"ސައިބާބުލީ" ކުރުމާއި އޮންލައިންކޮށް ޖިންސީ ފުރައްސާރަކުރުމަކީ ބޮޑު ކުށެއްގެ ގޮތުގައި ކަނޑައަޅައި ޖަލު ހުކުމެއް ތަންފީޒުކުރަންޖެހޭ ގޮތަށް ޖަޕާނުގެ ޕާލިމަންޓުން ގާނޫނީގޮތުން ބިލެއް ފާސްކޮށްފިއެވެ.
އެ ގައުމުގެ ޕީނަލް ކޯޑް އަށް މިގެނައި ބަދަލަށް އަމަލުކުރަން ފެށުމަށް ހަމަޖެހިފައިވަނީ ކުރިއަށް ހޫނު މޫސުމުގެ ދުވަސްވަރު އެވެ.
މިހާތަނަށް އަމަލުކުރަމުން އައި ޕީނަލް ކޯޑުގެ ދަށުން، ޖަޕާނުގައި "ސައިބާބުލީ" ކުރުމާއި އޮންލައިންކޮށް ޖިންސީ ފުރައްސާރަކުރުމުން ލިބޭ އަދަބެއްގެ ގޮތުގައި ކަނޑައަޅާފައި އޮތީ 30 ދުވަހުގެ މުއްދަތަަށް ޑީޓެންޝަން ނުވަތަ 10،000 ޔެން (75 އެމެރިކާ ޑޮލަރު) ގެ ޖޫރިމަނާއެއް ދެއްކުމެވެ.
އެކަމަކު، ޖަޕާނުގެ ޕާލިމަންޓުން ފަހުން ފާސްކުރި ބިލްގައިވާގޮތުން، "ސައިބާބުލީ" ކުރާ މީހުންނާއި އޮންލައިންކޮށް ޖިންސީ ފުރައްސާރަކުރާ ފަރާތްތަކުގެ މައްޗަށް ކުށް ސާބިތުވެއްޖެނަމަ، އަދަބެއްގެ ގޮތުގައި އެއް އަހަރު ދުވަހުގެ ޖަލު ހުކުމެއް ތަންފީޒުކުރުން ނުވަތަ 300،000 ޔެން (2،200 އެމެރިކާ ޑޮލަރު) ޖޫރިމަނާއެއް ދެއްކުމަށް ކަނޑައަޅާފައިވެއެވެ.
ޖަޕާނުގެ ޕާލިމަންޓުން މި ބިލް ފާސްކޮށްފައިމިވަނީ، ސޯޝަލް މީޑިއާ މެދުވެރިކޮށް ޖިންސީ ފުރައްސާރަކުރުން އެ ގައުމުގައި އިންތިހާ އަށް އިތުރުވަމުން އަންނަ ދަނޑިވަޅެއްގައެވެ.
ދާދިފަހުން އެ ގައުމުގެ ރިއަލިޓީ ޓީވީ ސްޓާރެއް ކަމަށްވާ ހަނާ ކިމޫރާ، އަމިއްލަ އަކަށް ދަން ޖެހިގެން މަރުވެފައިވަނީ އޮންލައިންކޮށް ކުރިމަތިލާންޖެހުނު ބުލީކުރުމާއި، ޖިންސީ ފުރައްސާރައިގެ ސަބަބުން ކަމަށް ވަނީ ތަހުގީގުން ހާމަވެފައެވެ.
ނެޓްފްލިކްސްގެ "ޓެރޭސް ހައުސް" އިން ގިނަ ބައެއްގެ މަގްބޫލްކަން ހޯދި ކިމޫރާގެ މަރުގެ ތަހުގީގު ތެރެއިން، ސާބިތުވެ ފެނުނު ހެކިތަކަށްފަހު ސޯޝަލް މީޑިއާ މެދުވެރިކޮށް ނަފުރަތުގެ މެސެޖްތައް ފޮނުވުމުގެ ތުހުމަތުގައި ފިރިހެނެއްގެ މައްޗަށް ކުށް ސާބިތުވުމުން މިދިޔަ މާރިޗް މަހުގައި ޖޫރިމަނާކޮށްފައިވެއެވެ.