ފައިދަށުލާ ފައިވާނެވެ. ފައިވާނަކީ މިއަދު އެޔަށް އެރުމުން ނޫނީ އަންނައުނު ފުރިހަމަ ނުވާ އެކައްޗެވެ. ހެދުމާއި އެކު ހަރުވާޅު ލާހެން ފައިވާނަކީވެސް މިއަދު މަޖުބޫރު މާއްދާއެކެވެ. އާ ހެދުމެށް ގަތަސް އެެއާ އެކު އެހެދުމަކާއި ގުޅޭ ފައިވާނެއް މިއަދު ގަންނަން ޖެހެއެވެ. ނުގަނެ ހިތްހަމަ އެއްވެސް ނުޖެހޭނެއެވެ. އަދުގެ ފެޝަނެވެ. ގުޅޭ ފައިވާނެއް ނުލިބިއްޖެނަމަ އެހެދުމެއްވެސް ނުލެވޭނެއެވެ. އާއިލާގެ ނުވަތަ ގާތް ރައްޓެހިންގެ އެކިއެކި ކައިވެނި ޕާޓީތަކުން ކޮންމެ ޕާޓީއަކަށް ވަކި ހެދުން ފަހައެވެ. މިއިން ކޮންމެ ހެދުމަކާއި އެކު އަރާނޭ ފައިވާނެއްވެސް ގަނެއެވެ. އެކި އެކި މުނާސަބަތުތަކާއި ހާއްސަ ދުވަސްތަކާއި ޢީދު ދުވަސްދުވަހަށް ހެދުން ފަހައެވެ. އެކި ކުލަ ކުލައިގެ ކޮންމެ ހެދުމަކަށް އެކުލައިގެ ފައިވާނެއް ގަނެއެވެ. ގަންނައިރު ގަންނަނީ އާދައިގެ ފައިވާނެއްވެސް ނޫނެވެ. އެއިރެއްގެ އެންމެ މަޤުބޫލު އަގުބޮޑު މޮޅު ފައިވާނެވެ. ގުޅޭ ފައިވާނެއް އަތުގައި ހުއްޓަސް ކަމަކު ނުދާނެއެވެ. އާހެދުމާއެކު އާ ފައިވާން ގަންނަން ޖެހެއެވެ. 

އެންމެ ފަހަރަކު އަރާލާފައި ބަހައްޓަނީއެވެ. ދެން އެފައިވާނެއް ބޭނުންކުރުމަށްފަހު ހަރުގަނޑު ތެރޭ ބަހައްޓަ ބަހައްޓާފައި ހިރަފުސް އެރުމުން ނުވަތަ ހަލާކުވުމުން ނުވަތަ ކުޑަވުމުން އެއްލާލަނިއެވެ. މިއީ ކިހާބޮޑު އިސްރާފެއްތޯއެވެ. ގެއްލިގެން ދަނީ ކިހާ ބައިވަރު ފައިސާއެއްތޯއެވެ. އިސްލާމްދީނުގައިވެސް އިސްރާފްކުރުން އެއީ ނަހީ ކުރައްވާފައިވާ ކަމެކެވެ. އިސްރާފްކުރުމަކީ މާތް ﷲ ނުރުއްސަވާ ސިފަތަކުގެ ތެރެއިން ސިފައެކެވެ. އިސްރާފްކުރުމަކީ ވެވޭ ހިޔާނާތެކެވެ. އިސްރާފުކުރުމަކި ފާފައެކެވެ. މިއީ އަހަރެމެން އިންސާނުންގެ ތެރޭގައި އަށަގަނެފައިވާ ގޯސް ޢަމަލެކެވެ.

ކަން މިހެން އޮތް އިރު އަހަރެމެން ދިވެހިންގެ ތެރޭގައި އިސްރާފުކުރުމަކީ މިހާރަކަށް އައިސް ވަރަށް ޢާއްމު ކަމެކެވެ. އޭގެ ބަދަލުގައި އަތުގައި އެވަގުތު އޮތް ފައިވާނަކަށް އަރާލުން ކީއްތޯއެވެ؟ ކޮންމެ ހެން އެ ލާ ހެދުމަކާއި މުނާސަބު ފައިވާނަކަށް އަރަން ޖެހޭނަމަ، އަތުގައި ގުޅޭ ފައިވާނެއް ނެތްނަމަ ތިމާގެ ނުވަތަ ރައްޓެއްސެއްގެ އަތުން އެއިރަކު އަރާލަންވެސް ގެނެވިދާނެ ނޫންތޯއެވެ؟ މިއީ އަހަރެމެން ވިސްނާލަން ޖެހޭ ކަމެކެވެ. އިސްރާފު ކުރުމުގެ މިގޯސް އާދަ އަހަރެމެންގެ ތެރެއިން ނައްތާލަން ޖެހެއެވެ.

އާދޭހެވެ! މި ދައްކަނީ ފައިވާނުގެ ވާހަކައެވެ. ފައިދަށުލާ ފައިވާނެވެ. ކޮންމެހެން އަގުބޮޑު މޮޅު ފައިވާނަކަށް އަރަން ޖެހޭ ހެއްޔެވެ؟ ހާއްސަ ސިއްޙީ ސަބަބެއް މެދުވެރިވެގެން އަރަން ޖެހޭ އެރުމުގެ ވާހަކައެއް ނޫނެވެ. ޒީނަތަށް ކުރާ ބޭނުމުގެ ވާހަކައެވެ. މަގު ހިނގާއިރު، ތިބާ ފައިވާނަށް އަރައިގެންތޯ ބަލަނީ ކާކު ހެއްޔެވެ؟ އަރާފަައި ހުންނަ ފައިވާނަކުން މީހުންގެ ޝައުގުވެރިކަން ލިބޭނެތޯއެވެ؟ ވަރަށްވެސް ނާދިރު ފުރުސަތެކެވެ. އާދޭހެވެ! ފައިދަށުލާ ފައިވާނެވެ. ކޮންމެހެން ބޮޑު ހަރަދުކޮށް، އިސްރާފު ކުރުމަށް، އަގުބޮޑު ފައިވާނެއް ބޭނުން ވޭ ހެއްޔެވެ؟ މޮޅަސް ދެރަޔަސް، އަގުބޮޑަސް އަގު ހެވަސް، އަލަސް ބަލަސް، ފައިވާނުން ކުރެވޭނީ ހަމަ އެންމެ ބޭނުމެވެކެވެ. އެއީ ފައިދަށުލުމެވެ!