުބާގައި ބުނެފައިވަނީ އެމީހެއްގެ އަމިއްލަ ނަފްސާއި މުދަލާއި އަނބިދަރީންނަށް ވުރެ ބޮޑަށް އެކަލޭގެފާނު ދެކެ ލޯބިވެ، އެކަލޭގެފާނަށް ނަސްރުދީގެން މެދުވީ އެއްވެސް މުސްލިމެއްގެ އީމާންކަން ފުރިހަމަ ނުވާނެ ކަމަށެވެ. އަދި އެކަލޭގެފާނާއި އެކަލޭގެފާނުގެ ތެދުމަގަށް ނަފްރަތު ކުރުމާއި ކުޑައިމީސް ބަސް ބުނެ ފުރައްސާރަ ކުރުމަކީ އީމާންކަމުގެ ދާއިރާއިން ބޭރުވާ އަމަލެއް ކަމަށް އިލްމުވެރިން ވިދާޅުވާ ކަމަށް ވެސް ވަނީ ބުނެފައެވެ.

މި ޙުތުބާ މިހެން އިއްވާފައި ވާއިރު، މި ދުވަސްކޮޅު، އިންޑިޔާގެ ވެރިކަން ކުރާ ޕާޓީގެ މެންބަރަކު، ރަސޫލާ އަށް ފުރައްސާރަ ކުރުމާއި ގުޅިގެން އެކަމާ ދެކޮޅަށް ގިނަ ގައުމުތަކުން ވަނީ ބަސް ބުނެފައެވެ. ދިވެހި ރާއްޖެއިންވެސް އެކަން ކުށްވެރި ކޮށްފައިވީ ނަމަވެސް، ރައްޔިތުންގެ މަޖިލީހަށް ހުށަހެޅުނު މައްސަލަ ބޭރުކޮށްލުން ވެގެން ދިޔައީ ގިނަ ބަޔަކު ނުރުހުންތެރިވި ކަމަކަށެވެ. ދައުލަތުގެ ފަރާތުން އިސްލާމިކް މިނިސްޓްރީއިން ނެރޭ މި ޚުތުބާގައި މި ވަނީ ވަރަށް ސާފުކޮށް މި މައުޟޫއަށް އިންސާފުކޮށްދެއްވާފައެވެ.