ފައިސާ، ފައިސާ، ފައިސާ! މިއީ ވަރަށް އާންމު އަޑެކެވެ. އާދަވެ އާންމުކޮށް އިވޭ އަޑެކެވެ. ފައިސާ ބޭނުން ނުވާނީ އަހަރެމެންގެ ތެރެއިން ކާކު ހެއްޔެވެ؟ ނަމަވެސް އެއީ ކީއްކުރާ އެއްޗެއް ހެއްޔެވެ؟ ގިނަކޮށް ގުދަންކުރާ އެއްޗެއް ހެއްޔެވެ؟ ގިނަކޮށް ގުދަންކޮށްފައި ހުރުމަކުން އެ ފައިސާގެ ބޭނުމެއް ކުރެވޭ ހެއްޔެވެ؟ ފައިސާގެ ދަހިވެތި ކަމުގައި ރޫޅި ދަނީ ކިތައް ގުޅުން ހެއްޔެވެ؟ ފައިސާގެ ނަހަމަ މުޢާމަލާތްތައް ކުރެވެނީ ކިހާ ވަރަކަށް ތޯއެވެ؟ ހައްތަހާވެސް ފައިސާ އާއި ގުޅުން ހުރި ސުވާލުތަކެވެ! އާދެހެވެ! ފައިސާ، ފައިސާ، ފައިސާއެވެ.

އިންސާނާ ކިޔަވާ، މޮޅު މީހަކަށްވެ، މަތީ މަގާމުތަކުގައި މަސައްކަތް ކުރަނީ ފައިސާ ހޯދާށެވެ. އަނެއް ބަޔަކު ދަލާ ލޭ އޮހޮރުވަނީ ފައިސާ ހޯދުމަށް ބުރަ މަސައްކަތްތަކެއް ކުރަމުންނެވެ. އަދި އަނެއްބަޔަކު، ހަރާމް އެތައް މުއާމަލާތެއް ސިއްރާއި ފާޅުގައި ކުރަނީވެސް ފައިސާ ހޯދާށެވެ. އެހެނީ ފައިސާއިން ހަރަދުކޮށްގެން ނޫނީ އަހަރެމެންގެ ޟަރޫރީ ބޭނުންތައްވެސް ނުފުއްދޭތީއެވެ. އަދި ޟަރޫރީ ނޫނަސް، އިންސާނުންގެ އެހެން އެދުންތައްވެސް ފުއްދެން އަންނަނީ ފައިސާ ހުރެގެންނެވެ. ނަމަވެސް ފައިސާ އާއި މެދު ވަރަށް ގިނަ ގޮތްގޮތުން ސަމާލުކަން ދޭން ޖެހޭނެއެވެ.

ފައިސާގެ ގޮތުގައި ބޭނުން ކުރެވޭ ކަރުދާހާއި ކުދި ފައިސާ ފޮތި ތަކަކީ ވަރަށްވެސް ގިނަ ޖަރާސީމު އޭގައި އެކުލެވޭ އެއްޗެކެވެ. އެހެންކަމުން އެ އެއްޗެހި އަނގައަށް ނުލުމަށް އަހަރެން ކުޑައިރު، އަހަރެމެންގެ މައިންބަފައިން ބުނެ އުޅެއެވެ. ނަމަވެސް އެ ބުނުމުގައި ފޮރުވިފައިވާ އެހެން މާނައެއްވެސް އެބަ ވެއެވެ. ހަމަ ލޮލަށް ނުފެންނަ ޖަރާސީމުތަކާއި އެކު، ފައިސާގައި ދެން އެ ވަނީ މުޅިން ނުބައި ޖަރާސީމެކެވެ. އޭގެ ޠަބީއަތް ގޯސް ޖަރާސީމުތަކެކެވެ.

މި ޖަރާސީމު ތަކުގެ ތެތޭގައި ރިބާގެ މުޢާމަލާތްތައް ހިމެނޭނެއެވެ. ކޮރަޕްޝަނާއި ރިޝްވަތު ހިމެނޭނެއެވެ. ހަރާމް ގޮތުގައި ހޯދާ ފައިސާތަކާއި ހަރާމް ކަންކަމަށް ހޭދަކުރާ ފައިސާއެވެ. އެއްކޮށް ޖަމާކުރި ފައިސާއިން، ޒަކާތް ނޭޅި ފައިސާއެވެ. އެ ފައިސާއެއްގެ ދަހިވެތިކަމުގައި އޮޅުވާލުމާ މަކަރު ހެދި ކޮންމެ ފައިސާއެކެވެ. އަނަގައަށް ނުލާށޭ ބުނެވެނީ ވެސް ސަބަބުތަކެއް ނެތިއެއް ނޫނެވެ. މިފަދައިން ނަޖިސްވެ މުޑުދާރުވެފައިވާ ފައިސާއަކުން ތިމާގެ ހާޖަތްތައް ނުފުއްދާށެވެ. ކާބޯ ތަކެތި ގަނެ، ކައި ނޫޅޭށެވެ. އަނބިންނާއި ދަރިންނާއި، މުސްކުޅި މައިންބަފައިންނަށް އެ ފައިސާއިން ހަރަދުކޮށް ކާންދީ ނޫޅޭށެވެ! އެ ލެވެނީ އެ ޖަރާސީމު ތަކާއި އެކު އެ ފައިސާތައް އަނގައަށެވެ. ދެން އިންސާނާ ވާނީ ބައްޔެވެ! ތަފާތު އެކި ގޮތް ގޮތަށެވެ! ފަހަރުގައި ބޭރުފުށުން އެ ބައްޔެއް ނުފެނިދާނެއެވެ. ދުނިޔެމަތީގައިވެސް ނުފެނިދާނެއެވެ. ނަމަވެސް އެނގޭހާވެސް ކަމަކީ އެ ޖަރާސީމުން ހެޔޮ ނަތީޖާއެއް ނުނިކުންނާނޭ ކަމެވެ. ނޫންނަމަ، އެ ފައިސާ "އަނގައަށް" ނުލާން ބަޔަކު މީހުން ނަސޭހަތަތެރިއެއް ނުވާނެއެވެ.

ފައިސާ އާއި ހެދި ހަލާކުވެ ދަނީ ކިތައް ކިތައް ގުޅުން ތޯއެވެ؟ ދެ އެކުވެރި އަކު އަކުވެ ފަށާ ވިޔަފާރިއެއް ހުއްޓި ބަނގުރޫޓުވެ، އެ ދެ އެކުވެރިން ހަތުރުންނަށް ވެފައިވަނީ ކިތައް ކިތައް ފަހަރުތޯއެވެ. މި ހާލަތްތަކުގެ ތެރެއިން ގިނަ ހާލަތްތަކުގައި ފައިސާ އަދާކުރަނީ ކިހާބޮޑު ދައުރެއް ހެއްޔެވެ؟ ފައިސާ ފެނުނީމާ އަހަރެމެންނަށް އެހެރަ ވާ ގޮތެކެވެ! އެ ބޭނުން ވެގެން، ހޯދަންވެގެން މަރުދެނީއެވެ. ކޮށްފަ ނުކުރާކަށް ކަމެއް ނެތެވެ! އެހާ ވަރަކުން ތިޔަހާ ފައިސާއެއް ތިޔަ ހޯދަނީ އަޅެ އެ ފައިސާތައް ހިފައިގެން ކަފުނުގައިވެސް އޮންނަންތޯއެވެ! ހައްތަހާވެސް ވިސްނަން ޖެހޭ ކަންކަމެވެ. ފައިސާ، ފައިސާ، ފައިސާ އެވެ. ފައިސާއާއި ގުޅުން ހުރި މިފަދަ ކޮންމެ ކަމަކާއި އަހަރެމެން ވިސްނަން އެބަ ޖެހެއެވެ. އެހެނީ ފައިސާ ނުގެންގުޅޭ މީހަކު އަހަރެމެންގެ ތެރޭގައި ނޫޅޭނެތީއެވެ!